يوم مع التحرشات

إمبارح وأنا راجعة من المجلة، شفت في محطة المترو بنت مغمى عليها، ورجالة كتير ملمومين حواليها، خفت حد يتحرش بيها، فرُحت وقفت جنبها لحد ما يفوقوها، الموضوع طوّل أوي والبنت كانت تعبانة جدًا، ففضلت معاها والناس اتفضت ومشيت، وفضل معانا واحد زميلي، ودكتور كان موجود في المترو بالصدفة، حاولنا نفوقها وكده، وبعدين بالعافية قدرت أعرف منها رقم حد من أهلها نتصل بيه يجي ياخدها ينقلها على المستشفى، أدتني رقم خطيبها.
لما اتصلت بخطيبها وقلتله تعالى بسرعة محطة مترو الشهداء عشان خطيبتك مغمى عليها ومافيش حد معاها، ولازم حد ينقلها المستشفى، قالي بالحرف الواحد بكل برود: وإنتي بتتصلي بيا ليه، ماتتصلي بأخوها، أنا مش فاضيلكوا، خدي رقم أخوها وكلميه !!!
البنت لما فاقت شوية ماكنتش قادرة تاخد نفسها، وكانت بتعيط بطريقة هستيرية، ولما قلتلها هكلم أخوكي اترعبت، وفي حياتي كلها ماشفتش حد خايف من حد، قد ما هي كانت خايفة من أخوها. ولما جه عرفت ليه، خلاصة كلام كتير، إنه إنسان زبالة بكل معنى الكلمة، طريقة كلامه، ونظراته، ومعاملته ليها، وإن هو اللي متخانق معاها وموصلها للحالة دي، البنت أنا كنت مسنداها على كتفي وهي ميته من العياط، ورجلها مش شايلاها، وهو بدل ما ياخدها مني، بيزعقلها ويقولها هتفضحينا قدام الناس بمنظرك ده!! ماكنتش قادرة أتكلم من كتر ما كانت معدتي مقلوبة من الشخص ده.. بعد كده البنت راحت مع أخوها ومرات أخوها للمستشفى على حد قولهم يعني، وأنا رحت عشان أركب المترو، طول الطريق لحد ما دخلت من باب المترو، وأنا بقول لنفسي: ماعتقدش إن قصة البنت دي هقدر أنساها بسهولة...
لما ركبت المترو كانت الساعة 8:30 ركب معانا شاب في الثلاثينات تقريبًا، ماسك جرنال بيحل فيه الكلمات المتقاطعة، وعلى جبينه كان فيه زبيبة صلاة، وشايل شنطة لابتوب، وشكله يوحي إنه محترم، وبيشتغل شغلانة كويسة.
لسة هتكلم وأقوله لو سمحت دي عربية سيدات، لقيت بنت هو كان واقف جنبها اتكلمت وقالتله لو سمحت انزل الساعة لسة ماعدّتش 9، كان الباب لسة ماتقفلش، والمترو بيقف في محطة الشهداء كتير، والدنيا ماكنتش زحمة خالص بالعكس كانت فاضية أكتر من أي يوم، قالها لا مش نازل، قالتله: لو سمحت انزل، بصلها بقرف وبعدين بص في الجرنال وقعد يحل الكلمات المتقاطعة وضحك باستهزاء وماردش عليها، جت المحطة اللي بعدها، وقالتله إنزل، وقالها: مش نازل!
أنا غالبًا في المواقف اللي زي دي ببقى مستحليه صوتي العالي، وبتخانق وبزعق جامد، بس المرة دي سكتت خالص، وقعدت أتفرج. البنت قالتله: هتنزل المحطة الجاية
بكل سخرية قالها: وإنتي مالك هو المترو ده بتاعك لوحدك
قالتله: أه بتاعنا، دي عربية سيدات
قالها: بقولك إيه في عقوبات وغرامة مش كدا، لما يبقى في حد بقى يبقى يعاقبني، أبقى أنزل!!
البنت ماعرفتش ترد فسكتت، وماحدش من الستات اللي كانوا قاعدين يتفرجوا فكر يرد أو يتكلم وكأن الموضوع لا يعنيهم، البنت كانت هتبتدي تقول حاجة كمان وتجادل معاه، شاروتلها من غير ما حد ياخد باله، وقولتلها أصبري واسكتي خالص. أول ما المترو وصل المحطة، قمت وقفت قدام الباب، أول ما الباب فتح صوّتت. وكنت هلم الناس اللي على الرصيف كلهم يجوا يضربوه علقة، لولا إنه خرج جري من الباب التاني أول ما لقاني واقفة على الباب وبزعق وبصوّت..
الموقف ده بيتكرر كتير جدًا، حتى إنه بقى جزء أساسي من الروتين اليومي، أنا كذا مرة قبل كده رحت بلغت إن الشرطة مش بتبقى واقفة على الرصيف، وبردو مافيش فايدة، فين الشرطة، الراجل بيستهزأ بينا وبيقولنا بكل سخرية إن مافيش عقاب، وإنهم بيعملوا كده لأن مافيش عقاب!!!
بعد ماخرجت من المترو ركبت ميكروباص، كان كله رجالة ومافيش غير واحدة ست فلاحة عجوزة أوي شكلها في السبعينات من عمرها، كانت قاعدة جنب الشباك قدامي، وقاعد جنبها شاب عنده حوالي 25 سنة، افتكرته إبنها، بعد ما العربية مشيت بخمس دقايق بالضبط، الشاب ده قال للسواق، على جنب لو سمحت، ونزل، أنا قلت لنفسي أطلع أقعد جنب الست دي أحسن، أول ما قعدت جنبها، لقيتها قربت مني أوي قالتلي بصوت واطي: شوفتي الواد الوسخ، شافني في المترو شايلة شنط كتير، قالي خاليني أساعدك يا أمي، وخد الشنط وشالها عني يابنتي، وبعد كده أول ما ركب جنبي، حط إيده على رجلي، وعمل حاجات مش كويسة، قمت أنا قايلاله لأ ماينفعش اللي إنت بتفكر فيه ده، ده ولادي أكبر منك، إنت فاكرني إيه، إتق الله، ده أنا قد أمك ولا جدتك، شفتي يا بنتي اللي بيحصل في الدنيا.
أنا فعليًا بقيت ماسكة نفسي بالعافية عشان مارجّش قدام الناس!
الست كانت بتحكيلي وهي مكسوفة وخايفة، ويمكن دي أول مرة في حياتها تتعرض للموقف ده، هي حكتلي لأنها يمكن حست إنها لازم تحكي لحد، وأكيد ماكنش ينفع إنها تحكي لحد تعرفه.
أنا أخدت ردة فعل قاسية تجاهها، وكانت صعبانة عليا إني هعمل كده، بس كان لازم أعمل كده عشانها مش عشاني، أنا عليت صوتي أوي وقصدت إن العربية كلها تسمع، بالرغم من إن الست كانت بتحكيلي سر، إلا إني بأعلى صوتي قلت: إيه اللي خلاكي تسكتيله، كان لازم تزعقيله، ويتضرب علقة هنا، ماهو اللي راكبين معانا دول أعتقد كده والله أعلم إنهم رجالة، وأكيد كانوا هيضربوه علقة موت، لما يحصل موقف زي ده تاني لازم تزعقي وتعلي صوتك وتلمي الناس إنتي ماغلطيش عشان تخافي.
طبعًا في اللحظة دي كل الناس عملت نفسها من الهند، في حين إنك لو بتتكلم في الموبايل مثلاً هتلاقيهم كلهم مركزين معاك وإحتمال يدلوا بدلوهم ويقولولك رأيهم في الموضوع اللي إنت بتناقشه في التليفون.
الراجل اللي كان قاعد جنبي الناحية التانية، كان راجل عجوز شكله حوالي 60 سنة، ولمحاه بطرف عنيا ماشلش عنيه من عليا لحظة بكل بجاحة من ساعة ما قعدت في النص بينه وبين الست، خلصت كلامي معاها، وبصتله وبرقت عنيا وعليت صوتي وقلتله: في حاجة يا حاج ؟!!!!!!!
بعد كدا طلعت مطوة من شنطتي وقلت بصوت عالي جدًا لدرجة إن العربيات اللي ماشية جنبنا الناس فيها بصت علينا من كتر ما كان صوتي عالي، وقلت : أنا معايا مطوة أنا معايا مطوة وعايزة حد يقرب مني بقى!
الكل اتخض جدًا، وكلهم بلا استثناء اتعدلوا في قعدتهم، الست قالتلي برافو عليكي، فعلاً في الزمن ده لازم البنات تحمي نفسها، مادام الحكومة مابتحميش حد، والناس وسخة أوي، شوفي أنا ست كبيرة أهو وحصلي إيه، أنا كمان من هنا ورايح هشيل معايا سكينة.
الراجل اللي جنبي بقى بعد ما كان عمال يقرب مني كل شوية بحجة إن المكان صغير ويعد فين يعني ينزل يقعد على الأرض مثلاً عشان جناب سيادتي مابحبش حد يلزق فيا، لقيته بِعِد عني خالص، وبقى فيه مكان جنبي فاضي بيني وبينه أكبر من المكان اللي أنا قاعدة فيه أصلاً.
لما نزلت من العربية حطت المطوة في جيبي، وطَلعت من الشنطة قَطَر، بقيت في الفترة الأخيرة مابمشيش في الشارع إلا وهو في إيدي.
أول ما وصلت البيت رَجَّعِتْ !
كانت النهاية الطبيعية لتتابع الأحداث في اليوم ده.
الرجالة.. مش بس الفقراء، مش بس اللي مش متعلمين، مش بس الشباب الصغير في السن، ومش بس الرجالة الكبار أوي في العمر، مش بس المتدينين، ومش بس اللي مش متدينين، الرجالة الشرقين، المصرين، العرب مرضى نفسين.
إنتوا مرضى نفسين، أيوة إنتوا مرضى نفسين، لازم تعترفوا بكده، إنتوا مش أسوياء، سلوكياتكوا مش طبيعية، كلكوا .. بلا استثناء .. إنتوا لازم تعرفوا إنكوا مقرفين بشكل يموّع النِفِس..
واللي مش عاجبه الكلام وعايز يعمل بلوك بالسلامة في ستين داهية..