.. فى التحرش أتكلم

طبعا بقي حديث الساعة دلوقتي.. كل الناس عماله تسأل.. هو ليه كده

قلة الأدب انتشرت بشكل بشع كده؟؟

هو مابقاش في دم ولا ايه؟؟ هو ده كبت عن الشباب ولا البنات هي اللي بقي لبسها مش محترم..

وأسئلة من النوع ده كتير.. كل واحد عمال يدور علي سبب أو شماعة

يعلق عليها الغلط .. ودي طريقة دفاع نفسية كده في النفس البشرية

لما يكون في مشكلة ومش لاقي ليها حل يدور علي شماعة عشان بس

يدي لنفسه إحساس بالراحة.

هو ده بقي للأسف اللي احنا بنعمله.. احنا مش بنحل ولا بندور علي

حل إحنا بندور علي شماعة نعلق عليها اللي بيحصل

ناسين حاجة مهمة أوي أوي إن التحرش نتاج مجتمع مش فرد.. يعني

زمان أمهاتنا كلهم بيقولوا إن زمان كان اللبس كله قصير وميني جيب

والحجاب كان قليل اوي وعي الرغم من ذلك ماكانش بيحصل ده خالص.

ليه بقي طبعا طبعا لو ده كان حصل زمان وكان بس صوت بنت طلع

وهي بتصرخ كان كل الشارع اتلم عليه وخد علقة موت وده يكون أقل عقاب يشوفه.

إنما دلوقتي بقي يا سادة بذمتكم كام واحد بيشوف واحدة بيتحرش بيها

في الشارع أو سامع صوتها وهي بتصرخ بتجري عليها وتمسك الكائن

ده (لأنه مش راجل بكل تأكيد) وتتصرف معاه؟؟ كام مرة لقيت واحدة

حد بيهددها بالسلاح عشان تركب معاه العربية وجريت عليها

ماخوفتش وقلت أحسن يعملوا فيا حاجة؟؟

كام مرة كنت ماشي مع مراتك أو أختك وشوفت واحدة بيتحرش بيها

وقالتلك روح شوفها قلتلها مالناش دعوة افرضي عمل فيكي حاجة انتي كمان..

هو ده بقي شكل مجتمعنا دلوقتي طالما المشكلة مش عندي ماليش

دعوة.. ومافيش مانع كمان اقعد اتفرج .. قوينا شوكة الغلط وصاحب

الغلطة بسكوتنا ..

بقي سكوتك دليل علي إنك موافق علي اللي بيحصل أو علي الأقل مش

هتعمله حاجة.. والدليل علي ده إن الموقف ده بيحصل في الزحمة يعني

لو حد بيصرخ هتسمعه ولو كل البشر دي اتلمت عليه خلاص الحكاية

خلصت.

احنا بقي قطعنا زمن من السكوت فتفشى الموضوع أكتر وأكتر ..

وخايفين من رد فعل الطرف صاحب الغلط.

هحكيلوا مشهد حصل في صلاة العيد ده .. وأنا راجعة من الصلاة مع

أخواتي من مصطفي محمود وطبعا كلكم عارفين شارع جامعة الدول

في الوقت ده ازاي زحمة.. وعارفين برضه إن في بعض الكائنات مش

بتكون جايه تصلي ولا حاجة بس جايه تستهبل.

لقيت بنتين ماشين كده علي جانب الشارع وبنت فيهم ماسكه بلونه..

تلاته ولاد لا يتعدي سنهم ال 21 سنة عمالين يعاسكوا بالكلام شويه

والبنات يحاولوا يفلتوا منهم وهما وراهم وقعدا بقوا طيب هاتي البلونة

وطبعا هنلاقي ناس بتقول " هي اللي خلاها تمسك بلونه وتنزل صلاة

العيد أساسا" والبنتين كانوا لابسين عبايات سودا ومش فيها اي حاجة

ملفتة .

كل ده والناس عادي معدية من جنبهم ولا اي حاجة قربت منهم أنا

وأختي لإنهم كانوا حاصروهم البنتين اشتجعوا وزعقوا وأنا برضه

زعقتلهم واديتهم اللي فيه النصيب من التهديد والوعيد وسحبت البنتين

وعدوا ومشيوا..

طبعا مش بحكي عشان تقولوا بطلة ولا بتاع.. والله جاتلي حالة ذهول

أولا إن مافيش اي راجل كلف خاطرة وعمل كده وثانيا إني اصلا أنا

ماكنتش عارفة هعمل معاهم ايه يعني خدت رد فعل سريع وخلاص

وماتوقعتش أنهم بكلمتين كده هيمشوا.. ده دليل إن اللي بيعمل الغلط

لو لاقي اللي يقفله مش هيعمل كده يعني كنت متخيلة لو راجل وقفلهم

وظبطتهم كده ولا راح سلمهم لاي ظابط كانت الموضوع احسن بس

اهو عملت اللي اقدر عليه .

عارفة إن في ناس عمالة تقول عايزين قوانين بس للأسف مافيش

قوانين هتفعل إلا لما بوصلة الإخلاق اللي جوانا تتحرك بدل ما هي

التراب كلها.

محتاجين كلنا نحاسب نفسنا وتكون أنت القانون اللي علي الأرض..

محتاجين قيم "الرجولة" مش الذكورة.. اللي منها النخوة كده عشان مش التحرش بس اللي بقي ظاهرة فظيعة في حاجات تانية يوم بعد يوم بتزيد

والشجاعة..

وربنا يلطف بينا