كحك مّشكِلللل..!؟

ونسمع أغنية «والله لسه بدرى بدرى يا شهر الصيام»، حقيقى رمضان جه فى الحر والصيام كان مرهقا جداااا لكن فعلا الشهر ده بيمر أسرع من أى شهر؟! وبعد ماكنا بنعمل كنافة وقطايف وعصائر.. والإعلانات ملو الشوارع ده غير التصريحات اللى فى جميع الوسائل الإعلامية أن جميع مستلزمات رمضان متوافرة بالأسواق! وكأننا طول السنة مش لاقيين ناكل أو يمكن رمضان مينفعش من غير المستلزمات!!!
لقينا برضه الجرايد صرحت بأن جميع مستلزمات العيد متوافرة بالأسواق!! السكر والدقيق... ومش مهم بقى لا أزمة سكر ولا قمح ولا الناس اللى بتقف فى الطوابير عشان رغيف عيش!!! لكن الكحك لازم يتعمل، تصوروا أنى لما دورت عن أصل الكحك عرفت إنه دخل مع الدولة الفاطمية والعجيب أن النقش اللى عليه نقش فرعونى!! يا سلام عليكى يا بلدى، المهم نرجع للكحك نسيت أقولكم إنى ساكنة مع أهل جوزى يعنى كلنا فى عمارة واحدة وإن مامته وعماته لازم يخبزوا الكحك بالصاجات وبيبقى يوم، حقيقى الولاد بيتبسطوا عشان العرايس اللى بيعملوها والجو اللى بنعيش فيه، وده طبعا ميمنعش الكلام اللى بنسمعه كل سنة... الدقيق طرد السمن على أساس إنه مسنود من فوق وأن ريحة الكحك بقت مغشوشة وأن الكحك لازم يتعمل بنص سمن بلدى ونص صناعى عشان يبقى ناعم!! ومين اللى هايقشر اللوز عشان الغريبة وأن مربى المشمش هى أحلى مربى للبتى فور... ده غير التخمة والوزن الزايد والريجيم اللى هانبتديه بعد العيد...!!! وطبعا كل سنة أنعى هم الأطباق اللى بتيجى لى من العمارة والأصحاب وإنى لازم أردها وبصراحة أنا لا لى فى العجن ولا الخبز، وكمان ولادى كبروا على يوم الكحك والعرايس!!! وإن كانوا بيحبوا البينين بالعجوة عشان الفطار.. المهم إنى لما حاولت أخبز فى البيت كام صاج صغير ولامرة نجح معايا وكل اللى طلعت به هو خسارة الفلوس!
لأن الحاجة مبقتش رخيصة... وعليه اقتنعت بنظرية شرا العبد ولا تربيته، ونزلت اشتريت 3 كيلو كحك و2غريبة و2 قراقيش وكل ماييجى لى طبق سواء من العمارة أو من بره أروح واخدة من كل طبق اتنين وأضيف عليهم من الحاجة اللى اشتريتها وأرجع الطبق مليان!!! وكده أكون عملت اللى علىّ البيت فيه كحك والأطباق رجعت مليانة لأصحابها... وطبعا مقدرتش أقول أنى اشتريت الكحك من بره لحسن أهل جوزى يقولوا إنى خيبانة!!!
المهم لقيت حماتى بتكلمنى وتقولى:
إيه الكحك الجميل الناعم ده ... بس الغريبة إن مفيش خبزة زى التانية ولا شكل زى التانى هى دى الشطارة! أنا لازم آخد منك وصفة الكحك أبوعجمية والغريبة اللى بالعين جمل!!!
وآدينى محتاسة على النت عشان أشوف وصفة سهلة وكل سنة وأنتم طيبين.