كل أسبوع

وآخرتها إيه؟!

أيوه أنا متبهدل.
وأنا في البهدلة.. مش لوحدي.. لكن معايا ملايين من المصريين.. متبهدلين علي كل شكل ولون.. وبعضهم مثلي: متبهدل من 03 سنة وأكثر.. وصابر وعامل نفسه »آل إيه«: مؤمن بقضاء الله؟! رغم أن نفسه علي آخرها.. والكيل طافح للركب.. ولكن ماباليد حيلة.
وبعضهم ناس تانية مش زيي.. متبهدلين من كام سنة كده.. تتعد علي الصوابع.. وعايشين مابين الأمل والرجاء.. وثورة وراها ثورة.. ويامصر أهلك لسة مستنيين: العيش والحرية والكرامة.. والعدالة الاجتماعية..
وموت ياحمار
ومع كل دول.. سلملي علي الوطن اللي متبهدل معانا في كل لحظة..
أيوه.. وأقولها بألف صوت: أنا متبهدل.. وعايش زي العايشين.. باضيع حياتي في طابور العيش.. وزحمة المترو وحشرة الأوتوبيس.. وخناقات العيال.. وطلبات الست اللي في البيت.
اللي أبدا.. مابتنتهيش.
وأنا.. لا أنا بتاع مظاهرات ولا وقفات ولا اعتصامات ولا قطع طرق.
ولا من الرافعين صباع ولا صباعين ولا حتي.... أربع صوابع.
وأنا برده مش من الناس اللي عجباها الفرجة.. وكفاية عليها: »مصمصة الشفايف«؟!
أنا بتاع البهدلة و.. الكحورة
وباموت في البلد دي.. بدل المرة ألف مرة واللي باصبح فيه.. بانام عليه.. نص كلامي »كحة« ورغم كده: لسة برده »عايش«؟!