رسالة إلي أمي

أمي الحبيبة بعد التحية والسلام..
من أرض الغربة القريبة بكتبلك وحشتيني يا أمي وواحشني حنانك وطيبتك وحبك وحضنك..عارفة يا أمي كل شويه اقعد مع نفسي وافتكر أيام زمان، أيام اللمة الحلوة واللقمة الهنية والأهل والأصحاب والضحك اللي من القلب، الغربة يا أمي وحشة قوي الغربة والبعد عاملين زي الكابوس إلي بيطبق علي نفس الواحد وهو نايم ويصحي من النوم عرقان بينهج ويكتشف إن الكابوس ماخلصش وإنه ماكانش نايم، الغربة يا أمي قتلاني، لكن عندي أمل ارجع قريب واترمي ف حضنك وابوس إيديكي ورجليكي، يااااااااااه يا أمي وحشاني، عارفة يا أمي اناس هنا غريبة قوي، ماحدش بيهتم ومافيش عيلة بتتلم كل واحد همه علي نفسه والعيشة هم في غم.. الزمايل مش زمايل والصحاب مش صحاب والحبايب مش حبايب، غابة يا أمي وشعب سايب الضمير حرفين ع الورق ،والخير كان كتير بس اتسرق ،وكل واحد همه كرشه..همه قرشه، نفسي ارجعلك يا أمي ولو يومين وانسي فيهم هم طافح من سنين، هنا يا أمي الناس مش طيبيين ماشيين في الشوارع مكشرين وزهقانين وتعبانين والشوارع بقت مليانة شحاتين والناس هنا غريبة.. فعلاً غريبة الناس هنا حلافين وشتامين وسب دين وخناقات وحكايات وروايات وفي كتير نصابين هنا يا أمي الجهل خارب كل حاجة، الجهل خلي الناس بتعمل أي حاجة هنا يا أمي ناس كتير مرضانين هنا يا أمي الأكل مالهوش أي طعم والميه يا أمي لونها طين صدقيني مهما قولت مش كفاية الناس يا أمي مطحونين بس أنا عندي أمل إني أعود وتعود معايا ضحكتي وفرحتي واترمي في حضنك انتي يا أمي وانسي أيام غربتي، معلش يا أمي وجعت قلبك بالكلام بس كان لازم أفضفض، سلميلي عالعموم والحبايب والخلان وبوسيلي خدك الف بوسة.. والسلام مش ختام.
ابنك المتغرب جوة حضنك