"الحب وسنينه".. "مش عارف يحب اللى بيحبه.. ولا يخلى اللى بيحبه يحبه".. وفيه ناس بتحب نفسها وأنانية بزيادة.. تعرف على أكثر 7 مشاكل عاطفية تواجه المحبين على لسان أصحابها

نسعى جميعا للبحث عن الحب فى حياتنا، كما نحتاج إلى الماء والهواء، حتى نشعر بالأطمئنان والاستقرار، وكلما تمضى بنا الحياة نصبح أكثر احتياجا إلى أن نحب أو نكون محبوبين، لنختبئ بين أحضانه خوفا من الوحدة واليأس،و لكن هل الحب هو سبب كل المشاكل التى تواجهنا ومصدر سعادة فى حياتنا فى نفس الوقت، لأنه مرتبط بكل المشاعر سواء نجاحا أو فشلا، وهل للحب لمسات إبداعية يتركها فى ملامحنا وعلاقتنا وأفكارنا ومعنوياتنا ومقاومتنا وتبديد مخاوفنا فى الحياة، وال"اليوم السابع" اخترقت موقع " Society problems Community وتعرض نماذج وحكايات واقعية تجسد أن الانسان فى حالة بحث دائم عن الحب.
مش عارف يخلى اللى بيحب يحبه
أنا بحب واحد من 4 سنين من طرف واحد
مش عارفة هو بيحبنى ومش عاوز يظلمنى معاه عشان ظروفه ولا مبيحبنيش أصلا بس عارف بحبى هو لو قالى أنا هقف جنبه بكل حاجة بس أنا مليت من كده ومش عارفة هوصل معاه لايه أنا لا معاه ولا مع غيره ومعدتش صغيرة وكمان فنفس الوقت مش هقدر أصارحه.
حب غير متكافئ
من الآخر كده أنا عارف أن لما أتجوز واحدة أكبر منى بكام سنة مش حرام بس فى نفس الوقت ممكن مع مرور الوقت ممكن تظهر مشاكل قدام بسبب صغر السن ده بس أنا والله بحبها جدا وشايفها أنها أحسن واحدة عندى ومناسبة ليا وأنا ف تانية كلية وهى أكبر منى بخمس سنين ظروفى المادية الحمد لله كويسة وكل حاجة جاهزة بس خايف أفاتحها فالموضوع تزعل أو تضايق بسبب المشكلة دى.
أرجو نشر مشكلتى بدون اسم.. ابنى على علاقه مع سيدة كبيرة فى السن أولادها فى مثل سنه، وهذه العلاقة منذ أكتر من 10 سنوات جربت كل حاجة عشان يبعد عنها مش نافعة مع العلم ابنى حتى الآن لم يتزوج بسببها.. فما العمل أرجو المساعدة وياريت اللى يرد عليا ينصحنى ومن غير تريقة.. أنا زى والدتكم فكروا معايا فى الحل.
مش عارف يحبب اللى حواليه فيه
أنا مابعرفش أكون صداقات هو أنا مش عارفة فين المشكلة.. أنا فى جامعة دلوقت.. اتعرفت على ناس فى أول الدراسة بس مش حاسة بإحساس الصحوبية بكلمهم عن المحاضرات الواجبات كده يعنى.. أنا مش عارفة الناس اللى بيتصاحبوا على بعض بسرعة بيتصاحبوا كده أزاى.. أنا بأعانى جدا من الموضوع ده وبتضايق لما بقعد لوحدى فى الجامعة وشايفة البنات يهزروا ودايما مع بعض ويحكوا لبعض على مشاكلهم والحاجات اللى بتفرحهم.. حاسة لو بقى عندى أصحاب هبقى سعيدة أوى.. وكمان خايفة المشكلة دى تفضل ملازمانى حتى لما اشتغل.. يا ريت ماحدش يقول رد سخيف ولو حد من القراء مر بالتجربة واتحلت أو ماتحلتش شاركونى.
مش عارف يحب نفسه
أنا عندى 16 سنة 2 ثانوى اعتبرونى أخوكم الصغير لمدة دقيقة من غير ما تعرف اسمى أو تعرف شكلى أنا إنسان وحيد عايش بدون قلب عايش فى دنيا كبيرة بدون صاحب ولا حبيب متدين بعض الشىء منعزل عن الناس مبحبيش اختلط مع حد كتير كان عندى أخين فى كلية هندسة الله يرحمهم من سنتين فى حادث
والدتى مريضة بسبب أخواتى.. والدى كبير فى سن
مليش فى الحب أو شغل المراهقة معتبر أى بنت وحشة أو حلوة زى أختى وأصلا أنا مبحبيش أجرح مشاعر حد.
بيحب نفسه بزيادة
مشكلتى إنى بحب البنات جدا، والحمد لله عندى قبول غير عادى يعنى لو بنت عجبتنى وجيت أتعرف عليها عمر ما واحدة صدتنى ولا قالتلى لا ولا أحرجتنى والكلام ده يعنى باختصار، أنا بحب البنات والبنات بتحبنى المشكلة مش هنا المشكلة فإن كل بنت أعرفها تتعلق بيا أوى وتحبنى وأنا بيبقى ف نيتى صداقة وبس، الموضوع ده سبب لى تعب نفسى كتير وتأنيب ضمير لأنهم بيحبونى ويتعلقوا بيا وأنا مش ف نيتى إلا صداقة وبس..
حب المراهقة البريئة
يا جماعة أنا طالب ثانوية عامة 18 سنة هخش فى الموضوع على طول أنا معجب ببنت معايا فى درس جدا ومشدودلها أوى وشايف أنها بتبادلنى نفس الإحساس بس أنا مش عارف الصراحة الموضوع ده أخرته أيه يعنى أنا بحبها بجد والموضوع ممكن يتقلب لارتباط ف يوم من الأيام ولا دى مجرد مراهقة يعنى وهتروح لحالها وضياع وقت عالفاضى ولا أيه أكيد طبعا فى ناس كتير عدا عليهم نفس الموضوع وهما دلوقتى كبار شايفين الصورة واضحة قدامهم يا جماعة ياريت كل اللى يقرا الموضوع دة يدعيلى أنى أجيب مجموع وأدخل الكليه اللى نفسى فيها وشكرا
مش عارف يحب اللى بيحبه
أنا مخطوبة وخطيبى بيحبنى قوى بس أنا محبتهوش زى ما هو حبنى كل الحكاية أن أنا شايفاه شخص مناسب جدا عقليا واجتماعيا وماديا وعلشان كده وافقت على الارتباط بيه المهم أنا دلوقتى حاسة أنه شخص عملى وأنا برضو عملية بس رومانسية قوى، وهو مش كده وتصرفاته غريبة شوية يعنى مثلا عيد ميلادى عدى ومجبليش هدية ولما بقوله عن عيد الحب والحاجات دى مبحسوش مهتم بيها قوى.. وكل مثلا ما أكلمه على حاجات فيها رومانسية لا تعليق.