لست معقدة والتزامك ليس بروداً وعليه أن يحترم هذا

إزيكم يا أحلى موقع في الدنيا. أنا عندي مشكلة مضايقاني أوي ونفسي تردّوا عليّ، ويا ريت كمان تنشروها عشان أعرف رأي الناس فيها.
أنا بنت عندي 22 سنة، مخطوبة لإنسان محترم وطيب، أنا في البداية أول ما تقدم لي كنت مترددة جداً، وخايفة أتسرع وأوافق فأندم بعد كده أو أظلمه معايا؛ لأنه من تاني مرة بالظبط كلمني فيها في التليفون قال لي إن هو بيحبني من أول ما شافني، وعايز يسمع مني إن انا كمان بحبه.. هو شافني أول مرة في الشارع ومشي ورايا وعرف البيت وسأل علينا، وجه اتقدم لي بعدها على طول؛ بس أنا ما كنتش شفته ساعتها ولا أخذت بالي؛ بس هو بيقول لي إني ساعتها بصيت له فافتكر إن أنا كمان معجبة بيه وجالي على الأساس ده.
وحصلت بيننا خلافات كتير عشان الموضوع ده لأني بطبيعتي خجولة وما اعرفش أقول الكلام ده لحد وأنا لسه باتعرف عليه كده، وهو ما كانش متفهم ده أبداً لأنه كان خاطب قبلي، وكانت خطيبته جريئة جداً ومختلفة عني كتير؛ لدرجة إني خليت والدي ووالدتي يتدخلوا في الموضوع عشان يقنعوه إن المشاعر دي بتيجي واحدة واحدة.
وعملنا الخطوبة وكنا متفقين إن مدتها سنة، وأنا لسه مخطوبة من شهر واحد وأعجبت بيه؛ بس لسه ما حبتهوش أوي، وهو دلوقتي بيقول لي إنه عاوز يتجوزني بعد 3 شهور أو 5 شهور بالكتير، وإنه ما ينفعش يستنى سنة كاملة؛ خصوصاً إنه هيكون بقى جاهز مادياً.. وأنا مش عايزة كده؛ لأني شايفة إننا ما خدناش على بعض كفاية.
المشكلة التانية بقى إنه بيقول لي إني معقدة معاه لأني بارفض إنه يتجاوز معايا، ولو حتى إنه يمسك إيدي؛ لأني عارفة إني لو سمحت بكده هتحصل حاجات أكتر من كده، وأنا شايفة إن ده ما ينفعش في الخطوبة؛ بس هو بيقول لي إن ده التطور الطبيعي للحب، واعترف لي إنه كان فيه بينه وبين خطيبته السابقة قبلات وكده، وأنا كمان كنت مخطوبة قبل كده؛ بس والله ما حصل بيني وبين خطيبي السابق أي حاجة من دي، وهو سألني عن ده، وكان فرحان جداً إني عمري ما عملت حاجة غلط قبله.
بس اللي هيجنني: ليه الشباب بقوا كده؟ عايز البنت قبل ما تعرفه تكون ملاك، وبمجرد إنها تتخطب له يطالبها بحاجات مش من حقه إلا لما يتجوزها، ولو رفضِتْ تبقى ما بتحبهوش أو باردة.
ومش عارفة هو هيستحملني كده بالحدود اللي أنا حاطاها دي ولا لأ، وخصوصاً إني مش موافقاه على التسرع في الجواز أوي كده؛ مع العلم إن خطيبي عنده 28 سنة.
آسفة للإطالة بس يا ريت تردوا عليّ في أسرع وقت، ويا ريت كمان تنشروها عشان أعرف رأي الشباب إيه في المشكلة.
sweety

لو عايز تفضفض لنا دوس هنا