حبيبي هيشلّني

السلام عليكم جميعا.. أنا بنت وعندي 21 سنة أنا قابلت شباب كتير في حياتي وكانوا بيحبوني جدا بس أنا مش حبيت ولا واحد فيهم، ومرة قابلت واحد صاحب أخويا وهو معايا في المعهد أنا بجد بحبه أوي وهو كمان بيحبني. المشكلة هنا إن هو مش بيعرف يتكلم ولما قلت له إنه يحاول يتكلم معايا كلام حب قال لي إنه قال لي بحبك 4 مرات، أنا اتشليت..
أنا الآن سبته بس بجد أنا بحبه جدا ومش عارفة أعامله إزاي لما أرجع المعهد.. بجد أنا محتاجة رد ضروري.
m
بتقولي قابلتي شباب كتير في حياتك حبوكي لكن إنتي ما حبتيش حد، أولا: فيه حاجة مهمة جدا لازم تفهميها إن فيه فرق كبير بين الحب والإعجاب، يمكن إنتي قابلتي ناس كتير أعجبوا بيكي وحاولوا يتقربوا منك وأنا سعيدة بيكي إنك كنت صادقة مع نفسك وقلتي إنك ماحبتيش حد ولم تنجرفي في علاقات ليس لها قيمة عشان مش مبنية على مشاعر حقيقية.
لغاية لما قابلتي صاحب أخوكي اللي حبتيه وحبك بس عنده مشكلة إنه مابيقدرش يعبر عن حبه ليكي وإنتي تعبتي وعشان كده سبتيه رغم حبك له، صديقتي اللي بيفرق الإعجاب من الحب، إنك لما بيعجبك شخص بتحبي فيه حاجات معينة ممكن شكله أو طريقة كلامه، ذكاؤه أو طموحه.... والحاجات اللي بتعجبك دي بتقربك له بس بعد شوية لو تبين ليكي عيوب خطيرة في شخصيته بتبعدي على طول، لكن الحب زي الصداقة وصلة الرحم بيفرض أن تتقبلي الشخص زي ما هو، بدون ما تحاولي تغيريه؛ لأن الحب ده بتاع ربنا، بيزرعه في قلب البشر وبيكون من الصعب إن حاجة تغيره.
أنا شايفة إنك كنت معجبة بس بصاحب أخوكي؛ لأنك لو حبتيه كنت هتستحملي عيوبه بدون ما تحاولي تغيريه أو تزهقي منه، طيب لو فرضنا إنك معجبة بيه جدا وهو فيه صفات كتير حلوة يا ترى إيه هي الصفات دي؟ عاوزاكي تقعدي تفتكريها بينك وبين نفسك. ولو هو خجول أو مابيقدرش يعبّر عن مشاعره يا ترى تقدري تغيري ده ولا لأ؟ ولازم تبقى فاهمة إن ربنا لا يغير ما بقوم حتى يغيروا ما بأنفسهم. فهل هو حاسس إن عنده مشكلة وعاوز يتغير؟
بتقولي مش عارفة تعامليه إزاي لما ترجعوا تتقابلوا في المعهد، لما تحسمي الموضوع مع نفسك وتجاوبي على الأسئلة دي بوضوح هتعرفي لو عاوزة تفضلي معاه أو لأ؟ لو اخترتي تفضلي متعلقة بيه يبقى أنا شايفة إنك مش محتاجة لكلام وبس، إنتي محتاجة فعل كمان يعني يتكلم مع أخوكي ويتقدم لك بشكل رسمي؛ لأن الحب مش كلام.
ولو حسيتي إنه كان مجرد إعجاب وراح يبقى خلاص لما تشوفيه في المعهد عامليه كصديق أو كأخ ولو حاول يتكلم معاكي في الموضوع كلميه بصراحة وقولي له إنك مش حاسة بأي مشاعر حقيقية ناحيته ويا ريت تفضلوا أصدقاء وإخوات وربنا يوفقك.