منة شلبي: نفسي أبطّل خوف من بكره

لما بقعد معاها بحس إني قاعدة قدام المراية، مش لأنها شبهي في الشكل لكن لأنها شبهي أنا وكل بنات جيلي في الأحلام والطباع والتفكير، شقاوتها سر نجاحها وحب الناس ليها سببه تلقائيتها، و انت قاعد معاها لازم هتحس إن اللي في قلبها على لسانها وطيبتها باينة عليها قوي، طبعا بنتكلم عن النجمة الجميلة "منة شلبي".
معروف إنك عصبية جدًا...العصبية دي خسرتك إيه؟
"أنا عصبية على نفسي.. يعني لما بكون متضايقة بضغط على أعصابي..وفي الغالب بيكون من ضغط الشغل.. ولما بكون بشتغل بكون قلقانة جدًا.. خاصة لو حسيت إن الشغل مش زي ما أنا عايزة.. أو لما أكون مش نايمة كويس لأني بحب النوم جدًا.. والعصبية دي أثرت بشكل سلبي على صحتي".
إزاي قدرتي تتحكمي في اندفاعك الزائد؟
"أنا كنت مندفعة جدًا و أنا صغيرة، بس بدأت أعود نفسي أفكر للحظات قبل ما أعمل حاجة جت على بالي..لكن المشكلة إني لحد النهارده.. ساعات كتير بتكلم قبل ما أفكر وده بيعرضني لمواقف محرجة أحيانًا".
الشهرة غيرت فيكي إيه؟
"أنا بقاتل كل يوم عشان ما أتغيرش..والحمد لله سبحانه وتعالى قدرت أحقق ده.. وأقول إن الشهرة ما قدرتش تغير فيا أي حاجة..والدليل إن أصحابي من أيام المدرسة من 12 سنة لسه أصحابي.. والناس اللي عرفتهم لما بدأت تمثيل ما اتغيروش".
إزاي بتاخدي قراراتك ؟
"أنا مش باخد قرارات..خاصة لما تكون متعلقة بالشغل.. و بحب جدًا آخد رأي اللي حواليا في كل حاجة..و أحيانا هم بيقولوا لي رأي و أنا أعمل حاجة تانية خالص! .. و في مرة ندمت على قرار أخدته وكل الناس نصحتني إني أبعد عنه بس أنا ما سمعتش كلامهم".
إنتي عندية؟
"جدًا ودي أكتر صفة ورثتها من بابا..رغم إني ورثت منه صفات كتيرة.. بس دي بالذات ورثاها بذمة أوي.. والعند أحيانًا بيكون مفيد لما بيتحول لإصرار على الحاجة الصح والهدف المهم".
إمتى اتعرضتي للظلم ؟
"أحيانًا بتعرض له في حياتي.. وبشعر بيه لما أكون مش قادرة آخد حقي..والحق ده مش لازم يكون مادي..لكن ممكن أكون مخلصة جدًا مع حد.. وهو مش مقدر كده!!.. فأحس إنه بيظلمني!".
بتعرفي تاخدي حقك من حد جرحك ؟
"مش بجرحه عشان آخد حقي.. لكن بمحيه تمامًا من حياتي.. وعلي الرغم من إني الحمد لله بقدر أعمل كده كويس جدًا.. إلا إني أحيانًا بتضايق.. لأن فيه ناس عملت معاهم كده.. وما كنتش أحب إن الأمور بيني وبينهم توصل لكده.. لكن هم اللي وصلوها".
اتجرحتي كتير في الحب؟
"لا الحمد لله..لكن أكيد كل ما بعيش الحب ومش بنجح فيه بتعلم حاجة جديدة.. وبيكون عندي خبرة إني ما أدخلش في علاقة حب مثلا مع شخص به صفات معينة.. لكن لا أستطيع بسبب شخص أن أمحي الحب من حياتي.. لان الحب بيكون في تكوين الإنسان.. ودي حاجة صعب إني أمحيها".
إيه أكتر صفة بتكرهيها في الراجل ؟
"ما بحبش الراجل الخاين..ولا حتى إنه يكون صديق ليا".
اتعرضتي للخيانة قبل كده ؟
"طبعًا..وكانت من أصدقاء قريبين مني، و اتضايقت جدًا لأني ما كنتش متوقعة منهم كده!".
لما تكوني متضايقة بتبكي قدام مين ؟
"قدام أمي و أصدقائي القريبين..على فكرة أنا دمعتي قريبة جدًا".
و إيه أكتر حاجة بتخافي منها؟
"بخاف جدًا من المرض والفقر ومن بكره"
وليه بتخافي من بكره ؟
"لأن النجاح بيخوف من بكره..وخاصة لما ألاقي نجوم كبار جدًا حصل لهم انحدار مفاجئ.. بدون أي سبب.. ده بيرعبني".
بتعاني من الوحدة؟
"كنت بعاني منها وأنا صغيرة..لأني اتربيت لوحدي من غير إخوات.. لأني وحيدة أمي.. وعلي الرغم من إن عندي إخوات من بابا.. لكنهم مش عايشين معايا.. و لما كبرت قدرت أكون صداقات كتيرة.. والشغل لخمني وخلاني أبطل أحس بالوحدة".
إيه أكتر حلم نفسك يتحقق بسرعة جدًا؟
"إن وجود اسمي على أي فيلم.. يضمن إنه فيلم محترم جدًا وجودته عالية".
وحلم نفسك تحققيه على المدى البعيد ؟
"إني أكوّن أسرة مستقرة.. رغم إني ماعنديش هاجس الجواز دلوقتي.. و أنا عندي عقدة وخوف من إن الواحدة المتزوجة فجأة تبقى مطلقة!.. لأني جربت أعيش في أسرة فيها طلاق.. بابا و ماما انفصلوا و أنا صغيرة.. ورغم إنهم حاولوا يعملوا كل حاجة تخلي الموضوع ما يأثرش عليا..إلا إنه رغم كل شيء مناخ غير صحي لأي طفل".
إيه أول حاجة بتيجي على بالك أول ما بتصحي من النوم؟
"ربنا سبحانه وتعالى.. مش عارفة ليه!.. بس يمكن لأني بكون مبسوطة إنه سبحانه عيشني يوم جديد".
بتحسي إنك مقصرة في حق ربنا سبحانه وتعالى ؟
"جدًا..مش عارفة ليه؟.. بس أبسط مثل على ده.. إن بابا وماما مهما عملت لهم مش هقدر أوفيهم اللي عملوه معايا.. فما بالك بربنا سبحانه وتعالى اللي إداني حاجات أكتر بكتير من أهلي.. أكيد طبعًا ومهما عملت.. هحس إني مقصرة في حقه سبحانه وتعالى.. و إني بكسل عن حقوقه عليا".
والدتك ضحت بشغلها وشهرتها عشانك.. إزاي بتوضحي لها إنك مقدرة ده ؟
"ماما عملت حاجة صعبة أوي.. أنا لحد النهارده مش عارفة هي عملتها إزاي!.. لأنها كانت ناجحة ومشهورة وعاملة حاجة صعبة جدًا..ومع ذلك.. قدرت تضحي بكل ده عشان تربيني وتهتم بيا.. وبحاول دايمًا أبين لها إني مقدرة.. بإني أكون مطيعة أد ما أقدر..علي الرغم من اختلاف التفكير طبعًا والسن والطباع اللي بيخلوني مش قادرة أرضيها 100%".
إيه أكتر حاجة بتكرهيها في نفسك ؟
"بكره في نفسي الكسل، أنا كسلانة جدًا لدرجة إني لما بكون فاضية ومش عندي شغل.. نص اليوم بكون نايمة..ونفسي أبقى نشيطة بجد ".
و أكتر حاجة بتحبيها في نفسك؟
"إني بحترم نفسي وأهلي و أصدقائي".
لما عملتي حادثة بالعربية من كام شهر، إيه أكتر حاجة جت في بالك أول ما فوقتي من الحادثة؟
"إن ربنا سبحانه وتعالى عايز يوصل لي رسالة معينة.. وعايز يقول لي حاجة".
مقتنعة إن الحب ما فيهوش كرامة؟
" الكلام ده غلط طبعًا..لأن أساس أي علاقة هو الاحترام..ومن المستحيل أقدر أعيش مع حد مش بيحترمني أو أستمر معاه في علاقة..وأنا عموما مش بقدر أسامح حد جرح كرامتي.. حتى لو كانت علاقتنا مجرد صداقة".
إمتى بتحسي بالإحباط؟
"كتير.. آخرها من كام يوم كده.. وساعات بيجي من غير سبب.. بس أنا مش بخليه يتملك مني".
جالك اكتئاب قبل كده ؟
"آه..أكتر من مرة.. و أطول مرة كانت مدتها أسبوعين.. و أنا عادة بخرج منه بإني أعمل "شوبنج" أو أسافر".
بتعرفي تحوشي؟
"خالص..أنا إيدي مخرومة!.. وده غلط.. بس بدأت مؤخرًا وتحديدًا بعد حادثة العربية.. أحاول أشيل جزء من دخلي على جنب للزمن".
الإشاعات بتأثر فيكي إزاي؟.
"ولا حاجة..بمعني كلمة ولا حاجة.. زمان كنت بقعد أعيط بالساعات لما أقرأ إشاعة.. بس دلوقتي بقيت أضحك".
كنتي شقية في المدرسة؟
" كنت بمثل إني طفلة هادية و أنا مش هادية خالص.. بس مجرد إدعاء الهدوء.. و أنا فاكرة إن عمري ما اتضربت في المدرسة".
بتحبي القراءة؟
"بدأت أحبها من 3 سنين بس.. وأهتم إني أروح المكتبات وأشتري كتب..وأكتر كتب بحب أقرأها هي الروايات".
بتحبي على أغاني مين؟
"لما بحب..بحب على أغاني "وردة" و "فيروز" و "شيرين"".
بتبقي غيورة في الحب؟
"جدًا..مش عارفة ليه!.. بس أنا غيورة أوي".
نشر شهر 11 من مجلة كلمتنا سنة 2008