مشاكل واقعية من واقع الحياة شاركونا في حلها بعد الخطيئه اريده ولو بدون زواج ماذا افعل ؟ أنا بنوتة عندي 19 سنة من زمان أوي كان نفسي يكون لي قصة حب زي روميو وجوليت وحاجات كده.. كنت باكلّم أولاد كثير كأصحاب كان عندي حوالي 11 سنة والناس بقت تتكلم عليّ وعلى لبسي؛ لأني ساكنة في منطقة شعبية بس أنا ماكنتش باهتمّ، ولما بقى عندي 13 سنة عرفت ولد من المصيف، وقعدنا مع بعض 4 سنين، 3 حب والأخيرة كانت كلها خلافات على اللبس والحجاب وأنا كنت شايفة إني لسة صغيرة، وكنت أعرف أهله كلهم، وكلهم كانوا بيحبوني وكنت باروح عندهم البيت.. حصل بيننا قبل كده إنه كان بيبوسني ويحضنني وتطوّرت علاقتنا بس مش لآخر درجة يعني، ولما بقى بينا الخلافات اتفقنا يخطبني وبعد ما كلمت أهلي اختلفنا تاني فخطب صاحبة واحدة صاحبتي. بعدين قعدت أنا وولد تاني وبقينا أصحاب أوي؛ أنا حكيت له على اللي كنت بحبه وهو حكى لي على البنت اللي كان بيحبها وبدأ يقول لي "بحبك"، كنت عارفة إنه بيكدب فقلت مش هو بيتسلى أتسلى أنا كمان، بقينا نخرج ونتكلم ويقول لي "بحبك" أقوله "وأنا كمان"، وأنا مش حاسة بحاجة لحد ما بجد حبيته أوي. المشكلة بقى هو فهّمني إنه عارف إن ده سني وأما أكبر هاتغير، لكن علاقتنا اتطورت جدا ووصلت للمعاشرة الجنسية، بس هو كان عارف إني عذراء، فكان واخد باله كويس ومافيش دم نزل، فأنا قلت إن أكيد عندي غشاء بكارة مطاطي، واستمرينا كده 3 سنين على هذا الوضع، وفي يوم رحت أكشف الدكتورة قالت لي إني مش عذراء فقلت لها إن ماكانش فيه دم فقالت لي إنتي بتشربي منبّهات قلت لها آه قالت لي دي بتقلل النسبة، وإن في وسط الشهوة ممكن ماناخدش بالنا من الموضوع ده.. فقلت له كلام الدكتورة فقال لي إنتي عارفة إني كنت واخد بالي كويس ومافيش حاجة حصلت، إنتي كده من قبل ما تعرفيني، وأنا هاشيل الموضوع وعارف إنه مايخصّنيش. أنا كنت باكدب عليه؛ عشان كان رافض إني أكلم زمايلي في الجامعة، وعرف إني باكلّمهم وباكدب، وخرجت مرة مع بنت خالتي من غير ما أقول له وقلت له في الجامعة وكانت الجامعة قافلة، وماصدقش إني مع بنت خالتي، ودي كانت آخر مشكلة بيننا. بعدنا شهرين وغصب عني ماقدرتش وكلمته بس كان كلّم بنت زميلته، بس قال لي إنه مش بيحبها ولسه بيحبني، إنما فيها كل المواصفات اللي كان عاوزها؛ هي محجبة وبتلبس كويس من نفسها وبتصلّي؛ لأنه بقى متدين، وبعد شهر قال لي إنه هيخطبها آخر الامتحانات.. وبعدها قال لي إنه سابها علشان ماقدرش يحبها وإنه ماحبّش حد غيري. لما أقول له أنا اتغيرت بقيت ألبس كويس واتحجّبت وعملت كل اللي أنت عاوزه، يقول لي إن الحاجات اللي حصلت بيننا وكنّا مصوّرينها أخته وبنت عمته شافوهم من غير ما يعرف، وقالوا لمامته وهي قالت له لما كلمها في ارتباطنا "على جثتي تاخد البنت دي"، وأهله كلهم عرفوا إن كان بينا علاقة. أنا بحبه جدا وهو بيحبني ومش عارفين نعمل إيه؟ وأنا كده مش عذراء منه ومش عارفة أتصرف إزاي؟؟ وإن وافقت إننا نفضل نتكلم حتى لو مش هنتجوز بس؛ لأني بحبه ومش قادرة أبعد عنه ومتأكدة من حبه.. عاوزة رأيكم أعمل إيه؟ أنا في عذاب أنا تايهة أرجوكم ساعدوني.
