رجل يحبني..والآخر أحبه..هل تحول الأمر لظاهرة؟

أصبح الرجل أكثر اهتماما بالعمل لتوفير المال وانشغالا عن حبيبته أو خطيبته أو زوجته لدرجة قد تجعلها عرضة للتأثر بكلمات الاعجاب من الآخرين..
وحول هذا الأمر استطلعت بوابة أخبار اليوم بعض الآراء..
قالت "مريم" أكيد لو خطيبي كان مكفيني مكنتش أكلم غيره من وراه، واللي أنا مرتبطة بيه متجوز وبردو مش مرتاح مع مراته واحنا عارفين إن ارتباطنا ده هينتهي بمجرد جوازي وهو ارتباط محترم كل اللي فيه اهتمام بيهتم بيا بيجبلي هدايا بيخرجني بيغير عليا، و خطيبي كل هدفه إزاي يجمع فلوس وبينساني أصلا.
و علقت "هدي" أنا مبحبش التعقيدات وبعدين يعني حبيبي مش بيهتم بيا بحجة الشغل و إن مافيش وقت، و أكيد هو بيهتم ببنات غيري، و أنا ببقى حاسة وساكتة، يبقى أنا كمان من حقي إني ألاقي حد تاني يعاملني بطريقة حلوة، والسبب اللي مخليني ساكته إني بحب حبيبي برغم عدم اهتمامه بيا.
و تقول "نشوى" بصراحة أنا عارفة إن ده غلط، لكن للأسف أنا غصب عني بلاقي نفسي كل فترة في علاقة جديدة ودايما تكون مع راجل متجوز، أنا خطوبتي بقالها سنتين بس مش بلاقي فيها تجديد ومش بيفرق معاه يشوفني ولا لا، مافيش رومانسية علاقة جافة، آه بحب خطيبي بس مش بلاقي نفسي معاه.
و يرى "أمجد" أن الفتيات من هذا النوع مريضات نفسيا لأن الراجل بيتعب عشان يوفر الفلوس اللي يتجوز بيها أو يصرف بيها على بيته ومراته، و في نفس الوقت ده تعبير عن الحب، يمكن الراجل بيقصر لما ينسى يحب مراته بالكلام و التدليل و الهدايا حتى لو بسيطة لكن ده مش معناه إنها تنسى تراعي ربنا فيه.