الختام مسك بكلمة من القلب للمصريين وكل العالم

السيسي: أعرف مشاكل مصر وطرق حلها .. ونحتاج بين 200 إلي 300 مليار دولار لبناء البلد لن ننسي أبداً كل من وقف بجانبنا.. ولابد أن نعمل بأضعاف طاقتنا

بكلمات تلقائية ومن خطاب ارتجالي غير مكتوب وجه الرئيس عبدالفتاح السيسي كلمة من القلب إلي الشعب المصري وكل العالم في آخر أيام المؤتمر الاقتصادي أمس في شرم الشيخ،وحرص فيها علي توجيه الشكر لمن شارك في المؤتمر علي جميع المستويات، وقال: لا تعرفوا إزاي فرحتوا الشعب المصري، وأكد أن مصر لم ولن تموت وأنها استيقظت وقال: ربنا خلقها لكي تعيش. وكما علمت كل العالم في تاريخها القديم ستفعل ذلك مرة أخري.
وشدد الرئيس السيسي علي أن مصر لن تنسي أبدا كل من وقف بجانبها. مشيرا إلي أنه يعرف كل مشاكل مصر وطرق حلها، وأوضح في نفس السياق أن حل هذه المشاكل يحتاج بين 200 إلي 300 مليار دولار لكي يتم بناء البلد ويعيش كل مصري في ظروف جيدة، ودعا المصريين إلي مضاعفة العمل. وقال: «حب البلد مش بالكلام ونريد العمل بقدر ما نعمل مئات وآلاف المرات».
وكان الرئيس عبدالفتاح السيسي قد أشار في بداية كلمته إلي انه قد تم تحضير كلمته مكتوبة له لإلقائها في هذه الجلسة، وقال: بس أنا مش هأقولها، أنا هقول كلمة من عندي، وارتجل الرئيس كلمته لتخرج بتلقائية من قلبه لتدخل بمصداقيته وقبوله إلي كل الحاضرين الذين تجاوبوا معه فيها.
تحيا مصر
وبدأ السيسي كلمته قائلا: «أرحب بكم جميعاً وشكراً جزيلا علي الحضور والوجود معانا هنا .. وأضاف: «أنا عايز في البداية أكلمكم عن بلادي مصر .. اللي كانوا فاكرين انها ماتت .. ولكن لا .. مصر دي بلد ربنا خلقها علشان تعيش منذ 7 آلاف سنة ومصر موجودة وعلمت الدنيا كلها وقدمت الحضارة للعالم لكه وده مكتوب في كتب التاريخ وبيدرس في كل دول العالم ..ومنذ 150 سنة بس كان فيه بعثة من دولة عظيمة جداً جت مصر علشان تشوف تجربتها والدولة دي هي اليابان ..والبعثة جت مصر علشان تشوفنا إحنا مين وإحنا إزاي .. وفي عام 1962 جاءت دولة تانية لمصر علشان تشوفها وتتعلم من تجربتها وهي دولة كوريا الجنوبية .. وأنا مش هتكلم ليه مصر مكملتش بنفس القوة اللي هما كملوا بيها .
وأضاف السيسي قائلا: « أنا بفكر نفسي وكل المصريين والعالم كله وبقول: « الدولة دي تستيقظ الآن .. وهتف الحاضرون في الجلسة ورددوا هتافات « تحيا مصر .. تحيا مصر .. تحيا مصر» . وعندما ردد البعض يحيا السيسي رد عليه الرئيس قائلا : تحيا مصر محدش تاني مضيفا : تحيا مصر بشعبها وشبابها اللي هما حوالي 35 مليون نسمة .
وأشار السيسي إلي أن مصر فيها من عمر يوم الي 40 سنة حوالي من 65 الي 70 مليون مواطن .. وقال السيسي إن مصر هي اللي علمت الدنيا وإن شاء الله هتعمل ده مرة تانية .. وأكد السيسي أن مصر لن تموت وصحيت وهتصحي أكتر من كده .. مؤكداً أن عامل الوقت مهم جداً للمصريين خلال الفترة المقبلة . واستطرد السيسي كلمته قائلا : أنا كنت بتكلم مع رئيس الشركة التي ستقوم بتنفيذ المرحلة الأولي من العاصمة الجديدة وكان يقول لي إن تنفيذها سيأخذ وقتاً حوالي 10 سنوات .. فرديت عليه وقلت له : مش هينفع اللي بتقوله ده .. 10 سنين نكون زاد تعداد السكان في مصر حوالي 26 مليون مواطن والعاصمة الجديدة هتاخذ أصلا حوالي من 5 الي 6 ملايين مواطن فمش هينفع الوقت ده في التنفيذ ، لافتا الي أن الوقت حاسم لينا كلنا كمصريين علشان كده كلامي بيبقي مع كل المسئولين والشركات والوزراء أننا مستعجلين جداً لأننا متأخرين ومحتاجين نتحرك بسرعة أكتر من كده بكتير . وأضاف السيسي أنه كان يتحدث مع رئيس شركة سيمنس الالمانية لأنهم هيعملوا محطة توليد كهرباء في مصر بطاقة 4 آلاف ميجا وات خلال فترة من 30 الي 36 شهرا تقريبا أي حوالي عامين ونصف العام تقريباً وقال الرئيس إنه رد علي رئيس الشركة: مش ممكن تبقي مدة التنفيذ دي حوالي سنة ونصف بس وبنفس الجودة .. فرد عليه رئيس الشركة : نعم ممكن .
أقل هامش ربح
وطالب السيسي رئيس الشركة بالعمل ليلا ونهارا في المشروع لكي نسهم في بناء البلد فضلا عن ضرورة مراعاة التكلفة المالية، وقال: «أقول لنفسي وكل مسئول اوعي تتصور انك تعمل مشروع متقدرش تحصر تكلفته المالية» .. وأوضح السيسي أنه طالب الشركات بتقليل هامش الربح لأن مصر تحتاج ذلك الآن، قائلا: «قلت لرئيس الشركة ياريت التكلفة المالية تراعوا فيها مصر شوية .. فلما طرحوا الرقم الاجمالي قلت له ممكن تخفض التكلفة شوية .. إحنا عايزين نبني بلدنا وندي أمل للناس ونعمل كل المشروعات المطلوبة .. وأضاف السيسي : والحمد لله أدوني في الاخر رقم هايل للتنفيذ .. فرد عليًّ وزير الكهرباء قالي مش ممكن الرقم كويس جداً .. أنا هجيب كل الشركات عندك .. وابتسم الحاضرون في الجلسة .. ورد الرئيس السيسي: دول عملوا خاطر لمصر مش لأي حد تاني وأنا بشكرهم عليه جداً ولازم إحنا كمان نشكرهم ، وأضاف قائلا : وقلت لهم ممكن المحطة تبقي تلاتة فاستجابوا، نحن نتحدث عن 13 ألفا و200 ميجا وات كهرباء من شركة واحدة، لأن مينفعش الشعب المصري يفضل علي طول كده عنده أزمة في الكهرباء وعلشان كمان المستثمر اللي ييجي مصر يلاقي طاقة يعمل بيها مشروعاته . وتحدث السيسي أيضا عن لقائه مع رئيس شركة جنرال اليكتريك وقال: رئيس الشركة قال لي سأرفع كفاءة المحطات الموجودة في حوالي 24 شهرا الي 30 شهراً مما يساعد علي زيادة الكمية المستخرجة من الكهرباء حوالي 750 ميجا وات .. وقال السيسي إنه طلب منه بأن تكون مدة التنفيذ 8 شهور فقط فرد عليه: ممكن ياريس .. بس كده إحنا مش هنام فرد عليه السيسي: معلش علشان خاطري . وأضاف السيسي أنه عندما تحدث مع رئيس الشركة حول التكلفة المالية .. خاطبه قائلا: «علشان خاطر ربنا قللوا التكلفة المالية، شيلوا الميت مليون دول وشالوهم بالفعل» .. فقام الحضور بالتصفيق للرئيس السيسي وطالب الرئيس الحضور بالتصفيق للشركات . مشيرا إلي أن شركة سيمنس حصلت علي تمويل تنفيذ المحطات من الحكومة الالمانية بقيمة 6 مليارات يورو للتنفيذ».
وقال: إن هذه المشروعات ممكن تقوم بها دول كثيرة مع مصر وتعطي التمويل الخاص لأي مشروعات لشركاتها ، وأضاف أنه يقوم بذلك علشان ده حقوق ناس لأن اللي بيقف جنب مصر مش هننسي أبداً « مشيرا الي أنه عندما تحدث مع الشركات عن فترة السماح الخاصة بتمويل تلك المشروعات كانت 7 سنوات فطلب السيسي بأن تكون 12 سنة فقال له رؤساء الشركات اشمعني دي اللي بتزود فيها .. مما جعل الحاضرين يبتسمون ويصفقون للرئيس. وأكد السيسي أن مصر تحتاج ما بين 200 إلي 300 مليار دولار لكي تبني ويعيش مواطنوها في ظروف معيشية جيدة.
وقال إنه يعلم مشاكل مصر جيداً وطرق حلها كما يري الحاضرين في الجلسة علشان يكون فيه أمل حقيقي لحوالي 90 مليون نسمة عايشين في مصر ويعيشوا بجد ويشتغلوا بجد.. قائلا: «أنا عارف مصر ومشاكلها زي مانا شايفكم الآن». وأضاف السيسي قائلا: « لسه إن شاء الله .. لسه .. علشان كده لازم الدول المتقدمة خاصة الاوروبية والصين وأمريكا وغيرها تسهم بالطريقة دي في إقامة مشروعات في مصر وتمول الشركات الوطنية الخاصة بها لإقامة تلك المشروعات.
الالتزامات
وشدد السيسي علي أن مصر لديها التزام وكل المصريين بالسداد وهذا أمر لايقبل الشك .. ولفت الي انه تلقي دعوة من المستشارة الالمانية انجيلا ميركل لزيارة برلين، ووجه الشكر لالمانيا علي وقوفها بجانب مصر مشيرا الي أنه بصفة شخصية يقدر دولة ألمانيا ويقدر كفاحها وقدرتها وانضباطها وتطورها. وأشار للرئيس إلي انه تم البدء في مشاريع الاسماعيلية الجديدة ورفح الجديدة ومدينة العلمين موضحا اننا نريد انشاء محافظات جديدة مع البدء في تنفيذ مشروع المليون فدان.
وفي نهاية الكلمة وجه السيسي الشكر لكل من حضر المؤتمر سواء ملوكا أو رؤساء أو مسئولين او شركات ولكل من أناب مسئولين للحضور وساهم في نجاح هذا المؤتمر قائلا: «انتو متعرفوش فرحتوا الشعب المصري ازاي لأن المصريين كانوا متابعين المؤتمر ده لحظة بلحظة» وقال الرئيس ان المصريين لما حبوا يغيروا في 25 يناير .. غيروا .. ولما حبوا يغيروا في 30 يونيو برضه غيروا ومحدش كان متصور ده يحصل أو أنهم يقدروا .. ولكن قالوا لا .. لا . وأضاف السيسي قائلا : وعلشان أكون منصفا وصادقا مع نفسي ولو المصريين عايزين يغيروا تاني هيغيروا برضه .. فابتسم الحاضرون وصفقوا للرئيس السيسي ورد عليهم قائلا : والله لايمكن أستني أبداً أن ده يحصل أبداً « مضيفاً : الشعب المصري العظيم اللي انا بحترمه وبحبه وبخاف عليه .. حب البلد مش بالكلام .. إحنا عايزين نحب بلدنا ونخليها قد الدنيا ، واقول للمصريين الناس جت من كل مكان علشانكم ورد الفعل والاستعداد للتعاون مع مصر كانت رسالة للدنيا كلها ولكم انتم فنريد ان نعمل معهم ومع بعضنا البعض قدر ما نفعله مئات وآلاف المرات .
واختتم السيسي كلمته قائلا: «المؤتمر الاقتصادي أنا قلت قبل كده إن هو دراع مصر ولازم الجسم كله يشتغل ويتحرك معه بقوة ومحدش أبداً يستهتر بقوة مصر وحجمها .. وقدم الشكر باسمه وباسم مصر لكل الذين حضروا المؤتمر».