بص العصفورة

ليست القضية في رأيي ان نائبا قد »انحرف«، وخد له رزمة بواكي من أم متين جنيه علي قفا مواطن غلبان كان طالب علاج.. فده منه كتير، ومعروف.. ان فيه »سرقة« بتم سواء في فلوس »العلاج« أو في آخدان حتة أرض علي المية أو مقابل تأشيرة من وزير »بتعيين« مواطن، وغيرها من »السبابيب« اللي بيعتبرها كام عضو في المجلس مكافأة خدمة اضافية لزوم تغميض العين علي اللي بيحصل في المجلس، وطبعا »حتتحمق« وحتقول لي ياسلام.. هي سرقة فلوس البلد مش مهمة.. أمال يبقي ايه المهم.. المهم يا أستاذ، والأخطر من ده.. انك تعرف، وتقرا.. أن القوانين اللي بيطلعها المجلس ملعوب فيها، ومتظبطة.. ومتأيفة لصالح »فئة« دون غيرها من الميت ألف فئة اللي هما المواطنين.. ده يا فالح الأهم والأخطر، وهو ده اللي المفروض ان المجلس وأعضاؤه يردوا عليه مش يعملوا نفسهم مش واخدين بالهم.. وقاعدين يزيدوا ويعيدوا لنا في انهم مسكوا لنا كام حرامي غسيل سارقين غيارين من غير استك علشان »يفسحونا« ويغلوشوا علي اللي بيحصل جوه المجلس علي طريقة: »بص العصفورة«، وحتسألني.. وأنت »جبت« الكلام ده منين؟.. ح أقول لك.. ما هو انت لو كنت بتقرا ماكنتش سألت.. فمن يومين ياللي مابتقراش.. أدلت النائبة القديرة جورجيت قليني بحديث إلي احدي الصحف، وبصراحتها المعهودة المحسوبة لها مننا وعليها من جانب آخرين.. طلبت فيه بضرورة عرض كل القوانين علي مجلس الدولة قبل ما تروح مجلس الشعب.. ليه.. لأنه أكيد مجلس الدولة ليس له مصلحة مع أحد، وبيشتغل بما يرضي الله وبيعمل الصح.. كلام واضح بس متغطي، والحدق يفهم، وما قالتش الكلمتين دول وسكتت لأ ده علشان نفهم قالت في موضع آخر وهي النائبة التي أمضت 01 سنوات كاملة داخل المجلس وفي مطبخه وصالونه ان »كفة« القوانين التي تصدر عن المجلس تميل في اتجاه مصالح »فئة« ومتأثرة بفكر الحكومة ورغباتها.. بما يعني صراحة.. ان مجلس الشعب.. بقي علينا مش معانا!! بذمتك انهي أهم.. سرقة غسيل، ولا قوانين تشحتك علشان ناس تانية تهيص.. ها شفت العصفورة ولا لسه.