صخر الفلسطيني‏:‏ أرجوكم حافظوا علي مصر

الاسم صخر والجنسية فلسطيني والهوي مصري أكثر منكم يامصريين دا كان الرد عندما قابلناه في ميدان التحرير حاملا لافتة كتب عليها
أنا فلسطيني وبحب مصر‏..‏ أرجوكم حافظوا عليها
فضولنا زاد أكثر وسألناه تقصد ايه بالضبط؟ أجاب أقصد اللي أنا كاتبه أنا بحب البلد دي زي أولادها وأكثر وعلي فكرة مش أنا لوحدي كده معظم الفلسطينيين بيحبوا مصر بشكل غريب لدرجة أن والدتي أيام‏25‏ يناير كانت خايفة علي مصر وكانت بتصلي وتدعي ليها ويوم ماشافت فرحة المصريين بنجاح ثورتهم يوم‏11‏ فبراير في التليفزيون زغردت ووزعت الحلوي علي الأهل والجيران‏.‏
سألته عايزة أعرف تقصد ايه باللافتة دي والمكتوب فيها؟ قال أنا موجود في مصر من فترة قصيرة يعني لسه مكونتش فكرة كاملة عن اللي بيحصل من قريب لكني شايف المصريين منقسمين في أكثر من طريق وأكثر من حاجة ورغم اني مؤمن بأن الخلاف شيء صحي لكني حاسس بالخطر وملقيتش حاجة أحذر بيها المصريين غير باللي بعمله ده وعلي فكرة أنا مش مقتصر علي ميدان التحرير أنا كمان بروح العباسية يعني أنا لا مع دول ولا دول ولا غيرهم أنا مع اللي قلته بس بحب مصر وعايزها تحقق اللي بيتمناه أولادها لكن خايف عليها من انقسامهم‏.‏