إزاي نحب مصر؟؟؟

من زمان بنسمع بحب مصر
يعني إيه كلمة بحب مصر؟
إزاي وإنت شايفها بتتعصر عصر؟
في التاريخ الغزاه حبوا مصر
الهكسوس كانوا بيحبوا مصر
والفرنجه والتتار قالوا بيحبوا مصر
نابليون والانجليز برضو حبوا مصر
حب مصر موش بس كلمه
من جبان أو خسيس طمعان في قطمه
أو ضعيف غلبان مستني رحمه
حب مصر فرض يتقدم بذمه
على كل مصري يخدم بهمه
موش صوت انتخابي تقابله هدمه
أو حتى يوصل لكيلو لحمه
المصري عمره ما كان جبان
وطول عمره وقت الشده بيبان
في الحروب بيسموه فارس الفرسان
وفي زمانا يقف يشحت الإحسان
ليه رضيت على نفسك تتسمى غلبان
ويشرب الفاسد من دمك بالفنجان
ورصيده من خير بلدك مليان
ظلمك وسكت واللي كان كان
يعني هتسيبوا يظلم في ولادك؟
واحفادوا يستعبدوا في أحفادك؟
ويكملوا بيع في أرض بلادك؟
عرض ابوك وتراث أجدادك!
إصحى دي كلاب عاملين أسيادك
ياما جوعوك وسودو أيامك
وأخرها موش لاقي القوت لعيالك
موش عايز تتكلم خايف على أملاكك؟
قوم ده الحل موجود قدامك
كلمة حق عليها في الآخره حسابك
بحب مصر موش ده برضو كلامك؟