عسلية» حفيد «شعبولا» أصغر مطرب شعبي في مصر

أنا يوسف عسلية ..عسكري في الدخلية ..بضرب سلام للباشا وبضرب سلام للبيه ..وبقول لبوش مبروك عليك الجزمتين .. ناقصلك شبشبين وتبقي جزامة بدورين .. أييييه .. يوسف عسلية حفيد شعبان عبد الرحيم لايخشي الغناء أمام جمهور كبير بالرغم من أن عمره لا يتعدي ال 8 سنوات .. علي رأي المثل ابن الوز عوام وابن بنت شعبان عبد الرحيم بيعرف يغني كمان واييييه...
عندك كام سنة ؟
أنا عندي 8 سنين
بتروح مدرسة ؟
طبعا أنا في سنة تالتة أبتدائي وبحب المدرسة قوي وبحب أغني بس أنا بحب المدرسة أكتر من الغناء !
ليه بتغني ؟ مش أنت صغير شوية ؟
أنا عايز أغني زي جدي وهو الي علمني الغناء وأنا عايز أغني وببقي مبسوط لأني بفرح بالناس لما بتسمعني وبيطلبوني وبيبقوا مش عايزني أخلص وبيمسكوا فيا عشان أغني أكتر . وبيحبوا يتصوروا معايا
غنيت مع شعبان ؟
أه كنا في فرح وهو قدمني للناس وغنيت والناس كانت فرحانه وانا كنت خايف شويه بس دلوقتي خلاص مش بخاف من الجمهور
من امتي وانت بتغني ؟
أنا بقالي سنتين بغني من وأنا عندي ست سنين .
لما تكبر عايز تبقي زي مين من المطربين ؟
أنا مش عايز أبقي زي حد أنا عايز أبقي زي نفسي وعشان كده بغني أغاني شعبان وبغني أغاني بتاعت مطربين تانيين وليا أغاني بتاعتي لوحدي .
عندك وكيل أعمال بيرتب شغلك ؟
طبعا أبويا هو وكيل أعمالي وكمان عم وحيد وكيل أعمالي أنا وجدي
مين الجمهور اللي بتحب تغنيله ؟
انا بحب جمهور اسكندرية لانهم بيحبوا الاغاني الشعبي وبيحبوني ودايما بيطلبوني في الافراح بتاعتهم .
ما تعرضش عليك تمثل ؟
جالي شغل كتير قوي تمثيل وجالي اعلان للشاي مع شركة سعودية مع سعد الصغير والقزم محمد عيد اللي بيمثل في برنامج أديني عقلك لكن سعد الصغير رفض لاننا حنسرق منه الكاميرا وكنا حنعمله احنا بس .. لكن الشركة مردتش علينا لحد دلوقتي !
وعندي كمان شغل كتير مع شركات انتاج سعودي عشان اشتغل في برامج زي طاش ماطاش ..وكمان عندي شغل مع امل الطائر وهالة ستار
الفلوس اللي بتكسبها بتعمل بيها إيه ؟
باخد منها مصروفي وبصرف منها جزء علي البيت وبدفع قسط العربية .
انت عندك عربية ؟
ايوه عندي عربية بيجو 7 راكب وعندي سواق كمان .
عندك فرقة يا يوسف ؟
لا ماعنديش فرقة لسة لما اعمل الكرنيه .
كرنيه ايه ؟
كرنيه النقابة بتاع الموسيقيين والمطربين .انا انتخبت الاستاذ منير الوسيمي.
طب بتغني ازاي من غير فرقة ؟
عادي لما بلاقي نمرة بركب عليها !
يعني إيه ؟
يعني المتعهد بيتفق مع النمرة اللي قبلي تكمل معايا يعني باخد فرقتها .
والبروفات بتعملها فين ؟
بعملها عند أستاذ نوار البحيري وهو عنده الفرقة اللي بتدرب معاها .
الحقيقة يوسف جعلني أفكر يا تري الأفضل أنه يركز في دراسته فقط ولا الأفضل يظل كما هو علي اعتبار أن الغناء هواية كالرسم والرياضة والقراءة .وياتري عمل الاطفال بالفن خاضع لقواعد ولوائح محددة ولا بيمارس بشكل عشوائي ؟