بالصور من ميدان التحرير.. أطفال يتحدثون ل«صوت الأمة» عن مشاركتهم في المظاهرات

· محمد جمال 14 عاما: جاي عشان مصر ومش خايف من الأمن والبلطجية
· حسام حسن 4 سنوات: جيت أشارك عشان حسني مبارك ظالم
أمين أبوعقيل
وسط جموع المتظاهرين كان لافتا ذلك الحضور البرئ للأطفال وظاهرة التواجد الأسري فقد حرصت أسر علي التواجد بكامل أفرادها واصطحبت حتي الاطفال بل ظهر بعض الاطفال يقودون مسيرات بين المتظاهرين سواء الرافضة لمبارك أو المؤيدة له ليفرز لنا يوم 25 يناير «الطفل المتظاهر» صوت الأمة استمعت لبعضهم بعباراتهم البسيطة.
يقول أحمد جمعة 12 سنة أنا عنية متعورة من طوبة يوم الجمعة عشان أنا كنت قاعد ولقيت طوبة جت لي من الشرطة في عيني وجيت مع أبويا وقلت له أنا عايز أروح المظاهرة عشان أن مش عايز حسني مبارك لأنه وحشي وأنا مش خايف.
ويقول: حسام حسن 4 سنوات مش عايز حسني مرددا «مش عايزين حسني» عشان ظالم بينما يقول محمد جمال 14 سنة أنا هنا من 10 صباحا وجيت يوم 25 وأنا جاي عشان مصر ومش خايف من الأمن ولا البلطجية وكله فدا مصر.. أما «حسين أحمد» 12 عاما فقال: أنا جاي عشان مصر وأغير النظام وعشان كل حاجة غالية ونفسي الحاجة ترخص وربنا يستر علي بلدي لأني بحبها قوي.
أما همس عادل عبدالله 13 سنة فقالت أنا جايه عشان نمشي مبارك من البلد عشان مفيش شغل للشباب والاسعار غالية وفيه ناس غلابة كثير ومفيش تطورات في البلد كثير ومفيش تجديد أسلحة وعايزين نجدد من مصر وحاسين أنها هتضيع منا وعايزين نحافظ علي بلدنا ونحليها لينا ويارب الرئيس يمشي عشان نروح.
ويقول أحمد أنور 8 سنوات جيت عشان مصر ومش عايز الرئيس عشان وحش وكل حاجة غالية والناس قعدت في البيوت وأنا مش خايف عشان أنا خايف وقالت روان شريف 11 سنة أنا هنا في الميدان عشان مصر وعجبني قول «الشعب يريد اسقاط النظام» واحنا مش عايزين مبارك عشان هو مخلي الشعب متضايق وأنا مش خايفه وقالت شهد عادل 12 عاما أنا جايه عشان أمشي حسني من البلد والبلد كلها فوضي والفصول فيها عيال كثير والمنهج صعب والأبلة بتضربني، وأكد عمر أحمد 6 سنوات أنا هنا عشان مبارك يمشي وعشان مغلي الاسعار وبيعامل مصر مش كويس ومش مخلي لنا كرامة.. وقال زين طارق 10 سنوات أنا جايه عشان أعمل مظاهرة ضد مبارك وعشان مشاكل الناس والبوليس بيحبس الناس من غير أي سبب والمدرسين بيضربونا ومش بيعاملونا كويس وأنا هقعد مع المتظاهرين وقال نور الدين أسامة 7 سنوات انا جاي عشان أغير حسني مبارك عشان بابا قال لي كده وقال «أحمد الأمير 12 عاما جيت عشان حسني مبارك يمشي عشان هو بقاله 30 سنة في الحكم وخد فلوس الناس واحنا زهقنا وقال حسام الدين أسامة 13 سنة جاي عشان يسقط حسني وعشان بينهب في البلد والناس فقيرة وعشان نلغي قانون الطوارئ وعشان ناخد حق الشهداء اللي ماتوا.. أما إيمان هشام 12 سنة قالت جيت مع بابا عشان أقول يسقط حسني مبارك مع بابا عشان هو مش بيحل مشاكله ومغلي الاكل علينا.
وقال علي نبيل 6 سنوات جيت مع بابا التحرير عشان أقول مع الناس يسقط مبارك وبابا جابلي علم عشان أمسكه وأقول مع الناس.
ومن جانب آخر عبر بعض الاطفال المؤيدين للرئيس مبارك وقال: مازن محمد سعد 5 سنوات وكان يحمله والده علي اكتافه أنا خرجت مع بابا عشان أشيل العلم وأقول: «نعم لمبارك» عشان أنا بحبه وعايزه ميمشيش.
وقال محد عبدالناصر أمين 9 سنوات أنا مشاركتش في مظاهرات التحرير عشان كان فيه ناس بتموت ولما فيه واحد مات من شارعنا برصاص المجرمين نزلت عشان أؤيد مبارك عشان المشاكل تنتهي وترجع زي الاول ونلعب في الشارع براحتنا.
ومن ناحية أخري كانت مسيرة بها عدد لا بأس به من المتظاهرين المؤيدين لمبارك وكانت أسرة كاملة في المظاهرة مكونة من 5 أفراد بها طفلان حاملان علم مصر ولافتة مكتوب عليها نعم مصر نعم مبارك حيث أكد أحدهم نور عباس 6 سنوات نزلت مع بابا عشان أشجع مبارك أقوله ميسبناش عشان احنا بنحبه ومش هنلاقي واحد غيره يقي رئيس للبلد وكانت واقفه اخته روان 8 سنوات تردد بحب مصر وبحب مبارك وقالت نزلت مع بابا وماما عشان أمشي في المظاهرة وأقول لمبارك يفضل وميمشيش عشان احنا بنحبه.
وقال أدهم خالد حسن 6 سنوات أنا بحب بابا مبارك ونفسي ميزعلش من الناس الي عايزينه يمشي علشان هما مش عارفين حاجة خالص، أدم وليد 8 سنوات أنا بحب حسني مبارك علشان خلانا في أمان ونحن عرفنا ذلك بعد المظاهرات.