أكد أحمد المحمدي، الظهير الأيمن لفريق أستون فيلا الإنجليزي، أنه لا يمانع من الانضمام لصفوف منتخب مصر بدون المشاركة أساسيًا أو ارتداء شارة القيادة. وقال «المحمدي» في تصريحات لبرنامج «الماتش» الذي يقدمه الإعلامي هاني حتحوت عبر شاشة «صدى البلد»: «النقطة المهمة هي الصعود، الأجواء كانت صعبة في كينيا وفيه لعيبة بقالها فترة بعيدة عن المنتخب، كان الأهم هو الصعود والتأهل، الفترة الجاية صعبة علشان تصفيات كأس العالم، الناس لازم تقدر ظروف المنتخب والتجمع في فترات صغيرة بيكون صعب الأداء والأهم هو الأداء». وتابع: «الفترة الجاية هيكون في فترة أطول الجهاز يقدر يشوف اللعيبة بشكل أكبر، أتمنى الفترة الجاية أكون موجودا وده شرف كبير لأي لاعب». وأضاف: «استبعادي عن المنتخب مع حسام البدري وجهة نظر فنية تحترم طبعًا، ممكن الفترة دي الجهاز يعتمد على عناصر تانية، لكن الفترة الجاية رأيي إنه هيعتمد على أصحاب الخبرات أكتر، فيه عناصر شابة انضمت هتبقى مفيدة للمنتخب». وواصل «المحمدي»: «مؤمن بمقولة إن الجهاز الفني له الرأي الأول والأخير، لكن في رأيي أن اللاعبين أصحاب الخبرات لازم يكونوا موجودين علشان يفيدوا القائمة حتى لو مش هيشاركوا أساسي، علشان تدي اللعيبة المنضمة حديثًا الخبرات، مع كوبر مكنتش بنضم في الأول ولما لعبت في الجابون قدمت بطولة مميزة، مش شرط إني ألعب أساسي علشان أنضم، دي رؤية الجهاز الفني». وتابع المحترف في الدوري الإنجليزي تصريحاته «وارد يكون عامل السن سبب في عدم ضمي، لكن فيه ناس أكبر مني انضمت عادي، علشان كدة أنا شايف إن ده سبب مش مقنع، ممكن يكون بيفكر ينزل بالسن ولكن المرحلة الجاية مختلفة». واختتم «المحمدي» تصريحاته «بخصوص شارة القيادة، أنا بقالي سنين في إنجلترا والمدير الفني هو اللي بيقرر مش بالأقدمية، الموضوع مختلف برة مصر، أنا بالنسبالي اتعودت إن لو المدير الفني مش هيختارني كابتن خلاص عادي، لو أنا موجود مع المنتخب والشارة هتبقى مع حد تاني معنديش مشكلة».