اتكلم

لميس الحديدى:مساء الخير ، الحقيقة النهاردة واحنا بنعد الحلقة بقالنا كذا يوم مش عارفين نشتغل انهوا موضوع الاحداث فى مصر متلاحقة بشكل مش قادرين ناخد نفسنا من طبعا زيارة الرئيس الامريكى اوباما وتحليلاتها اللى استمرت مدة طويلة للنهاردة طبعا الانباء عن اكتشاف حالتين من انفلونزا الخنازير فى الجامعة الامريكية والاحتياطات اللى واخداها الجامعة لى, امبارح طبعا خسارة الفريق القومى من الجزائر 3 تلك الهزيمة المروعة اللى محدش فينا قادر يسامح لا الكابتن حسن شحاتة ولا الفريق القومى بالذات الدفاع يعنى انا شخصيا واحدة بحب الكرة مش بلعبها لكن يعنى حاسه بجد كفاية دلع بقى فى اللعيبة وكفاية دلع فى الفريق القومى هما خسروا مصر كلها مش خسروا نفسهم بس لى نتايج الانتخابات اللبنانية اللى فاز بيها تيار 14اذار التيار المعتدل ودى كانت نتيجة جيدة جدا فاز بمعظم المقاعد لى خبر الافراج عن مجدى يعقوب لكن الحقيقة النهاردة اخترنا ان يكون حديثنا وكلامنا عن انتخابات نقابة المحامين هذه الانتخابات التى انتهت منذ ايام قلائل تقريبا من اسبوع وفازفيها النقيب حمدى خليفة بعد يعنى ما كان سامح عاشورالنقيب السابق محتكر هذا المقعد لدورتين متتالتين وكان معظم الاراء تتجه الى ان سامح عاشور هيفوز فى هذه الانتخابات لكن هناك نتيجة اخرى مهمة جدا فى هذه الانتخابات هى كسر احتكار الاخوان لمجلس النقابة والصراع الواضح بين الحزب الوطنى والاخوان المسلمين لى السيطرة على نقابة المحامين اقدم واعرق النقابات المهنية فى مصر والعالم العربى هذه النقابة التى اسست سنة 1912 ،400 الف محامى اعضاء فى هذه النقابة اعتقد ان جزء كبير منهم بيتفرجوا علينا دلوقتى ودا هيكون حديثنا مع نقيب المحامين الجديد السيد حمدى خليفة لكن قبل ما نتكلم فى هذه القضية الساخنة جدا وهى قضية سياسيه الحقيقة فى المقام الاول النهاردة افرج عن رجل الاعمال المصرى مجدى يعقوب قررت محكمة جنوب القاهرة اخلاء سبيله وهو رئيس مجموعة الثلاثية بعد سبع سنين قضاها فى السجن لى محاولة اغلاق ملف رجال الاعمال المتعثرين الموجودين داخل السجون مجدى تصالح او فيه جزء كبير فيه جزء تتصالح فيه مع البنوك التى كان محبوسا يعنى على ذمة قروضها وفيه جزء تانى جارى التصالح بشانه مجدى دفع دفعة مقدمة 135 مليون جنيه والباقى يسدد على دفعات تنتهى بنهاية 2010 دا كله تطبيق لقانون البنوك الجديد الذى طالما حدثتكم عنه وطالما شكرنا السيد محافظ البنك المركزى على المسارعة والسرعة فى انهاء اجراءات التصالح والافراج عن هؤلاء رجال الاعمال المتعثرين التعثر لا يعنى ان تكون جوا السجن التعثر قد يكون لاسباب كثيرة جدا مجدى يعقوب النهاردة فى بيته وسط ولاده فى هذه اللحظة هو بيؤدى واجب العزاء فى عمه وان شاء الله هيكون ضيفنا قريب جدا نشوف هذه اللقطات من خروج مجدى يعقوب من السجن
مشاهد لمحاكمة وخروج مجدى يعقوب من السجن
القاضى :مجدى يعقوب سامح رشدى قررت المحكمة تاجيل نظر الدعوة لجلسة 3/10 €9 لتقديم التسوية النهائيه وامرت بالافراج عن المتهم الثالث مجدى يعقوب بضمان محل اقامته
مجدى يعقوب:حكم عادل بس متاخر شوية بنتى عايزة اعوضها السنين ديا
لميس الحديدى: هذه الدموع مجدى يعقوب وبشكر زميلنا وائل عبد الرحمن الذى تمكن ان يختص لنا بهذه الكلمات القليلة نقابة المحامين وكانه صراع سياسى على مجلس الشعب هذا هو الصراع بين الحزب الوطنى وبين الاخوان المسلمين مين اللى هيتحكم فى النقابة ؟ نقيب مين اللى هيجى ؟ فيه ناس قالوا ان الخبر ان حمدى خليفة جه نقيب وناس قالوا ان الخبر بالعكس ان سامح عاشور قد خسر مقعد النقيب لكن ناس قالوا ان الخبر حاجة تانية خالص الخبر هو كسر احتكار الاخوان المسلمين لاول مرة لى نقابة مهنية مهمة جدا زى نقابة المحامين بعد الانتخابات الحزب الوطنى قال ان حمدى خليفة دا ابننا دا عضو فى الحزب الوطنى وبالتالى احنا اللى نجحنا النقيب ده خرج بعد الانتخابات ايضا قال الاخوان حمدى خليفة نجح بدعم الاخوان المسلمين لمن سيسدد حمدى خليفة فاتورة نجاحه كنقيب للمحامين ؟والمعركة دى هتخلص على ايه ؟ هل سيتغير دور النقابة من دور سياسى ودور نقابه راى الى نقابة خدميه ؟ السيد حمدى خليفة معروف جدا بانه كان نقيب الجيزة لمدة جدا وانه له يعنى باع طويل فى الخدمات لى نقابة الجيزة الحقيقة ناجح جدا فى القضايا الخدمية هل ستنتقل هذه النقابة من نقابة راى ونقابة سياسة الى نقابة خدميه ؟ ما الاصلح للنقابة ؟ وم الاصلح للمحامين؟ ان تتدخل النقابة فى صراع السياسه ولا ان تخرج النقابة من هذا الصراع وتتحول الى نقابة بتقدم شقة ومصيف ومستشفى وعلاج ومعاش وحياة كريمة لى المحامين ؟الصراع السياسى على نقابة المحامين والحقيقة اللى انا حاسة بيه ان هذا الصراع خرج اليسار منه مهزوما يعنى هو صراع اصبح يمثل الصراع السياسى الحقيقى على ارض مصر اللى هو الحزب الوطنى والاخوان اما الاحزاب المدنيه الاخرى اما اليسار مش موجود مساء الخير يا سيادة النقيب
حمدى خليفة: مساء النور
لميس الحديدى: اشكرك ان انت قبلت دعوتنا انك تيجى البرنامج
حمدى خليفة: ربنا يبارك فيكى
لميس الحديدى: انت مين ؟ انت حمدى خليفه الذى دعمه الحزب الوطنى ام حمدى خليفة الذى دعمته جماعة الاخوان المسلمين؟
حمدى خليفة: انا حمدى خليفة اللى دعمنى المحامين واللى انا يجب انى انا اسدد الفاتورة للمحامين
لميس الحديدى: 35 الف صوت حصلت عليها؟
حمدى خليفة: 36 الف
لميبس الحديدى: 36 الف صوت
حمدى خليفة: للمحامين كلها اصوات حقيقية من المحامين انا معنديش فواتيراسددها لحد لا لتكتل سياسى ولا لحزب سياسى لانى انا التلاحم اللى تم ما بينى وبين المحامين هو اللى فرض نفسه وهو اللى كان بيتصدر هذه المعركة من بداياتها لنهايتها وارادة المحامين يمكن يعنى فى اللحظات الاخيرة كانت واضحة بقوة سواء يوم 23 او يوم 30
لميس الحديدى: تقصد الاعادة يعنى الجولة الاولى ؟
حمدى خليفة: الجولة الاولى والجولة التانيه الجولة الاولى طبعا المؤشرات كلها كانت بتؤكد انى انا متقدم بارادة المحامين وان المحامين عبروا عن ارادتهم بصورة واضحة وجليه تماما فى يوم 23 :5 علما بان يوم 23 الاخوان ما صوتوش يعنى انا كنت متفوق يوم 23 والاخوان ماشاركوش فى المعركة يوم 23 الاخوان شاركو فى المعركة يوم 30
لميس الحديدى: طب ما يمكن حثوا ان الاغلبية لك وبالتالى ما نصوت وناخد هذا النقيب
حمدى خليفة: هقول لحضرتك انا فى كل الحالات لم يحدث فى يوم من الايام انى انا تحالفت مع الاخوان ولم يحدث فى يوم من الايام انى انا تحالفت مع الحزب الوطنى
لميس الحديدى: لم تتحالف لا مع الاخوان ولا مع الحزب الوطنى ؟
حمدى خليفة: اطلاقا انا لا اتحالف الا مع المحامين وانا معروف عنى منذ اكثر من ربع قرن وانا بمثل المحامين فى العمل النقابى انى انا دايما يعنى بطرح نفسى بمفردى وفى نفس الوقت الحمد الله يعنى مفيش مره الا وكنت بنجح فيها باعلى الاصوات من ساعة ما كنت عضو مجلس نقابه ثم امين عام ثم وكيل ثم نقيب ثم نقيب ثم نقيب
لميس الحديدى: لكنك عضو فى الحزب الوطنى ام انها عضوية غيرسياسيه غير فعاله ؟
حمدى خليفة: اه هى عضوية غير فعالة وانا جمدت عضويتى دى من اكتر من 25 سنة
لميس الحديدى: جمدتها بمعنى ايه ؟
حمدى خليفة يعنى ممارستش اى نشاط حزبى من ساعة ما عملت فى العمل النقابى وهو دا نظام منهجى ان انا دايما افصل ما بين انتمائى لحزبى ومابين انتمائى النقابى لانه الخلط ما بين الانتماءات الحزبية والانتماءات النقابيه هو اللى بيخلق حالة صراع حزبى داخل نقابة المحامين
لميس الحديدى: وهو دا اللى عامل الصراع العنيف حتى ان احنا ما بنتكلمش عن مهنة المحاماه نحن نتحدث عن الصراع السياسى
حمدى خليفة: هقول لحضرتك على حاجة نقابة المحامين مغيبة عن العمل النقابى بقالها اكتر من 15 سنة 7 سنوت حراسة و8 سنوات عبارة عن صراعات وتناحرات ما بين الاحزاب وانا يعنى كان من اهم برنامجى اللى انا طرحته على المحامين واعتبرته بمثابة تعاقد بينى وبينهم وانه قد لقى ايجاب وقبول اعتبرت ان ده من نصاب التعاقد انى انا المفترض فيا نمرة واحد انى انا افصل ما بين الانتماء الحزبى وما بين الانتماء النقابى علشان الامور ميبقاش الحال على ما هو عليه
لميس الحديدى:طب انا هاجى لبرنامجك وهنتكلم تفصيلا عما تنوى ان تقدمه للمحامين ولكن هذه نقابة راى هذه اقدم واعرق النقابات هذه النقابات التى يلجا اليها المواطن العادى للدفاع عن رايه والدفاع عن المبادىء ودى النقابة اللى بتعبر عن مبادىء سياسيه وحتى باختلافها من اليسار الى اليمين هل ستحول هذه النقابه من نقابة راى الى نقابة خدمات؟
حمدى خليفة: اطلاقا النقابة سيبقى فيها الراى ولكن الراى الحر اللى بيعبر عن راى المجتمع واللى بيعبر عن القضايا القوميه الحقيقية اللى احنا يجب ان نتبناه وان احنا ندافع عنها
لميس الحديدى: طب ومين يحدد القضايا القومية دى يا فندم ؟ ما هو الوطن او البلد هى اما حزب وطنى او اخوان او يسار دى التيارات السياسيه اللى موجوده؟
حمدى خليفة : هناك فرق ما بين القضايا العامة التى لا يختلف عليها احد وما بين القضايا التى تمس احزاب معينة كلا له وجهة نظره فيها ومن الممكن فى نهاية المطاف انها تؤدى الى نتائج سلبيه متؤديش الى نتايج ايجابيه انا حريص جدا على نقابة المحامين
لميس الحديدى: حضرتك اللى هتحدد هذه القضايا؟ يعنى مثلا جتلك مظاهرة عايزة تقف فى النقابة هل النقيب هو اللى هيحدد والله انا هوافق على القضية دى لانها قضية قومية فى رايك والقضية التانية مش قضية قوميه؟
حمدى خليفة : لا لا لا هو هى المساله احنا بنبدا كلنا من خط عريض الخط العريض اللى احنا بنبدا منه انتوا النقيب مالوش ارادة منفردة الخط العريض اللى احنا بنبدا منه ان النقيب والمجلس هما اللى موجودين فى النقابة والتحامهم مع قضايا الجمعية العموميه هما اللى بيحدددوا القضايا اللى بتطرح سواء الخدمية او المهنية او القوميه داخل نقابة المحامين وبالتالى انا فى يقينى انه القضايا القوميه هى القضايا الى دائما تجدى انه الاختلاف فيها بيبقى للمصلحة العامة يعنى الاختلاف فى القضايا القومية او الجدل
لميس الحديدى: ادينى مثل؟
حمدى خليفة : يعنى انا مثلا لما اجد ان هناك قضية وبتهم مصلحة البلد بصفة عامة الشىء الطبيعى ان انا لازم اتبناه لكن لما اجد ان النقابة ممكن انها تبقى مرتع لحزب معين او لتكتل سياسى معين او لتوجهات معينة المقصود منها المصلحة الخاصة للحزب او للتكتل السياسى يبقى دا مهياش قضية قوميه
لميس الحديدى: بما فى ذلك الحزب الوطنى ؟
حمدى خليفة: بما فى ذلك الحزب الوطنى انا ما بسمحش لدخول احزاب داخل النقابة النقابة لابد ان تدار من خلال المحامين اولا واخيرا وانا لما بتبنى القضايا العامة باعتبار ان النقابة دى قلعة حريات يجب ان احنا فيها نتبنى القضايا العامة ويجب ان احنا نطرح فيها القضايا العامة ويجب ان احنا ندافع فيها عن القضايا العامة اللى هى بتهم مصلحة البلد واللى بتهم مصلحة العروبة بصفة عامة
لميس الحديدى : بس سيادة النقيب هؤلاء المحامين يمكن غيرهم من المهن الاخرى بالذات المحاميين والصحفيين يمكن المحامين اكتر كمان من الصحفيين المحامين بطبعهم معظمهم ينتمى الى تيارات سياسية كان زمان فى الماضى يتجهون لليسار اكتر مما يتجهون لليمين او ثم دخلت قضية جماعة الاخوان المسلمين واخترقت هذه الاماكن وهذه النقابات وانت عارف التاريخ السياسى والناس كلها عارفة وبالتالى الانتماءات السياسيه لى المحامين هى انتماءات موجوده ما تقدرش هتفصلها ازاى ؟
حمدى خليفة: هى موجوده وانا مش هفصلها اصل هناك فرق فى انا بتكلم فى انتماءات سياسيه بتمارس داخل نقابة المحامين لمصلحة البلد ولمصلحة نقابة المحامين ومتتعارضش مع نقابة المحامين وتحافظ على هيبة نقابة المحامين ومدخلناش فى مهاترات او صراعات حزبية انا بتكلم على الامور العامة اللى احنا كلنا يجب كمواطنين قبل ان نكون محامين نحن ندافع عنها ثم كمحامين ان احنا نتبناه لكن لما يبقى فيه قضية معينة وهذه القضية بتمس مجموعة معينة او تكتل معين او حزب معين لى امور شخصية دية اللى احنا يجب نفصلها
لميس الحديدى: يعنى مثلا لو اتقبض على مجموعة محامين من الاخوان المسلمين هتعمل ايه ؟
حمدى خليفة:الشىء الطبيعى طالما ان هذا القبض لا يدعمه القانون وان هذا القبض قبض باطل وان هذا القبض يتعارض مع الحرية العامة الشىء الطبيعى انى هدافع عنهم سواء عن الاخوان او عن الحزب الوطنى او ناصرى
لميس الحديدى: هتدافع عن المحامى فى الاول لان هو عضو نقابة
حمدى خليفة: هو كمحامى وكحرية راى يعنى هدافع عنه كمحامى وهدافع عنه برضه كحرية راى
لميس الحديدى: واذا طلب منك الحزب الوطنى ان تؤيد قانون معين مثلا يكون المحامين بتعوك اللى موجودين جوا مجلس الشعب يؤيدون معين هتعمل ايه ؟
حمدى خليفة: ان كان هذا القانون يتعارض مع مصلحة البلد ويتعارض مع مصلحة نقابة المحامين انا هقف ضده زى ما حصل فى قانون زيادة الرسوم قانون زيادة الرسوم انا اول واحد واجهته وواجهته بمذكرة اعتراضات رسمية تقدمت بيها للاستاذ الجليل الدكتور فتحى سرور وكان مجلس الشعب يعنى اللجنة التشريعيه كانت وافقت على هذا القانون رغم ما به من سلبيات عديدة جدا سلبيات اوضحت هذه السلبيات من خلال مذكرة الاعتراضات الرسمية اللى تقدمت بيها ثم تقدمت بمذكرة اخرى موقع عليها من 60 عضو من اعضاء مجلس الشعب وطلبت اعادة المشروع مرة اخرى للجنة التشريعيه لاعادة دراساته على اعتبار ان هناك العديد من السلبيات فى هذا القانون وان القانون فى الصورة القديمة اللى كان موجود عليها كان هيتعارض مع الدستور
لميس الحديدى: اعترضت ايضا على بعض تعديلات قانون المحاماة
حمدى خليفة: بالنسبة لقانون الرسوم اعيد طبعا مرة اخرى لاعادة دراسته امام اللجنة التشريعيه اما بالنسبه لقانون المحاماه برضه انا اعترضت عليه لما وجد ان هناك سلبيات
لميس الحديدى: اعترضت على المادة الاولى التى تثير سلطة النقيب؟
حمدى خليفة: لا اعترضت على المادة الاولى واعترضت على المادة اللى كانت بتعطى الحق للنقيب العام باحالة المحامين للتاديب منفردا واعترضت على حجم الموارد المالية للنقابات الفرعية
لميس الحديدى: ودا كان خلافك الاساسى مع سامح عاشور؟
حمدى خليفة: يعنى كان مسيرة لبعض الخلافات وطبعا كان سبق هذا الامر يعنى بعض الخلافات الاخرى حول المشروعات اللى انا اقمتها بصفتى نقيب للمحامين بالجيزة منها المدينة السكنية يعنى كانت عبارة عن تواصل فى بعض الاختلافات فى وجهات النظر طبعا انا لما اختلفت معاه فى مشروع القانون وجدت ان القانون بيقدم فى غيبه من اصحاب الراى لانه من المفترض ان اى قانون لنقابة مهنية لابد ان ياخذ راى اصحاب القضية نفسهم
لميس الحديدى: وقيل وقتها ان هذا القانون قدم بدعم من الحزب الوطنى .
حمدى خليفة ودا اللى حصل وعلشان كده انا اختلفت مع بعض البنود فى هذا القانون وايضا تقابلت مع الدكتور فتحى سرور اللى تم التجاوب برضه كعادته فى هذا الاعتراض وقضى ليى بالاستجابة بكل الاعتراضات
لميس الحديدى: بس الاخوه فى الحزب الوطنى بيقولوا برضه ايوه لكن هذا القانون هو القانون الذى سمح بتوسيع دائرة التمثيل فى المجلس وبالتالى سمح ايوه احنا قاصدين نكسر احتكار الاخوان المسلمين داخل المجلس يعنى عندهم مصلحة يراها كثيرون انها مصلحة مشروعة
حمدى خليفة : ايا كان الامر ممكن تكون مشيت بصورة لغاية دلوقتى لكن ممكن فى ظروف اخرى متمشيش بالصورة ديه لكن فى مبدا بيقول ان الاقليه وسط اقليه بيمثلوا اغلبيه
لميس الحديدى: هى مبدا الاقليه المنظمة والاغلبية المبعثرة
حمدى خليفة: لا هو اللى حصل بالظبط ايه؟ يعنى احنا جينا جزئناها محاكم كونها انها تتجزا محاكم وفيه تكتل مثلا بيطرح واحد بس من عنده وفيه يعنى الاخرون بيطرحوا الكثير وبرضه اللى هيستفيد الشخص اللى هو طرحه التكتل ده هى مشيت المرادى بالشكل ده لكن مرة تانيه ممكن متمشيش كده
لميس الحديدى: هنيجى للمجلس بس انا عايزة اسئل حضرتك وانا شوفتلك تصريح النهاردة فى الوفد انك تهاجم امين التنظيم السيد احمد عز وتقول ان بما معاناه ان احمد عز لن يقود النقابه مش هو اللى هيشكل هيئة المكتب وانه الاجتماع اللى عقدوا مع 20 من اعضاء مجلس النقابه انت مش موافق عليه وان تشكيل هيئة المكتب دا قرارك انت هل دا صحيح ؟
حمدى خليفة: لا هو انا لما سالت فى المساله ديه انا قلت ان المهندس احمد عز ليس له دخل بنقابه المحامين ومن غير المتصور ان هو يكون طرف فى تشكيل هيئة المكتب
لميس الحديدى: اه بس حضرتك عارف ان المهندس احمد عز كامين تنظيم وهذا عمله فى الحزب الوطنى كان يتابع انتخابات نقابة المحامين خطوة بخطوة كان يتابع فكرة اللى هو مين هينتخب مين ؟ فكرة كسر احتكار الاخوان فكرة قائمة القومية تكسب ولا لا ؟ وقيل والعهدة على الرواى انه كان يدعم سامح عاشور
حمدى خليفة: يعنى هى دية حقيقة
لميس الحديدى: دى حقيقة يعنى انت ترى انه كان يدعم سامح عاشور؟
حمدى خليفة: اه دى كانت معروفة للعامة كلها بالكامل يعنى معروفة للمحامين
لميس الحديدى: رحت للحزب الوطنى وقلتلهم يعنى انا يا جماعة دا انا ابنكم دا انا بتاع الحزب الوطنى انتوا ازاى تروحوا تدعموا نائب رئيس الحزب الناصرى ؟
حمدى خليفة: لا لا اطلاقا طبعا انا لم بتكلم ثقى تماما انى انا مش هقولك غير الحقيقةانا لم اتحالف لا مع اخوان ولا لجات للحزب الوطنى علشان يدعمنى وانا معروف دايما عنى انى انا التحامى بيكون من خلال المحامين
لميس الحديدى: يعنى لم يكن لك اتصال باى مسئول سواء المهندس احمد عز او غيره من مسئولى الحزب الوطنى؟
حمدى خليفة: اطلاقا
لميس الحديدى: اضايقت عايزة حمدى خليفة يرد بصراحة اضايقت ؟
حمدى خليفة:هقولك على حاجة يعنى انا بالنسبالى طبعا يعنى انا بيحزننى انه الاحزاب نفسها تبقى طرف فى الانتخابات
لميس الحديدى: غير الاحزاب انا حزب يا جماعة انا عضو فيه انا عضو فى النادى بص كده هتلاقى الكارنيه بتاع النادى بتاعى موجود انا عضو فى النادى وانت مش شايف ان انا يجب ان تدعمنى وتدعم نائب رئيس الحزب الناصرى؟
حمدى خليفة: ماثرتش عندى كثيرا لانى انا علاقتى بالله سبحانه وتعالى اولا ثم بالمحامين ثانيا وانا دائما باغلب يعنى بارادة الله ثم بعدها ارادة المحامين وهى دى المنظومة اللى انا بتحرك منها 25 سنة
لميس الحديدى: وبعد الانتخابات خبطوا على بابك زى ما بيحصل فى مجلس الشعب
حمدى خليفة: زى مين ؟
لميس الحديدى: الحزب الوطنى يعنى فى مجلس الشعب بيحصل ايه ؟ ان مثلا يكون فيه اعضاء للحزب الوطنى التنظيم او يعنى الحزب بيختار واحد عن دايرة معينة فيروح التانى زعلان فيروح نازل مستقل واول ما ينجح المستقل يقولوا تعالى دا انت ابن الحزب الوطنى تعالى اقعد عندنا يا عم وبلاش ثم يضم وهكذا كانت الغلبه للحزب الوطنى الحقيقة فى الانتخابات اللى فاتت وانت تعرف
حمدى خليفة: لا يعنى انا مفيش تانى يوم النتيجة محدش يعنى تحدث معى لكن كانت مجرد تهنئة
لميس الحديدى: من مين ؟
حمدى خليفة: من الدكتور فتحى سرور ودى تهنئه يعنى انا بعتبر الدكتور فتحى سرور هو شيخ المحامين وهو تحدث معى من هذا المنطلق دكتور فتحى سرور انا احبه جدا
لميس الحديدى: والله وانا هقولك الحقيقه يعنى
حمدى خليفة: الراجل ده له لمسات عظيمة يعنى متعرفيش انك تعدى معاه ومتحبهوش انا بحبه بامانه هو الوحيد اللى تحدث معايا واتصل بيا المهندس احمد عز اكتر من مرة وهنانى وقال ان احنا عايزين النقابة فى الفترة القادمة يعنى يبقلها شكل معين وتصور معين قلتله الشىء الطبيعى انى هيبقلها شكل معين وتصور معين لانى انا حاطط فى الاعتبار ان احنا نتحرك كلنا كا كتيبه وفريق واحد
لميس الحديدى: هل هو عرض عليك تصوروا ده المعين؟
حمدى خليفة : لا احنا لم يحدث اى حديث فى هذا الامر وانا لغاية دلوقتى معرفش اذا كان بالفعل بيدخل فى هيئة المكتب ولا لا انا بسمع انا معرفهاش
لميس الحديدى:مسالتهمش ؟
حمدى خليفة: لا لا لا انا بسمع لكن انا فى يقينى انه مش هيكون الا القرار اللى هو بيصدر من اعضاء المجلس او اللى هو بيعرض على اعضاء الجمعية العموميه وهما اللى بيقدروا وبيقيموا المرحلة اللى جاية تبقى عاملة ازاى
لميس الحديدى: اكيد في ناس يعنى قريبيين ليك وبتسالهم حصل الاجتماع ده ولا محصلش ؟
حمدى خليفة:لالا لا انا ما بسالش لانى انا سواء حصل ولا محصلش مش هيؤثر فى الخطة اللى انا واضعها فى كيفية التعامل مع المجموعة كلها بالكامل على اعتبار انى انا واضع فى الاعتبار ان احنا نتحرك كلنا كمنظومة واحدة وقلتوا برضه زى ما قلت فى الجيزة قبل كده لانى انا عندى فى الجيزة كان عندى اخوان وكان عندى حزب وطنى وكان عندى جزب ناصرى فاتفقت مع المجموعة كلها بالكامل ان احنا بنوظف انفسنا لخدمة المحامين وان الكل بيخلع رداء الحزبية خارج اسوار النقابة هو دوا نفس برضه اللى هو هيحصل المرادى وانا عملت دعوة يوم الخميس القادم والدعوة اللى انا عاملها اساسها هو الحديث اللى احنا بنتكلم فيه دلوقتى
لميس الحديدى: كان المفروض اعتقد ان كان فيه اجتماع يوم السبت
حمدى خليفة: لا لا دا اول اجتماع لينا اول اجتماع ومش اجتماع رسمى يعنى انا عامل الاجتماع ده علشان نتكلم فى خطوط عريضة لى البرنامج الزمنى لان انا جاى ببرنامج زمنى ضمن اجندة كثيفة جدا بى البرنامج علشان انفذه محتاج ل 10 سنوات فانا لما عرضت وقلت واتفقت مع المحامين واعتبرت ان دوا بمثابة تعاقد ما بينى وما بينهم انى انا انفذ هذا البرنامج فى خلال 4 سنوات اذنا انا محتاج انى اوفر مناخ جيد عشان اوفر مناخ جيد لازم يبدا هذا المناخ من المجلس وعدم وجود تناحرات بين اعضاء المجلس وبعضهم
لميس الحديدى:هنخرج فاصل سيادة النقيب نسمع فيه راى المحامين فيما يريدون من هذه النقابه ونتمنى هل سيخلع المحامون رداء حزبيتهم ورداء الاحزاب داخل النقابة؟ هل سينجح حمدى خليفة مع هذا المجلس؟ بعد الفاصل
فاصل: لقاءات مع بعض المحامين فى النقابه
محامى1: احنا بنطلب انو هما يوفرولنا خدمات ويوفرولنا الرعاية الصحيه المطلوبة ويوفرولنا الخدمة المطلوبة زى اى نقابة
محامى2: يصلح حال النقابة حال النقابة المستشفيات والدكاتر اللى بتمشى مننا الحال بتاع النقابة
محامى3: اولا عايزين مبنى جديد خالص للنقابة غير المبنى ده يعنى لو بصينا على مبنى نقابة الصحفيين هنلاقيه افضل من النقابة
محامى4: يهتم شوية بالمحامين الشباب
محاميه5: اهم مطالب المحامين الشعور بادميتهم فى كل الاماكن سواءا فى المحاكم وعلى راسها طبعا وعلى الاخص طبعا المحاكم
محامى6: مطالبنا من المجلس الجديد كحق مشروع لكل محامى ان هو يكون حقه فى الرعاية ليه ولاسرته من حيث مثلا كرعاية طبيه
محامى7: التغيير الى الاصلح طبعا من اجل معاش كويس للمحامى من اجل طبعا التامين الصحى للمحامى حاجات افضل من كده بكتير طبعا دا اللى بنطالب بيه
لميس الحديدى: حمدى خليفة نقيب المحامين سيادة النقيب قيل نجح حمدى خليفة وسقطت قائمته وخسر سامح عاشور ونجحت قائمته هل دا صحيح ؟
حمدى خليفة: انا ماكنش عندى قايمة اصلا
لميس الحديدى:ماكنش عندك قايمة ؟
حمدى خليفة:اطلاقا انا قلت للمحامين انا قايمتى اللى انتوا تختاروها انا مش هفرض عليكم قايمة يعنى انا لما سالت السؤال دا مرارا وتكرارا كان بيقولولى فين القايمة بتاعتك علشان لما نديلك اصواتنا ندى كمان القايمة للناس اللى هتريحك قلتلهم انا بشتغل مع حد اى حد انا بشتغل معاه وطالما ان انتوا بتيجيبوا انتم الافراد اللى انتم بتتفقوا عليها انا عمرى ما هختلف معاكم
لميس الحديدى:قلقان من هذا المجلس ؟ يعنى يقال انك ستقود مجلس نقابة مفكك كده يعنى دلوقتى الاخوان كسر هذا الاحتكار بى اللى قلنا عليه تغيير التمثيل النسبى فبقى الاخوان عندهم 18 مقعد من 47 والباقى شوية بقى قايمة سامح عاشور وشوية قايمة الحزب الوطنى شوية مستقلين يعنى تفكيك كده وبعثرة واعدائك جوا القايمة
حمدى خليفة:انا متفائل خيرا المرحلة القادمة ومتفائل خيرا انه يوم الخميس القادم ان احنا نقول انه الانتخابات انتهت فبتنتهى كافة اثارها الجانبيه والسلبيه وان احنا بنبدا صفحة جديدة مع بعض علشان نقدر نوصل الامانة اللى احنا ماتمنين عليها للمحامين وان احنا نبدا كلنا كا كتيبه عمل واحده على قلب رجل واحد وباعتبار ان احنا كلنا بنتقدم للامام كمنظومة عمل جماعية وهو دوا اللى انا هطرحه قلت انى هبدا بنفسى ان احنا كلنا هننكر ذاتنا فى سبيل مصلحة المحامين وهبدا بنفسى يفترض انى انا ليا صلاحيات فى التوقيع بالارداة المنفردة فى الانفاقات الماليه قلتلهم انى انا الخط العريض اللى هنبدا منه كلنا انه مش هيبقى فيه اى انفاقات مالية الا من خلال قرار مجلس لا هيحق ليا ولا هيحق لغيرى علشان يبقى المجلس هو اللى بيشارك مشاركة ايجابيه فى كل الامور الماليه
لميس الحديدى: بس المشاركة دى ممكن انها تؤدى الى نتايج عكسية اسمحلى بمعنى انى مع كل هذه الخلافات داخل هذا المجلس قد لا تتفقون على قرار نفضل قاعدين فى حلقة مفرغة لاتنتهى
حمدى خليفة :فى كل الحالات حتى لو متفاناش على قرار هيبقى راى الاغلبيه ويبقى انا مارست الديمقراطيه صح ويبقى القرار اللى احنا اتخذناه والقرار اللى صادر هو قرار مجلس النقابة سواء بالاجماع او بالاغلبيه غير لما يكون قرارى منفردا او قرار غيرى منفردا قد اخطا انا فى القرار او قد اخطا فى الضابط والمعيار اللى انا حددت من خلاله مثلا اوجه الصرف لكن عمر ابدا قرار المجموعة خاصتا ل46 واحد ال46 حتى لو افترضنا انه الاغلبيه فيهم هتمثل 30 او هتمثل 28 راى 28 غير راى واحد عشان كده انا حريص جدا على انه منظومة العمل تبدا بالديمقراطية
لميس الحديدى:هل قلقان ان سامح عاشور يحكم النقابة من داخل المجلس ؟بصراحة الطاقم الادارى داخل النقابة اما ولائه للنقيب الاسبق السيد سامح عاشور او ولائه لى الاخوان المسلمين الاتنين كل واحد كان بيعين ناس وهذا طاقم ادارى ضخم موجدين يعنى ممكن يحطولك ايه العصايا جوا العجلة دى اول حاجة الحاجة التانيه انهم ممكن يمررولك حاجات كتيرة جدا يعنى يعملولك مس ليفنج يقولولك معلومات مغلوطة حاسس انك داخل على جو يقلق؟
حمدى خليفة:اوعدك ان الكلام دا كله مش هيكون موجود واوعدك ان الولاء هيبقى بمشيئة الله زى ما بوعد المحامين دلوقتى انه الولاء هيبقى للمصلحة العامة
لميس الحديدى:جايب الثقة دى منين ؟
حمدى خليفة :انا حاجتين فى حياتى عمرى ما عرفتهم الحمد الله انا حضرت حرب 73 كنت من اول الجنود المصريين اللى شاركوا فى رفع علم مصر على سيناء كنت فى الكتيبة 48 التابعة للواء 25 مهندسين حرب 73 علمتنى انى انا لا اعرف الخوف ولا اعترف بالفشل وهى اللى حددتلى المسار وحددتلى الطريق اللى انا بتحرك فيه
لميس الحديدى:وانا معجبة بالثقة دى
حمدى خليفة:خاصتا انتى لما بتشتغلى ابتغاء مرضات وجه الله سبحانه وتعالى ثقى تماما انك مش هتخدى غير على قد ضميرك وعلى نيتك
لميس الحديدى:هل لديك اسماء معينة لتشكيل هيئة المكتب ولا ؟
حمدى خليفة:لا انا هشتغل مع اى هيئة انا فى يقينى ان المجموعه كلها بالكامل ودوا اللى انا هطرحه عليهم يوم الخميس ان شاء الله ان المجموعه تكون بالكامل ممثله انا مش عايز اخرج بجرحى من هيئة المكتب
لميس الحديدى:جرحى؟
حمدى خليفة: اه
لميس الحديدى: ماذا يعنى هذا؟
حمدى خليفة: يعنى مش عايزة مجموعه تمثل والاخرى لا تمثل يبقى بالتالى هندخل فى صراعات وتناحرات زى ما حصل لانه دائما تشكيل هيئة المكتب هى اللى بتحكم على المجلس وعلى استمراريه المجلس اذا كان المجلس هيستمر بمشاكل او بدون مشاكل
لميس الحديدى: المهندس احمد عز قدملك ترشيحات ؟
حمدى خليفة: المهندس احمد عز انا معرفش لغاية دلوقتى هو تتدخل فى الترشيحات بامانه ولا لا
لميس الحديدى: هو مين اللى بيرشح حضرتك ولا غيرك ؟
حمدى خليفة: اللى بيشكل الهيئة مجلس النقابة وانا محدش ابدا يقدر يتدخل فى تشكيل هيئة المكتب من خارج المجلس يعنى دى مساله من صلاحيات المجلس
لميس الحديدى: ايوه ماهو ليه رجالته داخل المجلس يا سيادةة النقيب
حمدى خليفة: معلش هو كونه اذا كان هو اذا كان هيتدخل هيبقى تدخله دوا بصفة شخصية باعتبار زى اى محامى
لميس الحديدى: هو امين التنظيم بالحزب ومن مصلحته ان النقابة دى تكون موالية له
حمدى خليفة: الحزب برضه ليس طرف فى التشكيل ولن يكون طرف فى التشكيل تحت اى ظرف ولن يكون هناك اى مسمى رسمى فى التشكيل لكن واحد بيتدخل بصفة شخصية هو شانه لكن العبرة بالنهاية العبرة بما سيكون والعبرة بما سيتفق عليه داخل المجلس والله انا وجد ان المجموعه كلها هتبقى متحابة وهتعمل على قلب رجل واحد كان بها وهنقدر ان احنا نخطو هذه المرحلة ونعبرها بشكل جيد الا لم يكن انا عندى جمعية عموميه وانا اتكلمت مع الجمعية العموميه مرار وتكرارا قبل كده فى البرنامج الانتخابى انى انا مش هشتغل كنقيب ولا هشتغل كمجلس نقابة انا هشتغل 400 الف محامنى بعتبرهم 400 الف نقيب يعنى اى حاجة عندى اصحاب القضية والجهاز الرقابى وهو اقوى جهاز رقابى بيراقب عليا هم اعضاء الجمعية العموميه اى حاجة هعرضها جمعية عموميه على طول
لميس الحديدى: سيادة النقيب يقلقلك عايز اقولك ان الطعون بدات بالفعل سامعه كده انه ابتدت طعون حاسس ان احنا هنخش فى نفق مظلم تانى؟
حمدى خليفة:لالا ان شاء الله مفيش نفق مظلم ولا فى شىء لينا على الاطلاق يعنى
لميس الحديدى: يقلقلك انه ما فازش ولا قبطى واحد ولا محامى قبطى واحد فى مجلس النقابة رغم ان بعضهم لى تاريخ طويل يعنى فيه عادل رمزى فيه مجدى حنا يعنى فيه ناس لها تاريخ طويل فى العمل الخدمى حتى العمل النقابى حاسس ان دا تيار داخل النقابة وهى نقابة راى المفروض؟
حمدى خليفة: يعنى اذا اعتبرنا لم يمثل احد منهم فى مواقعهم لكن انا بوجهلهم رسالة وبقولهم بعتبر ان انتم ممثلين بالفعل فى مواقعكم داخل النقابة وان النقابة مفتوحة للجميع كل اللى عايز يشتغل اهلا وسهلا بيه بل انى انا وجهت الرسالة ديه للاستاذ سامح ووجهتها للاستاذ رجائى والاستاذ طلعت وقلتلهم كلكم تعالوا ساعدونى واشتغلوا
لميس الحديدى: حد كلمك منهم بعد الانتخابات بعد ما فزت ؟
حمدى خليفة: مفيش غير الاستاذ طلعت بس
لميس الحديدى: الاستاذ طلعت السادات
حمدى خليفة: هو الوحيد اه هو شخصية انا بحبه
لميس الحديدى: هو ابن بلد
حمدى خليفة: قوى وبعدين يعنى هو روحه طيبه
لميس الحديدى: هل يعنى ذلك لان روح سامح عاشور او رجائى
حمدى خليفة: انا مقلتش كده جايز الظروف منعتهم ان هما يتصلوا
لميس الحديدى: لكنك بتوجهلهم رسالة من هذا البرنامج
حمدى خليفة: وبكل حب انا بقلهم يعنى النقابة والعمل فى النقابه ماهواش متوقف على انى انا اتبؤ مقعد معين انا ممكن انى انا ابقى منضم لصفوف المحامين ضمن كتيبة المحامين وهعمل شانى شان اى واحد فى الموقع النقابى فانا بوجه رسالة لمحامين مصر كلها بالكامل بما فيهم استاذ سامح والاستاذ رجائى والاستاذ طلعت ان احنا نشتغل كلنا مع بعض فى سبيل ان احنا فى الاخرنتقدم بالنقابه فى سبيل ان احنا نحقق للمحامين نتايج ايجابيه
لميس الحديدى: طب نخش بقى فى العمل النقابى فى البرنامج بتاع حضرتك حضرتك بتؤكدلى ان هذه النقابة مخاوف من انها تنتقل من نقابة راى و ونقابة سياسة الى نقابة خدمية مالوش اساس من الصحة لكنك قلت ضمن الحملة الانتخابيه انا ضد البروباجندا
حمدى خليفة: بمعنى ايه ؟ يعنى المفترض العمل النقابى داخل نقابة المحامين بيتصل ب3 محاور المحور الخدمى المحور المهنى المحور القومى يجب ان تسير هذه المحاور كلها فى خطوط متوازية مينفعش انى انا اهتم بالمحور المهنى على حساب المحور القومى او المحور الخدمى على حساب المحور القومى او المحور القومى على حساب المحور السياسى علما بانه المحور القومى فى نقابة المحامين هو اهم ما يميزها عن النقابات المهنية الاخرى
لميس الحديدى: هى نقابة راى
حمدى خليفة: اطلاقا انا عمرى ما هغفل المحور القومى لكن لازم الخطوط كلها فى خطوط متوازيه
لميس الحديدى: ما هو المحور القومى دا عليه خلاف يعنى ما يريده الحزب الوطنى لا يريده الاخوان بالتاكيد ويفضل اليسار واقف فى النص مش عارف يروح فين شوية يروح هنا وشوية يروح هنا يعنى فى النهاية المحاور دا عليه خلاف كيف ستوفق هذا الخلاف؟
حمدى خليفة: ما يتفق عليه كمصلحه عامة للبلد وكمصلحة عامة للامة العربيه لن يختلف عليها الاخوان ولا يختلف عليها
لميس الحديدى: والله بيختلفوا
حمدى خليفة: والله بقى وقت ما يختلفه يبقى نشوف المصلحة العامة فين
لميس الحديدى: يعنى مثلا فى الصحفيين قيل مش هنطلع مظاهرات من على سلالم النقابة وبقيت سلالم النقابة مقدرش مجلس النقابه ولا اى حد نمنع هذه المظاهرات
حمدى خليفة: انا مقدرش امنع ابدا مظاهرة بتعبر عن راى هذا الراى راى حر وهذا الراى لمصلحة بلدنا ولمصلحة نقابة المحامين
لميس الحديدى: بس معظم هذه الاراء اللى بتطلع بيها مظاهرات بتبقى ضد الدولة بصراحة يعنى هنعمل مظاهرة مع الدولة ليه ؟
حمدى خليفة: انا مش معنى انى انا بقول انى انا المظاهرة انها تبقى ضد الدوله او مع الدولة انا ما بتكلمش على الدولة انا بتكلم عن المجتمع بتكلم على بلد بتكلم على مصر ان انا بشوف ايه هو اللى فى مصلحة مصر حتى لو هو ضد الحكومة وايه هو اللى ضد مصلحة مصر حتى لو هو مع الحكومة اى اللى بيعنينى مصلحة مصر اولا واخيرا والقضايا القوميه اللى احنا بتعنينا واللى احنا بنتحدث عنها واللى هى هتبقى يعنى محور الارتكاز بالنسبالنا خلال الفترة هى التى تتفق بالفعل مع مصلحتنا احنا كمصريين كمواطنين وكمحامين بصفة عامة
لميس الحديدى: حضرتك اتكلمت عن مشروع هدم المقر الحالى لنقابة المحامين ان كل المحامين زى ما سمعنا نفسهم فى مقر جديد للنقابة تعتقد ان دا ممكن؟
حمدى خليفة : هقول لحضرتك على حاجة يعنى انا لما تحدثت فى البرنامج الخدمى وضعت لى مده زمنية معينة ماكنش البرنامج دا من صنعى انا لوحدى يعنى انا دايما بحب اصنع القرار مع المحامين مش لوحدى حتى لما طرحت نفسى فى الانتخابات ما كنش القرار دا بارادتى انا منفردا يعنى انا عملت استطلاعات للراى الاول على مستوى المحامين لما وجدت ان ردود الفعل ايجابيه
لميس الحديدى: هتعرف تعمل ده هذا اثر اولا عندنا اثرالارض مش متسجله لحد زى ما حضرتك عارف
حمدى خليفة: اثر ليه ؟
لميس الحديدى: معرفش هما بيقولوا كده
حمدى خليفة: هقولك بيعتبروها اثرليه ؟ لان المبنى اللى هو حاليا قايل للسقوط مبنى من 70 سنة طب ما انا لو بنيته دلوقتى ماهو بعد 70 سنة هيبقى اثرى
لميس الحديدى: يعنى عندك قدرة على التفاوض مع الدولة والتفاوض مع الحكومة والمحليات ؟
حمدى خليفة: والدولة هتمنعنى ليه ؟ طب ما كانه منعوا الصحفيين ما الصحفيين عملوا كده الدوله هتمنع المحامين ليه ؟ ما كانه منعوا الصحفيين
لميس الحديدى: بصراحة ابراهيم نافع برضه كان نقيبا قويا انا مش قصدى حاجة
حمدى خليفة: وانا قوى بارادة الله سبحانه وتعالى وبارادة المحامين
لميس الحديدى: يعنى تعتقد انك ستستطيع ان تنجح فى انتزاع فكرة الهدم والبناء مرة اخرى
حمدى خليفة: مؤكد بمشيئة الله ولن يكون غير ذلك واذا كان هيبقلنا لقاء اخر هفكرك
لميس الحديدى: هيبقلنا لقاءات
حمدى خليفة: هفكرك بعد كده انى انا عملت هذا
لميس الحديدى: انا اتمنى انك تنجح بصراحة يعنى بس انا سامعة يعنى ان ممكن يخلوك تهد وما يخلوكش تبنى
حمدى خليفة :على فكرة ترخيص الهدم مرتبط بترخيص البناء يعنى الاتنين بيتم استخراجهم فى وقت واحد يعنى مش الاول ان احنا بنعمل ترخيص هدم وبعد كده بنعمل ترخيص بناء لا دا احنا بنعمل هدم بغرض اعادة البناء فالاتنين فى توقيت واحد وهى الدولة مصلحتها انى انا مبنيش نقابة تانيه للمحامين بل بالعكس لما هيبقى فيه متسع من المكان بدل ما المحامين هتبقى مظاهرتهم فى الشارع هتبقى داخل المبنى
لميس الحديدى: هما مش عايزين مظاهراتهم اصلا يا سيادة النقيب مش عايزين مظاهرات من اصله
حمدى خليفة: يعنى هيبقى متسع من المكان انا عندى اخطر قطعة ارض فى مصر كلها بالكامل وغير مستغلة الاستغلال الامثل وهيبقلنا برضه نقابه فى 6 اكتوبر وهيبقى فيه نقابة فى مدينة نصر ايه اللى هيمنع ان انا فى كل مكان يبقى عندى اكثر من نقابة
لميس الحديدى: هل طلبت انك تقابل رئيس الحكومة بمطالب معينة ؟يعنى النقيب نقيب المحامين بالذات دون عن اى نقابة مهنية اخرى بيكون لو قدرة انه يرفع سماعة التليفون ويكلم رئيس الوزرا مساء الخير انا عايز اقابل حضرتك عندى مطالب كذا هل ستقوم بذلك؟
حمدى خليفة: هو طبعا هناك العديد من المطالب ولكن هى هتبدا من وزارة الاسكان لانه انا وعدت المحامين انه بمشيئة الله يكون فى كل محافظة مدينة سكنيه على غرار المدينة السكنية اللى تم عملها فيه مدينة 6 اكتوبر بالنسبة لمحامين الجيزة من الاسبوع الماضى انا كنت فى الاسكندرية ووعدتهم ان شاء الله يكون ليهم مدينة فى برج العرب والكلام دا انا طبعا هكون حريص فى خلال الايام القليلة القادمة انه يكون فيه مقاولة مع وزير الاسكان وهطرح عليه هذه الاطروحات كلها بصفه عامة فى سبيل ان احنا نقدر نخصص اكبر قدر ممكن من الاراضى اللى احنا نقيم عليها المدينة السكنيه ودية بتبقى المساله بيبقى فيها قاسم مشترك بتبقى مصلحة للدولة ومصلحة للمحامين ان انا بوفر على الدولة اسكان الشباب اوانهم يعنى يبقى عندهم عبء مسئولية ان هما يسكنوا الشباب باعتبار انه هو مواطن مصرى وان انا بسكن المحامين بوحدات سكنية بسعر التكلفة الفعليه واعتقد ان دوت بيعتبر المشروعات الاولى فى النوع فى تاريخ النقابات المنهية كلها بالكامل يعنى
لميس الحديدى : طيب معايا اتصال هاتفى من الاستاذ سعيد عبد الخالق عضو مجلس نقابة المحامين مساء الخير يا استاذ سعيد
سعيد: مساء النور يا فندم
لميس الحديدى: مبروك
سعيد: الله يبارك فيكى يا فندم
لميس الحديدى : يعنى لو تابعت الحوار اللى بينا كيف ترى هذا الشكل من التعاون بين مجلس النقابة وبين النقيب الجديد اعتقد ان حضرتك كنت من على قايمة النقيب الاسبق سامح عاشور صلحلى لو انا غلطانه
سعيد: لا دى حقيقة سعادتك
لميس الحديدى: طيب شكل التعاون بقى ايه جالكوا حد عدو ولا حبيب؟
سعيد: لا هو اسمحيلى حضرتك بس انا متابع الحوار من بدايته وانا فيه ملاحظات على الحوار بس هذكرها فى حاجات بسيطة يعنى اولا حضرتك قلتى 100 الف محامى احنا وصل عددنا الى 450 الف محامى
لميس الحديدى : لا يا فندم انا قلت 400
سعيد:يبقى انا اللى سمعتها غلط
لميس الحديدى: يمكن 120 الجمعية العمومية؟
سعيد: الجمعية العمومية كان اصلها 208 والحضور فيها 76 الشىء الاخر ان حضرتك قلتى ان اليسار خرج منهزما من هذه المعركة او مهزوما من هذه المعركة هذا لم يحدث اليسار ممثل باكثر من 5 اعضاء فى مجلس نقابة المحامين
لميس الحديدى: بس برضه دى اقلية كان يعنى نقابة المحامين هى نقابة يسار
سعيد : لا هى نقابة المحامين فى وقت من الاوقات كانت نقابة الوفد وفى وقتا اخر كانت نقابة اليسار وفى وقتا اخر كانت نقابة الاخوان المسلمين نقابة المحامين لها دور تاريخى على مدى عمر نقابة المحامين نقابة المحامين نشات من رحم الحركة الوطنية المصرية فى وقت من الاوقات لما ماكنش فيه احزاب فى مصر بتعمل على ارض الواقع السياسى فى مصر كانت نقابة المحامين هى ملجا من لا ملجا له وكانت كل احزاب مصر بتعمل من خلال نقابة المحامين
لميس الحديدى:شكل العلاقة بقى بينكم وبين النقيب الجديد كما تتوقعها يعنى ؟
سعيد: اولا النقيب الجديد طبعا انا يعنى بقول لحضرتك ان النقيب الجديد ليس غريبا عنا النقيب الجديد كان معنا نقيبا للجيزة كان معنا عضوا لمجلس نقابة الجيزة فى فترة زادت عن ال20 سنة وتعاملنا معا والعلاقة بيننا علاقة زماله قبل ان تكون علاقة نقابيه ليس غريبا عنا ولسنا غرباء عنه يحكم العلاقة بيننا فى التعامل فى المرحلة القادمة قانون المحاماه لايحة العمل الادارى داخل نقابة المحامين اللايحة المالية لنقابة المحامين كل شىء يمشى بعمل مؤسسى وبعمل قانونى يريح الجميع يريح السيد النقيب ويريح الاعضاء ويريح كافة اطراف العملية النقابيه فى مصر
لميس الحديدى: هل يقلقك ان تتحول النقابة من نقابة راى ونقابة سياسيه زى ما حضرتك كنت بتوصف الى نقابة خدمية ؟
سعيد: لن يحدث على الاطلاق
لميس الحديدى: ايه الضوابط والمعايير ؟
سعيد: لان هذا الشان يعنى نحن نعتبر العمل القومى والعمل السياسى داخل نقابة المحاميين جزء من العمل المهنى داخل نقابة المحامين المحامى هو فى الاصل فرد من افراد هذا المجتمع يتاثر بما يحدث فيه من وقائع ومن تغييرات سياسيه او اقتصاديه او اجتماعيه دور نقابة المحامين القومى يتعامل مع هذه الاشياء حتى يصب فى النهاية فى مصلحة المحامى من صميم عمل نقابة المحامين ان يكون هذا المحامى يعيش فى ظل مجتمع وليس فى مجتمع المحامين المجتمع العام مصر اجمالا يعيش حياة مستقرة حياه هادئة اقتصاديا واجتماعيا وسياسيا
لميس الحديدى: استاذ سعيد عايزة اسئلك السؤال الذى ربما يتحرج النقيب فى ان يساله وقال انه لن يساله لاحد منكم هل التقى بيكم المهندس احمد عز امين التنظيم بالحزب الوطنى ؟
سعيد: اولا انا لست عضوا فى الحزب الوطنى سعيد عبد الخالق مستقل
لميس الحديدى:انا فاهمة طبعا وعارفة ده بس ربما التقى بمجلس النقابة عموما
سعيد: لا هو ملتقاش بمجلس النقابة حضرتك وبرضه فيه هنا جزئيه لازم نوضحها ان الحزب الوطنى لم يكن طرفا اصيلا فى العمليه الانتخابيه الحزب الوطنى لم يكن له مرشحين منتمين الى الحزب الوطنى
لميس الحديدى: ولا السيد سامح عاشور ؟
سعيد: ولا السيد سامح عاشور لما فتحت العمليه الانتخابيه وتقدم المحامي للترشيح لم يتقدم منهم واحد تحت شعارالحزب الوطنى
لميس الحديدى: استاذ سعيد انت رجل سياسة وتعرف مش لازم يكون تحت شعار الحزب الوطنى ..؟
سعيد: انا هوضح حاجة حضرتك ان الفريق الذى نزل تحت شعار الحزب الوطنى نتيجته لم ينجح احد الذى نجح هو القائمة القومية والقائمة القومية لم تكن تحت شعار الحزب الوطنى شعار الحزب الوطنى اعلى من فيه حصل على 4000 صوت او 5000 صوت اما القائم القومية سواء كان منتمى للحزب الوطنى او منتمى الى اليسار او منتمى الى الحزب الناصرى كان تحت شعار القائمة القوميه لم يدخل الحزب الوطنى هذه المعركة بقائمة لكن فريق منتمى الى الحزب الوطنى نزل بقائمة منفصله وكان على راسها الاستاذ سعيد الفار ومجموعه منتمين الى الحزب الوطنى اعلى الاصوات فيهم كانت 5000 صوت
لميس الحديدى: لكن انت تقول لى ان السيد سامح عاشور لم يدعمه الحزب الوطنى لان دا الكلام السائد الحقيقة؟
سعيد: شوفى حضرتك هناك فارق كبير بين ان الحزب الوطنى يدخل هذه المعركة فى مواجهة الاخوان المسلمين منضما الى طرف وان يدعم طرف فى المعركة الانتخابيه لما كانت المعركة ما بين القائمة القومية و الاخوان المسلمين دعم الحزب الوطنى القائمة القوميه هذا شىء فى عالم السياسه شىء معروف وشىء مباح ان تاتى النتيجة بانتصار القائمة القوميه فينسبها البعض الى الحزب الوطنى انا هنا بعترض وبقول لا نوقف
لميس الحديدى: لكن بمناسبة الاجتماع اللى كان مكتوب فى الجرايد النهارده هل دعيت طيب لهذا الاجتماع اعتذرت مثلا ؟
سعيد: لم يحدث ان دعيت ولم يحدث انى انا اعتذرت
لميس الحديدى:اشكرك الاستاذ سعيد عبد الخالق عضو مجلس نقابة المحامين ومبروك ليك على الفوز الاستاذ طارق عبد العزيز المحامى مساء الخير يا استاذ طارق
طارق:مساء الخير يا استاذة لميس
لميس الحديدى:مساء النور اتفضل
طارق:انا يعنى فى البداية بشكرك طبعا على طرح هذا الامر النقابى فى هذا البرنامج الرائع وان احنا كمحامين سواء فى الاقاليم او فى مصر كلها بنشكرك على اهتمامك بنقابة المحامين وبنقيب المحامين ثانيا طبعا انا بهنى استاذ حمدى خليفة على نجاحه وبنقدم كل الشكر والتقدير للنقيب السابق الاستاذ سامح عاشور على ما اداه فى الفترة السابقة وانا عايزه ادخل فى الموضوع يا استاذه لميس بسرعة فى 3 ، 4 امور يعنى الامر الاول انه استعادة نقابة المحامين من القبضة التى كانت تسيطر عليها لمدة 30 سنة
لميس الحديدى:من قبضة الاخوان يعنى ؟
طارق:اه طبعا كان امر حيوى وامر ضرورى وكان لازم نتكاتف فيه جميعا انا عايز احكيلك واقعه يا استاذة لميس
لميس الحديدى: سريعا بس يا استاذ طارق علشان وقت البرنامج
طارق:انا عايز اقول لحضرتك فى عجالة انه مبدا المساواة فى ال30 سنة اللى فاتوا ما كانوش موجودين لدى المحامين يعنى عايز اقول لحضرتك انه الدعم كان بيوجه لفئة لم تكن من المحامين العاملين لم تكن من المحامين الذين يمارسون المهنه الفئة اللى بتروح تصوت يوم الانتخابات وبس كان فيه ناس بتحمل الكارنيه فى جيبها علشان يوم الانتخابات تروح تصوت لكتله معينة تصل بها للسيطرة على النقابة انا احد المحامين فى قريتى يا استاذة لميس مراته ولدت لما اتكلمت مع مجلس النقابة علشان يديلوا فلوس ادالو 200 جنيه وانا رايح احلق عند الحلاق بتاعى فى يوم لقيت الحلاق بيقولى انا الجهاز دا جايبه من نقابة المحامين قلتله بكام ده ؟ قالى 10000 جنيه قالى انا محامى الحلاق اللى بيحلق بياخد 10000 جنيه اللى مرحش محكمة واللى مترفعش فى محكمة والمحامى اللى بيشتغل والمحامى اللى المفروض ان هو يدعم ما كنش بياخد حاجة كانت سيطرة الاخوان المسلمين على النقابه امر مفزع للمحامين يعنى انا مش عايز اتكلم فى المساله دى لكن النقيب حمدى خليفة وانا من الناس اللى انتخبوه يعنى عاتب عليه احنا عندنا فى المنصورة يا استاذة لميس معركة شرسه على مقعد محكمة المنصورة الاداريه ما بين الاخ سعيد زكى وما بين احد قيادات الاخوان المسلمين فى الدقهليه ما بين واحد من ابرز قيادات الاخوان المسلمين فى الدقهليه كانت معركة كانت بتم بالصوت زدنا 2 زادو 3 زادو 5 زدنا 7
لميس الحديدى: يعنى انت متفائل يا استاذ طارق ؟
طارق:احنا مع الشرعية يا استاذة لميس احنا سندعم حمدى خليفة حط ايده فى ايد الاغلبيه وفى ايد الناس لان احنا حسينا ان النقابه رجعت انا مرحتش النقابة من 30 سنة كارنيهى اللى انا استخرجته السنة اللى فاتت بعت محامى جابه يعنى النقابة احنا كنا غرباء عليها ومنتظرين من الاستاذ حمدى خليفة مش مساله المبانى وبس احنا اخترنا نقيب عظيم وان شاء الله ربنا يوفقه مش مقاول هنبنى النقابة وهنبنى شقق وهنبنى المصايف احنا عايزين دعم للمحامين الشبان عايزين مكتبة المحامى الشاب اللى مش عارف يجيب كتب عايزين المجلة اللى مطلعتش بقالها 10 سنين عايزين معرض المحاماه عايزين لايحة تعنى مبدا المساواه بين المحامين
لميس الحديدى: اشكرك استاذ طارق عبد العزيز نقطك كفاية واضحة ومهمة يعنى قبل ما اسألك فى الرد على كلام الاستاذ طارق وكلام الاستاذ سعيد هل صحيح ان كان عندك مشروع او لديك مشروع بحصانة ليه المحامى تشبه الحصانة القضائيه ؟
حمدى خليفة: دى حقيقة يعنى انا من ضمن البرنامج اللى انا طرحته واللى انا فرضته على نفسى انه من شان هذا البرنامج الاهتمام بالجانب المهنى ودوت بردوا ردا على كلام الاستاذ طارق انى انا مش جاى علشان اعمل مشروعات وبس انا جاى بتحرك فى 3 محاور زى ما قلنا فى مستهل الحديث المحور المهنى والمحور القومى والمحور الخدمى المحور المهنى دا اهم المحاور باعتبار انها نقابة مهنيه انا عندى مثلا نصوص قانون غير مفعله والمفترض انى انا افعلها عندى مثل نص المادة 47 قانون السلطة القضائية التى تربط تعين المحامي بالقضاء يجب ان يتم تفعيل هذه المادة التى كان معمول بيها من 25 سنة عندى نص المادة الاولى من قانون المحاماه والتى تنص على ان المحاماه مهنة حرة تشارك السلطة القضائية فى تحقيق العداله بما اننا شاركنا السلطة القضائية فى تحقيق العداله يبقى يجب ان اتمتع بما تتمتع به السلطة القضائية
لميس الحديدى:اه بس هذه الحصانة ربما تختلف تماما عن تعديلات قانون المحاماه الاخير
حمدى خليفة: وعلشان كده انا لما الدكتور فتحى سرور اتصل بيا فى اليوم التالى قلتله بعد ما هنانى قلتله يا دكتور هتجدنى بمشيئة الله قريبا عندك ومعايا مشروع قانون جديد للمحاماه اضيف بيه الايجابيات التى انتقصت من المحامين فى الفترة السابقة واحذف فيه السلبيات اللى هى تم تمريرها فى القانون 197 يعنى قانون 197 يعنى كان واضح تماما انه لم يكن مرادا منه المساله الانتخابيه
لميس الحديدى : طب انت عضو اتحاد الكتاب انا بعمل كده شرش فى الورق بتاعى لقيتك عضو فى اتحاد الكتاب ولقتيلك كتب اعدائك بيستخدموها ضدك خلينا اكون صريحة سفاح ليلة الدخلة وحافة الهاوية كتبتهم امتى الكتب دى ؟
حمدى خليفة: الكتب دى انا كتبتها يمكن كان اخر حاجة كان من 20 لى 10 سنين اه يعنى انا كان دائما القضايا اللى عندى انا كنت بحولها دائما بالشكل القصصى
لميس الحديدى: يعنى دى قضايا.. ؟
حمدى خليفة: قضايا حيه انا بحولها لى شكل قصة وعلى فكرة كويس انك انتى كلمتينى فى الموضوع ده لانى انا برضه عاملت حسابى وجبت معايا الكتاب علشان ايه وجد بردوا جريدة من الجرايد يعنى كاتبه بموضوعية شديدة عن هذا الكتاب لانى انا فاكر مثلا القصة بتاعة سفاح ليلة الزفاف انا ما كنتش فاكرها بس انا لقيتهم نقلنها من الكتاب وكتبناها فكتبناها بحذافيرها كاتبين القصة بحذافيرها قصة بوليسيه يعنى كانت عبارة عن واحد من المفترض انه يتزوج فحصل انه هو ما تزوجش خطيبته وانها تزوجت بغيره فا عملت عنده روح انتقام فبقى ينتقم من كل زوجة تتزوج اه فلاقيتهم منزلنها كلها بالحرف الواحد ادى الكتاب مثلا
لميس الحديدى: يعنى ما بتعتبرش ان دا يضايقك فى سيرتك الذاتيه ؟
حمدى خليفة: دى قضايا حيه يعنى دى قضايا حيه ادى الكتاب اهو عبارة عن قضايا دا الكتاب اللى انا بسببه بقيت عضو اتحاد الكتاب يعنى انا لما خدونى عضو اتحاد كتاب وعضو نادى قصة خدونى بعد ما قيموا هذا العمل
لميس الحديدى: حضرتك ايضا خد البكالوريوس متاخر شوية مش كده او الليسانس متاخر شوية ؟
حمدى خليفة:انا كنت زى ما قلت لحضرتك انى انا شاركت فى حرب 73 وفى الترة ما بين دخول القوات المسلحة او الخروج من القوات المسلحة كان فيه القوى العاملة كانت بعتتلى خطاب باعتبار انى انا معين بوظيفة اداريه مجرد ما خرجت من القوات المسلحة تقدمت فى اليوم التالى مباشرتا بالاستقاله يعنى انا مجرد
لميس الحديدى:كنت فين فى وزارة العدل على ما اعتقد ؟
حمدى خليفة:ما عملتش كان تعيين على الورق
لميس الحديدى:قالوله برضه كان بيعمل فى جلسه محضر حاجات كده
حمدى خليفة:لا دى الحاجات اللى هما حبوا يستغلوها
لميس الحديدى:مش عيب انا بعتبر دا صعود مشرف يعنى ؟
حمدى خليفة: لا لا لا اطلاقا انا عمرى هقول لحضرتك على حاجة انا عمرى ما بنكر اى شىء من الممكن يكون فى حياتى سواء سلبى او ايجابى عمرى ما انكر اى حاجة لانى انا تعود انى انا يبقى عندى مصداقيه مع الجميع زى ما اكون صادق مع نفسى انا احب دايما انى انا اكون صادق مع نفسى لما جانى بقى خطاب القوى العامله وانا فيه القوات المسلحة خرجت فى اليوم التالى مباشرتا تقدمت باستقالة وعملت بالمحاماه هما بيحاولوا بالكلام ده بيعملوه من 25 سنة لانهم كانه بيهاجموا بيه على اتعبار انهم اعتقدوا فى يوم من الايام ان الكلام ده ممكن ينتقص منى لكن انا لا مبردش على الكلام اللى هو خارج الموضوع
لميس الحديدى: رئيس نقابة او نقيب المحامين المصريين هو بالتبعيه هو نقيب المحامين العرب لان مصر هى دولة المقر لكن حضرتك مالكش باع فى النشاط العربى ولا ليك وانا معرفش ؟
حمدى خليفة: لا دا انا يعنى نقابة المحامين اول نقابة مهنية فى الشرق الاوسط متمتعه بعضوية مستقله فى الاتحاد الدولى للمحامين
لميس الحديدى: يعنى قضايا المحامين العرب وخلافاتهم وهذه دول عربيه وان الحقيقة النقيب سامح عاشور كان ليه باع فى هذه القضيه كنائب كمان رئيس الحزب الناصرى وواحد له توجه سياسى وعضو مجلس شعب اسبق شايف ان انت هتستطيع القيام بدور مهم ؟
حمدى خليفة: وانا نقيب فرع الجيزة احنا تفوقنا على انفسنا فى هذا المجال وكنا بنتابع القضايا العربيه على مستوى العالم العربى كله بالكامل واحنا اول نقابه فى الشرق الاوسط اقامت دعوة جنائية ضد بوش وشارون وبلير لمحاكمتهم كمجرمى حرب ان احنا من خلال الاتحاد الدولى للمحامين يعنى حصل العديد من البروتوكولات ما بينا وبين فرنسا وما بينا وبين استراليا وما بينا وبين الدول العربيه كلها بالكامل يعنى المساله بالنسبالى مهياش جديدة دى مرحلة انتقاليه يعنى اتحاد المحامين العرب مرحله انتقاليه بالنسبالنا نفس الدور اللى احنا كنا بنشغله فى نقابة الجيزة هو نفس الدور فى نقابة المحامين العرب
لميس الحديدى: انا بشكرك شكرا جزيلا انا متشكرا ان حضرتك يعنى جتلنا فى هذا البرنامج على الهواء مباشرتا نحترم ثقتك بنفسك واحترمك يعنى احساسك انك ستكون قادر ان شاء الله على هذه المهمة القادمة نقيب المحامين الجديد السيد حمدى خليفة يقول انه لن يسدد فاتورته الا للمحامين مش هتسددها للحزب الوطنى مش هتسددها للاخوان المسلمين هيسددها فقط للمحامين الذين انتخبوه نتمنى ان تكون وعوده صادقه هنتابع معاه ماذا سيحدث لى 400 الف محامى اللى هما اعضاء فى هذه النقابه اشكركم شكرا جزيلا وهذه لميس الحديدى تحييكم وتصبحوا على خير .