"إحنا آسفين يا مسودة"..رد المصريين على التراجع عن استدعاء سفيرنا من إسرائيل

أثار ما تداولته المواقع الإخبارية عن نفى مصدر مسئول لاشتمال البيان الصادر عن رئاسة مجلس الوزراء على أى إشارة تتعلق باستدعاء السفير المصرى من تل أبيب وأن ما تناولته وسائل الإعلام كان مجرد مسودة وليس البيان النهائي وأن الاستدعاء كان يخص السفير الإسرائيلى وليس المصرى، استفزاز مشاعر المصريين وفجر موجة من الغضب والإحباط بينهم.
عبّر المصريون عن غضبهم تجاه ما شعروا به من امتهان لكرامة المصريين بعد الثورة وإحباط مما اعتبروه تخبطا فى الموقف الرسمى للدولة التى ظهرت كشخص أصابه الدوار حيث كانت طموحاتهم وتوقعاتهم أن تتغير السياسة الخارجية تجاه إسرائيل بعد الثورة، وأن تتوقف مصر عن التساهل مع العدو الإسرائيلى، وشعر المصريون بالغضب لأنهم اعتبروا أن استدعاء السفير المصرى وطرد السفير الإسرائيلى هو أقل رد حازم يجب أن تتخذه مصر على انتهاكات إسرائيل لحدودها بشكل مستمر.
دفعت تلك الهجمات المستفزة من قبل إسرائيل المصريين للبحث والتنقيب على نص معاهدة السلام الموقعة بين إسرائيل ومصر وإعادة قراءتها من جديد والمطالبة بتعديلها.
وشن المصريون حملة ساخرة على تويتر انتقدوا خلالها ما اعتبروه تراجعا عن قرار استدعاء السفير المصرى، والتخبط الرسمى الذى بدا لهم فى صدور أكثر من بيان عن مجلس الوزراء، ونفى المجلس لأحدهم، وإعلان المجلس عن بيان ثم نشر بيان مختلف تماما، ثم الاعتذار عن نشر البيان الثاني بعد تداوله في كل وسائل الإعلام باعتباره مسودة مطالبا بإقرار البيان الأول ومن أبرز التعليقات التى تضمنتها تلك الحملة:
- عاجل | خاص | ف ش خ : اختفاء سفارة إسرائيل بعد بيان مسودة مجلس الوزراء.
- قالك ضحكوا عليا وشربونى حاجة مسودة.
- ونستفيد من كده إن الناس لو كانوا سمعوا الكلام ومشيوا من عند السفارة الإسرائيلية كان نقبهم هيطلع على "مسودة".
- يا خوفى الثورة تطلع هى كمان مسودة
- احنا آسفين يا مسودة
- فنزويلا تطرد السفير الإسرائيلى وإحنا عملنا مسودة
- اللى تفتكره بيان.. يطلع مسودة.. وعجبي.
- مصر: المرة دى بيان.. إسرائيل: وبعدين؟. مصر: خلاص مسودة المرة دى.
- يا خبر بفلوس يطلع عليه النهار يبقى مسودة.
- حكومة شرف طلعت حكومة مسودات، من الآخر طب يا ترى المجلس بقى إيه النظام ولا هو بس البيانات على الفيسبوك وخلاص.
- يعنى أنام شوية أصحى ألاقيهم سحبوا البيان، خايف أنام بعد كده أصحى ألاقيهم رجعوا مبارك، وقالوا خطاب التنحى كان مسودة برضو.
- لما التليفزيون المصرى يعلن الحداد على أرواح الشهداء 3 أيام ويشغل قرآن بس ساعاتها مصر تأخد موقفا حقيقيا مش مسودة من إسرائيل.
- نصوم نصوم ونفطر على مسودة.
- على كدة بقى أسماء محفوظ دى خايبة قوى، كان المفروض وهم بيحققوا معاها فى النيابة العسكرية تقولهم إن اللى كتبته ده كان مسودة، كانت هتطلع منها زى المجلس من البيان اللى نفوه.
- واللى مرتبط بواحدة وعاوز يخلع منها يقولها إن وعده ليها ده كان مسودة بقى يا جدعان.
- هو ممكن يكون ال 72 بيانا بتوع المجلس مسودات وإحنا اللى فهمنا غلط؟.
- المصرى اللى على حق يقول للمسودة لأ.
- ونقول للسفير المصرى فى إسرائيل الحركة بركة ولا إنت مش حابب تعيّد مع أهلك فى مصر ولازق فى المسودة.
- إن كان لك عند الكلب حاجة إعمل له مسودة وخبيها بسرعة.
- يادى النيلة إيه قلة الدم دى. هو إحنا بنقول عاوزين نطرد السفير يقوموا هم يبعتوا لنا واحد تانى، هنلاحق مسودات على مين ولا مين؟
- إذا الشعب يوما أراد البيان.. إديله المسودة عشان ينام.
- المسودة خط أسود والبيان خط أحمر.
- الحكومة الثائرة بحق هى التى تجتمع ليلا لتصدر بيانا ثم تهدأ صباحا وتقول إنه مسودة.
- ياريت كانت كل بياناتكم مسودة بس بشرط متقولوش عليها بعد كدة أنها مسودة وتنفوها.
- الراجل البرنس اللى بعت المسودة بالغلط .. إبقى بص فى الإيميل كويس قبل ما تبعته.. هتجيب شلل للشعب الله يسامحك.
- اللى حصل ده دليل على إن اللى بياخدوا القرارات مش متفقين مع بعض، وفيه خلافات واختلاف فى وجهات النظر وده مش كويس لازم يحددوا موقفهم بقى.
- ونحب نطمن أشقاءنا الإسرائيليين إننا عاملين المسودة دي مخصوص علشانكم عشان لو ماعجبتكوش كلمة فيها نبقى نمسحها عادي.
- صدر بيان من مجلس الوزراء بشأن خطأ في.. البيان الثاني: حيث إنه كان يتضمن سحلب للسفير وليس سحب السفير.
- شرف: لم أكن انتوى سحب السفير.
- ما الفرق بين المصيبة والقضاء والقدر؟ القضاء والقدر أن مجلس الوزراء يطلع بيان بسحب سفير مصر فى إسرائيل والمصيبة أن البيان يطلع مسودة.
- يا خوفى ليكون خطاب التنحى مسودة هو كمان.
- من حق كل وزير عدد 2 مسودة و 3 تكذيب والله الموفق.
- السفير الإسرائيلي: المسودة التي لا تطردني.. تقويني (مثل عبري قديم).
- إزاى نتأكد أن التليفزيون المصري مش بيقرأ من المسودة؟.
- رب مسودة خير من ألف بيان.
- عمركوا شفتوا مسودة متنسقه كده؟ بعدين هو قرارت الاجتماع في المسودة جت من الهوا يعني؟ مش المفروض تكون اتاخد بيها قرار في الاجتماع.