قواعد «القبض» العشرون

وسام سعيد
في مثل هذه الأيام التي تكتسي باللون الكحلي المحبّر.. وتحت وطأة هذه الظروف العصيبة.. وفي وقت يزيد فيه سعر الجنيه مع كل طلعة شمس.. اختلف طعم يوم «القبض» عن زمان.. ذلك اليوم المشهود، الذي تلتقي فيه بكل حبايبك واللي مش حبايبك كمان، فيوم القبض كانت له «تفتيحة» عين مختلفة لحظة استيقاظك من النوم، فضلا عن أحاسيس أخرى مختلفة من شخص لآخر تتوحد وتشترك في فرحتك حينما تضع «اللفة المكلبظة» في جيبك، وتتحسسها كل ربع ساعة فرحا بها.
وفي طريق عودتك للبيت ، لا مانع من زيارة ل «صلاح الدين» حاملا بعض أكياس المكسرات المحمصة ، «نص كاجو على ربع لوز على تمن عين جمل» ، وزيارة مثلها للفكهاني بحثا عن طقم «عويسي» محترم متحزم ب 2 كيلو موز مستورد وحوله 2 كيلو تفاح أمريكاني لزوم الدلع… فتشعر أمام نفسك أنك أمام يوم مهيب .. يوم مختلف ..
انسى اللي فات
كل هذه المشاعر الجميلة والذكريات اللذيذة في واقع الأمر أصبحت ماضٍ وانقضى ، ولو حاولت جاهدا استرجاع الماضي فأنت أمام محاولات رفع جبل المقطم ، خاصة في مثل هذه الأيام التي أصبح المرتب فيها ، مثل نكتة لطيفة ، أو طيف هواء منعش وسريع ، لذلك أقدم لك زميلي المواطن مجموعة من القواعد وباللهجة العامية ، للتعامل مع هذا الشبح الذي يهل علينا مطلع كل شهر ، لعلنا نحصل على أكبر قدر من الصمود والمقاومة في هذا البلد إلي أن يأذن الله ويأتى الفرج أو نقابل رب كريم.
قواعد القبض العشرون
1 - منذ لحظة استيقاظك استعد لقائمة طلبات زوجية ستجدها على «التسريحة» فلا تبحث عن حجج ، وتقول ما شفتهاش ، ومش هتقدر تعمل من بنها علشان انت أصلا مقضيها حجج من أول الشهر ، فخدها من سكات وقول حاضر
2 - اعمل حسابك وانزل بأحلى لبس عندك ، علشان انهارده هتشوف بشر ما بتشوفهاش طول الشهر .. قبض بقى !!
3 - إوعى علشان فيه فلوس تصعب عليك العربية ، ومن صوتها العالي تقول لنفسك : بقالي كتير ما غيرتش الزيت أو سيور الدينامو والكاتينة .. طنش وخد طريقك عادي
4 - وانت بتركن إدي السايس اللي هو عايزه وما تهربش منه .. جمد قلبك واطلع بالخمساية ..وخليه يفتح لك الباب ..وعيش اللحظة
5 - اتقل وانت داخل ع الخزنة واعمل نفسك هادىء ومش فارقة معاك ..مهما لاقيت نسور جارحة بتعدي من جنبك علشان طابور القبض
6 - وانت في الطابور ارمى سلام بصوت عالى وافتح موبايلك واتسلي فيه بدل ما ترفع عينك وتضطر تسلم على الطابور كله كأنك بتاخد العزا
7 - مش هتتساب من «باراشوتات» الرغي اللي هتهبط عليك ، فخليك مرن وتقبل كل وجهات النظر واضحك على كل الإيفيهات ..خلينا نخلص
8 - امسك أعصابك وانت بتسمع ضحك زميلتك اللي قدامك من نكت وإيفيهات موظف الخزنة …لأنه بيبقى في اليوم ده بيخنف وبيبقى ظريف حبتين وحافظ له كام نكتة جداد مخزنهم لليوم ده
9 - طبعا معاك انت هيأتم ويقلب وشه ويسألك بجدية : رقم تأمينك كام يا بيه؟! .. إوعي تنقح عليك كرامتك
10 - قانون الخزنة بيقولك عد وراه ..لو ناوي يبقى خطف قبل ما ياخد باله لأن ده مش في صالحك الشهر الجاي ..انت اتجننت وبتعد وراه ؟!!
11 - ما تحاولش تبص أو تقرا حاجة أو تفهم حاجة في ورقة المرتب لأنك مش هتفهم إيه اللي اتشال من إيه اللي اتحط فريح نفسك
12 - حط فلوسك في جيبك ..وعلى أقرب حمام لزوم العد و«الخنصرة» .. أكيد هتركن حاجة .. بس لو عرفت تخنصر من مراتك ..هتخنصر إزاى من صندوق «تحيا مصر» اللي مش هيسبلك الفكة
13 - هتلاقي بتاع البوفيه في وشك أول واحد بيصبح عليك طبعا .. عسِّفه وشقِّيه وخليه يجيبلك كل طلباتك بعدين حاسبه
14 - احذر ..ثم احذر ..ثم احذر من خفافيش الظلام .. وطيور «السلَف» التي تجوب المكان بحثا عن فريسة … لأنهم كتير وعارفين بيعملوا إيه وفين وإزاي ولا تأخذك بهم رحمة ولا شفقة مهما قالك إن أمه بتعمل عملية وإنه ما دفعش مصاريف أتوبيس بنته .. خلي قلبك كورة جلد
15 - فيه واحد في التوقيت ده بيدور عليك …ومعلَّق لك ورق «مطلوب حيا أو ميتاً» …ده زميلك بتاع الجمعية .. لو شاطر استخبى منه لأنه مش هيسيبك ..ولو عرفت تفلت منه في الشغل هيجيبك ع البوابة الرئيسية …روح له أحسن وسلّم «المعلوم» تسليم أهالي …المهم إن نفس الشخص ده مستحيل تلاقيه لما يجي عليك الدور في قبض الجمعية !!
16 - عارف إنك نفسك تفرش ع الأرض وتفضل تقسم في الفلوس …دول فاتورة كهربا … ودول صيانة .. دول فاتورة موبايل … ودول فراخ ولحمة .. ودول للسوبرماركت ..بس معلش كده كده هتفرش الفرشة دي غصب عنك على السرير لما تروح بس قدام المدام ..فالتقسيمة مش بتاعتك يا نجم!!
17 - طبعا انسى «صلاح الدين» بتاع المكسرات والفكهاني والمانجا العويسي …ممكن تشاورلهم باي باي وانت معدي جنبهم …على أمل اللقاء لما تنصلح أحوال الجنيه قدام الدولار ..وابقى تعالي قابلني هناك !!
18 - قبل ما تكون قلعت بقية هدومك هتكون سلمت المرتب تسليم مفتاح للمدام … كده انقطعت صلتك بالفلوس دي ..خد منهم بعد كده بمفاوضات أو سلت من شنطتها وهى نايمة .. عد إلي القاعدة رقم 12 واستفيد من الدرس الشهر الجاي
19 - عايز تقول إن «عربيتك» محتاجة زيت وسيور وصيانة .. قول بس ما تنتظرش رد … وهتلاقي جمل محفوظة ممكن تساعدك زي : إن العربية دي إيدنا ورجلينا …والعربية دي غرفة من البيت بس متحركة … ولا الدموع !!
20 - وأخيراً .. احفظ مكان فلوس الخنصرة .. لأن المخبأ ده لو اتقفش .. هتلاقي المدام مسنياك الشهر الجاي على باب الخزنة