قاعد في البيت لا بيك ولا عليك وشغال حريقة سجاير من الغلب اللى انت فيه وبتحسبها ليل ونهار المرتب مش بيكفى لحد يوم 12 في الشهر وتدور على حد يسلفك عشان تكمل لحد آخر الشهر. تدخل عليك المدام اسم النبى صاينها وحارسها ماسكة ورقة في يدها اللى عايزه قطعها وأول ما تشوفها جاية وضحكتها الحلوة والشعر الحرير على الخدود يهفهف ويرجع يطير قلبك اللى عمره ما كدب عليك يقولك إن فيه مصيبة جايلك وانت تغنى" حاسس بمصيبة جيانى يالطيف يا لطيف.. مصيبة مكانتشى على بالى يالطيف يالطيف.. وتلاقى المدام بتقولك دى الطلبات بتاعة العيال عشان المدرسة بعد أسبوعين.. ومن ضمن الطلبات خمس كروت شحن من فئة المية جنيه. تلاقى نفسك تصرخ يا سلام وبعدين أنا عندى تلاتة بس في المدرسة.. ثم إن البنت المفعوصة اللى في سنة تانية عايزة بمية جنيه شحن ليه حرام عليكم خافوا ربنا بقى فاهمة ؟.. تلاقيها ترد عليك بمنتهى البرود لا الكروت دى مش للعيال دول للمدرسين. من غير وعى تصرخ مدرسين مين هو انا خلفتهم ونسيتهم طب شوفيهم بالمرة يمكن يكونو عايزينى أجيب لكل واحد منهم موبايل أو لاب توب ؟.. تلاقيها تضحك وتقولك لا فيه حد غيرك جاب الحاجات دى احنا اخترنا أقل حاجة عشان ظروفنا. تسألها وده كل شهر ولا كل سنة؟.. تلاقى المدام ترد عليك رد يحرق الدم إن ده طبيعى جدا عشان المدرسين ياخدوا بالهم من العيال لازم تشحن كل شهر بمية جنيه ده غير فلوس الدرس طبعا ودى هدية. وتكمل الست هانم بمنتهى البرود وإيه يعنى 500 جنيه كروت شحن ده يخليك تضمن إن عيالك من الناجحين وبدرجات ممتازة وبعدين كل الناس بتعمل كدة. وتحط رجلها على التانية وتقولك ياراجل "اطعم الفم تستحى العين " ولازم تعمل كده عشان العيال يبقى ليهم دهر في المدرسة والمدرسين ياخدوا بالهم منهم وتحط ايدها على رأسها لازم تشغل مخك فهمت ؟ تقولها طيب انا لو قلت ياعم الببلاوى شيل عن الناس البلاوى المدرسين يزعلوا منى ولا حاجة ولا ممكن يسقطوا العيال. تلاقيها ترد عليك والله براحتك بس انت اللى خسران وساعتها ما تلوم الإ نفسك وانت حر عشان 500 جنيه تكسر عيالك قدام زمايلهم فكر في مصلحة العيال ربنا يهديك روح ادفع. تهرش شعر رأسك وتسألها على اقرب سنترال عشان تشحن للأساتذة وأمرك لله ؟ ترد عليك لا فيه سنترال متعامل معاهم تدفع فيه ويكتبو اسمك ده سستم مش أي كلام. تلاقى نفسك بتصرخ بعلو حسك: أنا مخنوووووووووووووووووووووق !