يوميات مواطن مخنوق.. حلقة رقم (6).. حماتي ترش المتحرشين بمبيد حشري!

تدخل بيتك تلاقي همس وغمز وكلام غير مسموع تحاول تفهم من الست مراتك الحكاية
ترد عليك بمنتهى العبط إنها الطرشة في الزفة ومش فاهمة حاجة خالص
يطالبك الفضول إنك تعرف الموضوع بأى شكل
وتقرب منك المفعوصة الصغيرة وتحط يديك في جيبك وتطلع لها جنيه حديد عشان تغريها
تلاقيها تبص لك بتعجب وترد عليك بصوت عالي وتطلع من جيبها خمسين جنيه جديدة لسه طالعة من البنك المركزي وتقولك "تيتة "وطلبت منها السرية وتقولك تفتكر إنها تضحي بخمسين جنيه عشان جنيه ده يصح؟
تسكت وتحاول تتحايل عليها وتقولها إنك أبوها وإنك ليك حق عليها
ترد عليك: وهى "تيتة" وليها حقوق بخمسين جنيه واللى يدفع أكتر حقوقه أكتر. في محاولة منها أن تكسب أكتر
وبما إنك من خريجي مدرسة
"العين بصيرة واليد قصيرة"
والكلام الحلو أحلى مليون مرة من مليون جنيه
تشوف بنتك رافعة حواجبها وتعطيك تكشيرة تقطع الخميرة من البيت وعلى طريقة ريا وسكينة تصرخ انسى يا والدي قطيعة محدش بياكلها بالساهل
تلاقي الست مراتك جاية ومتغاظة وتسألك: عرفت حاجة؟
وتبص على ولاعة عشان تولع فيها لكن حظها الحلو إنك بطلت السجاير من شهر وتكتم غيظك وتسألها: حماتي حبيبتي فين؟
تسمع خبط على الباب والجرس يتحرق من كتر الرن وتسأل: هو فيه إيه؟ وركبك من الآخر شغالة تكسير في بعض وقلبك توقف من كتر النبض وجسمك بيترعش وحنفية العرق اتفتحت
المدام بقى وشها أصفر وعيونها جالها "حول" والرعشة مسكت فيها تحاول تهديها وتقولها ما تخافيش وراكي راجل
وفجأة تدخل عليكم "ست ستات" في السبعين من العمر "لابسين جلد نمر طبيعي محزق" وينادوا في صوت واحد على حماتك
وتخرج حماتك "لابسة" نفس اللبس وتصرخ: لقد بدأت المهمة. تبص على مراتك: مهمة إيه هما خلاص رايحين ينتحروا؟
تلاقي المدام تقرب من الست حماتك وتحاول تفهم منها مهمة إيه؟
وتصرخ حماتك وتطلع "المبيد الحشري" هو الحل
تشك إن الست حماتك جاتها لوثة ناوية تنتحر بالمبيد الحشري انتحار جماعي ومعاها الستات الستة
وتلاقي نفسك بتقولهم أخدتم إيه من الدنيا والله الأيام السودة دى أحسن حاجة فيها الانتحار
وتكشف حماتك عن المهمة وإن العيال المتحرشين دول عبارة عن "صراصير" وهنقضي عليهم بالمبيد ده
وإحنا مجموعة الستات الأحرار قررنا تأديب المتحرشين بالمبيد الحشري عشان أحفادنا يعيشوا في أمان
وتسألهم بإعجاب: طيب ولو تحرشوا بيكم تعملوا إيه؟
تسمع ضحك وسهوكة من حماتك وصحبتها وترد عليك حماتك: وماله؟ ما هو ده المطلوب عشان المبيد يبقى سريع المفعول ونخلص منهم على طول
تصرخ حماتك صرخة على "المتحرشين يا ستات حماية أحفادكم واجبة"
وانت تصرخ: وأنا مخنوووووووووووووووق!