افرض جدلًا!!

إنك بعد ماتفرجت على مجموعة من المسلسلات التركية ودلع الست هيفاء وطعامة الست نانسى وإليسا ولّا اللى اسمها مروة ولّا الرقيقة ميريام حاجة ............................
وتدخل على السرير وتقول له يا حبيبى تعالى .
وبعد نوم جميل عميق شفت نفسك كده مع نانسى وهيفا وميريام والشلة الحلوة اللى تطوّل العمر .
وفجأة ومن غير مقدمات طلع لك بسم الله الرحمن الرحيم وقمت من النوم مفزوع وانت تصرخ: كابوس!!
تبص تلاقى جنبك ست الكل اللى هى المدام شغالة شلوت يمين وشلوت شمال وهات يا ضرب .
وخناقة حرمكم المصون مع عفاريت الليل.
وكمان تسمع صوت وشكمان بايظ عايز دكتور أنف وحنجرة، طبعًا على طول هتقول: أستغفر الله العظيم.
وترجع تبص تانى وتكدّب عيونك هو الكابوس اللى صحّاك من أحلى نومة؟!
وتسألك وهى فى شبه غيبوبة وتقول لك بصوت محشرج: فيه حاجة؟ خير!!
تلاقى نفسك بتدوّر من غير ما تحس على شاكوش .
عشان تهزر معاها شوية، وتعمل بالمثل اللى بيقول: ضرب الحبيب .
وترجع عيونك تبص على حرمكم المصون تدعى فى سرك، وتقول: حرمنا منها يا رب .
وفجأة ومن غير أى مقدمات تفوق وتصحصح وتلح فى السؤال: إنت سهران ليه؟ وتضحك ضحكة تخليك تكره اليوم الأسود اللى فكرت وجبرت بخاطرها وتجوزتها .
وتدّلع عليك شوية دلع ماسخ وضحكة تسد نفسك عن الدنيا واللى فيها .
وتستخف دمها اللى زى السم اللى يلطش بلد، وتقولك: إيه بتفكر فى أيام زمان يا حبيبى.
وترخّم عليك أكتر وتقول لك: قولى كلام حلو أصله وحشنى كلامك الحلو .
تقوم تحلف طلاق تلاتة إن البقال اللى عنده العثل خلص يا ثكر، وهى هات يا ضحك .
لو انت بقى مكانى تعمل إيه؟!