افرض جدلًا !!

إن الراتب خلص يوم 10 وتبص تلاقى نظرة حيرة وقلق فى عيون المدام وتسألك السؤال المحرج هنكمل بقية الشهر منين.
وتحاول إنك تفهمها إن ربنا موجود تقولك ونعم بالله. وتكمل إن الأسعار بقت نار والدنيا ولعت.
وتسألك هو ده زمن الانفلات مفيش خوف من حد والحكومة بقت زى الأسد العجوز. يعنى يموت أحسن.
تحتار فى الرد فعلا إحنا نعيش أسوأ أيام حياتنا.
. لكنك تضحك ضحكة حلوة كلها مكر وتقولها مفيش غير الأقارب والأصحاب والأحباب.
يوم هنا ويوم هنا ويعدي الشهر.
ونكسب من الناحتين الناحية الأولى صلة الرحم والناحية التانية نأكل أكلة كويسة.
تلاقى المدام تصرخ وتقولك كان زمان ياروح الروح. الله يرحم زمان وليالى زمان وأنت مصر على تنفيذ المخطط .
وتشد الرحال إلى بيت واحد من الأقارب وهات يا أحضان وقبلات.
ويعاتبك أخيرا افتكرت إن ليك أخ ياااه وفرحان قوى على إنك جيت النهاردة وعشان تعطى له فرصة يتصرف ويجيب لحمة ولا فراخ ولأنك أنت عارف المكر بتاعه روحتله بعد الظهر مباشرة.

وتبعت رسالة اطمئنان للمدام فرجت والحمد لله.
ولكن تلاقى مرات أخوك مكشرة وبوزها شبرين وتبص لجوزها عايزة تأكله وهو عامل نفسه مش شايف.
ويتظاهر أن الأمور عادية ويشخط فى الست هاتى الأكل الجماعة جاعوا.
وتبص تلاقى الست جايبة حلة عدس هو مش عدس عدس ممكن تكون مية ملونة.
وتلاقى أخوك يضحك هاهاها المحبة تستر.
وتلاقى العيال فى صوت واحد.. إحنا مش عايزين عدس.
وتلاقى ابنك البجح يقول إيه ياعمى مفيش لحمة بلاش مفيش فراخ بلاش مفيش سمك يعنى خابطين المشوار ده كله عشان العدس ما إحنا كل يوم بناكل عدس .
لو إنت مكانى تعمل إيه؟.