افرض جدلا!!

إنك قاعد تتابع بقلق اللى بيحصل على كوبري رمسيس
من رمى الحجارة والطوب والخرطوش وتفتكر رمى الجمرات فى الحج .
وتضرب كف بكف سبحان الله إيه اللى بيحصل فى مصر خلاص دمنا رخص للدرجة دى .
وانت مشغول تتابع بقلق وتلاقى ابنك اللى فى الصف الرابع الابتدائي يقولك ربنا ينصر مرسى على الكفار .
تسمع وانت مش مصدق وتطلب منه ان يقول مرة تانية فيقول ربنا ينصر الإخوان عليكم .
وتكتم غيظك وتقوله ياحبيبي انت فاهم غلط الموضوع مش كده خالص .
يبص لك من فوق لتحت مش مصدق حرف من اللى انت قلته .
وبعد سكوت يقولك الراجل اللى بيصلى الفجر حاضر المرزق .الطيب .المتراجع فى كل كلامه اللى بيسمع كلام الكبير .المطيع اللى مش عايز المنصب والمرشد هو اللى ضاغط عليه عشان يكمل .
ويصرخ انت فاكر مرسى عايزكم .. ابدا والله لولا الشاطر ما مزنق عليه والله لكان ساب البلد من زمان.
إحنا شعب ياباباغريب مالهم الإخوان زى الفل .
من 80 سنة وهما عايشين فى المعتقلات بص على البلتاجى وانت تعرف التعذيب عمل ايه فيهم .
وعايز تعرف آثار التعذيب بجد اتحداك لو فهمت خطاب لمرسى دول مساكين والله صعبانين عليا .
انت فاكر انهم شافوا قليل لا والله .
وحسنى مبارك لسة قدامه أيام سودا هو شاف حاجة .. يابابا انت راجل ظالم لأنك مرحتش غزوة كوبرى رمسيس وضربت لك كم حجر على المتظاهرين كان ممكن الحجر ده يدخلك الجنة لأنهم ضد الشريعة.
تمسك أعصابك وتسأله مين يابابا علمك الحاجات الجميلة دى كلها.
تلاقيه يرد عليك بمنتهى السعادة: مدرس التاريخ والتاريخ نفسه بيقول كده ويرفع لك علامة النصر ويقولك لقد هزمتك بالقاضية
والهزيمة لكل من هو ضد الإخوان .
-لو انت مكانى تعمل إيه ؟!