يااااااااااااه .. تخيل اخر حاجة كان ممكن افكر فيها انى اكتب لك جواب ! عامل ايه يا حبيبى .. لو قلت لك انك وحشتى ابقى بادبح مشاعرى .. باقلل منها كتير .. عموما سيبك من المشاعر والاحاسيس .. خلينا فى المهم .. شفت اللى حصل يوم 25 يناير اللى فات .. اتصلت الصبح بالدكتور احمد عامر كالعادة وسألته عليك .. قبل كده كان بيطمنى ، لكن يومها كان صوته حزين .. قال لى : للاسف النهارده مش حاقدر اطمنك .. الحالة مش كويسة .. والاستاذ لبيب حصل له نزيف ! بينى وبينك متخضتش قوى .. كنت حاسس انى لما اكلمه بعد ساعتين تلاتة حايقولى انك الحمد لله بقيت كويس .. ويومها زى مانت عارف كان اجازة بمناسبة عيد الثورة .. فاكر ايام الثورة وحظر التجول .. فاكر لما قطعوا التليفونات يوم 28 وانت كلمتنى فى البيت علشان تطمن على الزملا المحررين اللى كانوا فى ميدان التحرير .. انا فاكر يومها انك قلت لى انك مستعد تروح المجلة علشان لو احتاجوا حاجة يلاقوك .. وفاكر لما كنا بنيجى المجلة نقعد انا وانت نتكلم فى اللى بيحصل .. ولما كنت بتيجى تروح كنت بانزل معاك اوصلك لحد ماتركب العربية .. ماهو ماكانش فيه حد بيبقى موجود غيرنا .. بينى وبينك كانت ايام غريبة .. بس عمر الواحد ماحاينساها .. بعد ما قفلت مع الدكتور احمد خدت داليا و الولاد وخرجنا .. كنت مشغول عليك ومستنى مكالمة تطمنى .. لكن ماجى الحكيم كلمتنى .. مخنوقة وبتعيط وحالتها صعبة جدا .. قالت لى خلاص .. الاستاذ لبيب خلاص معرفش انا جبت كل الثقة اللى رديت عليها بيها دى منين .. قلت لها ياماجى بلاش كلام فاضى .. هو عمل العملية التانية امبارح وممكن يبقى تعبان شوية بس حايبقى كويس .. قفلت معاها وكلمت عم على .. انا عارف انه قاعد تحت على باب المستشفى .. رد علىّ بسرعة وقال لى : انا عارف انت بتتصل ليه .. الاشاعة مش صحيحة .. الاستاذ ضغطه واطى بس .. لكن هو عايش .. قلت له معلش ياعلى اطلع فوق وكلمنى .. طلع وكلمنى وقالى انك عايش .. فكلمت ماجى كنت ناوى اتخانق معاها بصراحة .. لكنها كانت منهارة .. حاولت اهديها علشان تفهم انك موجود .. قالت لى لأ .. خلاص .. بس الدكاترة مش عارفين يقولوا لطنط وزياد !! ماكانش قدامى غير انى اجرى على المستشفى .. وانا فى الطريق كلمنى عم على .. كان بيعيط ! مصر كلها كلمتنى وكانت بتعيط .. على فكرة هى لسة بتعيط ! وصلت المستشفى .. لقيت ناس كتير .. سعيد حلوى وسيد على وهيثم سعد الدين كانوا بيرتبوا اجراءات الجنازة .. وزياد كان واقف مع والدته .. هى كانت قاعدة تحت فى الريسبشن وحواليها ناس .. بس زياد كان راجل قوى .. تخيل انه جالى الاسبوع اللى فات علشان يشكرنى .. استغربت قوى بصراحة .. يشكرنى على ايه .. وبعدين لما زياد يشكرنى انا اشكر مين ؟! واشكره على ايه ؟! بينى وبينك انا حسيت ان السكينة كانت سرقانا كلنا .. احنا مصدومين .. مش فاهمين .. مش مصدقين .. قول اللى انت عايزه .. لكن الحزن كان مخيّم .. والدموع متحجرة جوه العنين ! شوية كده والناس ابتدت تمشى .. ماهو خلاص .. الاستاذ لبيب خلاص ! مابقتش عارف اعمل ايه .. زينب عبد الرزاق كانت منهارة .. ماكانش المفروض اسيبها بصراحة .. بس انا كنت عايز اقعد لوحدى .. وانا ماشى كلمنى الدكتور صفوت زهران .. سألنى على معاد الجنازة .. بكره فى السيدة زينب .. أكيد دى كانت وصيتك .. انا عارف قد ايه انت بتحبها .. يارب تكون معاها دلوقتى فى الجنة يا اعز الناس .. قال لى الدكتور صفوت انه كان عارف ان الحالة صعبة من اول يوم انت دخلت فيه المستشفى .. وان الدكاترة بحسابات الطب قالوا ان مفيش امل ! مبقتش عارف اروح فين .. لقيت نفسى فى الاهرام .. رحت لعبد العظيم درويش .. فتحت باب مكتبه وبصينا لبعض واتفتحنا فى العياط .. قلت له ان اخر مكالمة بينى وبينك كانت يوم اربع .. قبل ماتدخل المستشفى بساعات .. يومها قلت لك : ايه بقى .. شوية برد يعملوا فيك كده .. وانت يا حبيبى قلت لى : انا تعبان يامحمد .. انا شميت ريحة الموت ! عبد العظيم درويش ورانى الرسالة اللى انت باعتها له فى نفس اليوم .. كتبت له فيها : انا شميت ريحة الموت .. حاتكتب عنى ايه ؟! يااااااه .. هو فيه كده ؟ ايه ريحة الموت ؟ حسيت بإيه وشفت ايه ؟ انا فاكر ساعتها لما قلت لك بعد الشر .. انت قلت لى انه مش شر .. انا متاكد جدا انك كنت حاسس باللى احنا مش حاسين بيه !! خرجت من عند درويش وانا مش عارف حاروح فين .. فضلت ماشى لحد ماوصلت العبور .. قعدت لوحدى .. وفجأة لقيتك جنبى .. وبدأ بينا الكلام ! سألتك عن حاجات كتير .. وانت قلت حاجات كتير .. معرفش اذا كنت ساعتها خدت بالك ولا لأ .. أنا كنت باعيط شوية واسكت شوية .. بس مش عارف ايه اللى خلانى فجأة أقرر اسمع ام كلثوم .. سمعت أغنية ( عودت عينى) ساعتها سألتك تفتكر انا زعلان بس علشان بحبك ؟ طيب لو ماكنتش مرتبط بيك وبشوفك كل يوم .. تفتكر حزنى كان قل شوية ؟ علشان كده لما قالت ( لو كنت خدت على بعادك كنت اقدر اصبر واسنى ) بكيت قوى .. افتكرت كل لحظة كنت باقعدها معاك .. افتكرت كل الايام الحلوة والايام الصعبة .. فاكر لما دخلت عليك المكتب مرة ولقيت الدموع فى عنيك .. اتخضيت وسألتك : فيه ايه ؟ قلت لى معلش النهاردة ذكرى والدى وانا فى اليوم ده باكون فى حالة صعبة شوية .. أصل والدتى ماتت وانا صغير .. وهو كان كل حاجة بالنسبة لى .. الاب والام .. والصديق .. حاولت اخرجك شوية من المود .. بس انت كنت برضه حزين .. طيب فاكر اخر يوم ليك فى رئاسة مجلس ادارة الاهرام .. فاكر لما دخلت عليك المكتب .. وبصينا لبعض وقمت خدتنى بالحضن .. فاكر لما كنا واقفين مع بعض والناس بيوضبوا مكتبك الجديد فى الدور السابع .. ساعتها قلت لك انت خدت كل الحاجات اللى كانت موجودة فى الشباب حتى الكراسى والسجاجيد ومخدتنيش انا ! ياااااااااااه .. انا طولت عليك .. بس انت مكنتش متضايق .. وجاوبت واحنا قاعدين على كل الاسئلة الا سؤال واحد .. سألتك : دلوقتى انا لما احب اشوفك اوصل لك ازاى .. ساعتها حسيت انك سايبنى وقايم .. بس عايز اقولك انى فى اللحظة دى استريحت شوية .. حسيت بانى مطمن عليك .. تانى يوم كنت متماسك شوية .. لما رحت السيدة زينب لقيت ناس كتير جدا واقفين على باب الجامع علشان يودعوك .. وقفت معاهم بس مش علشان اودعك .. وقفت علشان اسلم عليك واسألك السؤال اللى انت مجاوبتش عليه .. لما اجيلك اوصل لك ازاى ؟ صلينا الظهر ..والجنازة .. على فكرة الاستاذ هيكل كان واقف جوه الجامع .. راكن على عمود وسرحان .. تفتكر كان بيفكر فى ايه ؟ خرجنا من الجامع ..كان حواليك ناس كتير لحد ما ركبت انت العربية .. لا عرفت اسالك ولا جاوبتنى ! وانا رايح وراك شفت مدام زينب .. سلمت عليها وافتكرت لما كنت دايما تقول لى انها هى اللى حاتدخلك الجنة .. كنت دايما تشكر فيها وتقولى ان انت نفسك تبقى من اهل الاعراف وانها هى اللى حاتشفع لك علشان تدخلك معاها الجنة .. انت فين دلوقتى ؟ اكيد ان شاء الله فى الجنة .. بس ياترى شفت مين هناك ؟ مين اللى مكنتش متوقع انك تلاقيه ولقيته ؟ على فكرة احنا وقفنا شوية فى الطريق عند نادى الرماية .. وبعدين كملنا لحد ما وصلنا للمقابر فى اكتوبر .. دايما بتبقى دى اصعب لحظة .. بس الغريبة انى كنت شايفك طول الوقت جنبى .. كأنك بتتفرج على الدنيا .. تصدق اول مرة اسمع الدعاء اللى الشيخ قاله : يارب تكون دى اسعد ليلة فى حياتك .. يارب تكون كده فعلا .. ويارب لما اجيلك اعرف اوصل لك .. لازم ابقى كويس قوى .. وطيب قوى .. وكريم قوى .. وجدع قوى علشان اعرف اقرب من المكان اللى انت فيه دلوقتى .. انا اسف لو كنت طولت عليك .. اسف لوكنت زعلتك فى اى يوم .. ارجوك سامحنى .. بس انا بجد مش ممكن اسامح نفسى لو معرفتش اوصل للمكان اللى انت فيه دلوقتى .. سلام يا حبيبى ! محمد عبد الله
