شوبير يقول : الدرس انتهى

بسم الله توكلنا على الله يا فتاح يا عليم يا رزاق يا كريم، يالا يا ولاد أحسن تتأخروا على المدرسة.. إوعى تنسى الشنطة يا أروى.. خللى بالك من أخوك يا أحمد.. ما تبعدش عن أخوك يا محمود خليكم جنب بعض.. ياللا يا ولاد بسرعة الأوتوبيس حيتحرك ومش حتلحقوا المدرسة.. قول لأخوك يشد حيله شوية أنا مش عارفة العيال خايفين كده ليه النهارده.. ما هم كل يوم بيروحوا المدرسة العيال بقت صعب قوى يا أبومحمود.. قوم قول للولاد يروحوا المدرسة .. الواد الكبير مزرجن ومش عايز يروح.. يا أم محمود سيبينى أنام شوية أنا طول النهار تعبان فى الشغل.. يا راجل قوم ما تكسلش الأوتوبيس حيمشى والعيال حتفوت عليهم المدرسة وما فيش أوتوبيس تانى.. مش يحمدوا ربنا إن هما حاشرين 60 عيل فى أتوبيس بياخد بالكثير 30 عيل.. وقلتلك ميت مرة كلم الناس عندك فى الشغل مش انت برضه بتشتغل صول فى الداخلية ومش بس فى الداخلية.. دانت يا راجل فى الأمن بتاع الوطن اللى كانوا بيسموه زمان أمن الدولة.. يعنى لك دلال على الناس هناك.. ياختى احمدى ربنا ده الحمد لله احنا عايشين ومستورين.. هو بقى فى حاجة اسمها أمن وطنى ولا أمن دولة ولا حتى داخلية من أساسه.. داحنا ما بنصدقش كل يوم إننا لسة عايشين.. طب والله العظيم إن أنا لما بآجى البيت كل يوم بعد الشغل مابالاقيش نفسى ولا أحس بيها إلا وأنا واخد العيال فى حضنى وأفضل أبوس فيهم وأقول يا ترى حافضل عايش ليهم لبكرة ولا لأ.. يا أم محمود الله يخليكى ما تقلبيش عليا المواجع.. أنا تعبان وزهقان ونفسى أخدكم على أى حتة إن شاالله نكمل عشانا نوم.،. طب عشان خاطرى قوم قول للعيال يروحوا.. المدرسة حاضر يا ستى.. صباح الخير يا ولاد عاملين... ايه حفظتم القرآن.. الحمد لله... صليتم الصبح.. طبعاً.. طيب حرماً يا ولاد.. ياللا بلاش كسل أحسن المدرسين يزعلوا منكم.. والله يا بابا إحنا تعبانين قوى أصلنا بنتحشر فى الأوتوبيس وبنقعد فوق بعض وبنوصل مهدودين وتعبانين قوى.. يا ريت تقول للوزير ولا أى حد ينقلنا المدرسة هنا.. إنت عارف آحنا بناخد أكثر من ساعة عشان نوصل للمدرسة وكمان كل يوم بنخاف وإحنا بنعدى المزلقان، انت عارف يابابا أن كزا مرة بعد ما نعدى نلاقى القطر عدى بعدنا على طول وكل ما نقول للسواق يضحك ويقول خليها على الله والنبى يا بابا تقول لحد يا إما يشوف حكاية المزقان يا إما يجيب حد يبنى لينا مدرسة هنا ويضحك أبومحمود ويقول لمراته العيال كبرت يا أم محمود وعايزين يزوغوا من المدرسة قال.. مزلقان قال طب وإيه.. هو انت مش فاكرة العربية اللى من كام سنة كانت بتعدى من عند المزلقان والقطر أكلها ومات فيها ثلاثة والحكومة بتاعة زمان كتر ألف خيرها إدت عن كل قتيل 3 آلاف جنيه.. يا راجل فال الله ولا فالك.. إيه الفال الشؤم ده على الصبح.. داحنا لسة بنقول يا فتاح يا عليم يا رزاق يا كريم.. يا راجل تف من بقك الله يخليك.. غيّر السيرة.. إحنا فين من الكفرة بتوع زمان.. مش انت برضه اللى قولتلى خدى جيرانك وقرايبك وأصحابك كلهم وروحوا انتخبوا الدكتور مرسى دا راجل متدين وبتاع ربنا وحيجيب لنا حقنا.. وأنا يا أخويا اللى عمرى ما رحت للانتخابات خدت الناس كلها وقعدنا نقول مرسى مرسى وفرحنا ورقصنا لما ربنا كرمه وبقى الرئيس.. أكيد المزلقان آمن خالص وأكيد الرئيس والراجل اللى جابه بتاع الوزارة هو كمان كويس.. تقصدى هشام قنديل رئيس الوزارة، أيوه يا خويا ده شكله كده راجل طيب ما هو مربى دقنه وشكله هو كمان بتاع ربنا.. يووه كنت حانسى أحط السندوتشات للعيال.. عاملة ليهم سندوتشات إيه النهارده.. دانت حتهزر يا راجل ولا إيه.. داحنا بنجيب الفول بالعافية اليومين دول.. انت مش عارف الكيلو بقى بكام.. يا ولية ارحمينى وبلاش تلقيح كلام.. والله ما قصدى أنا بس بفكرك لو كنت ناسى.. ومع كده الحمد لله حامدين ربنا وشاكرين فضله طول ما العيال فى حضننا.. ياللا يا ولاد بالسلامة وربنا معاكم ويستركم يا رب.. ونزل الولاد ركبوا الأتوبيس وهما رجل ورا ورجل قدام.. وبعد ساعة كان الدرس انتهى.. كانوا بيلموا لحمهم من على قضبان السكة الحديد بعد ما القطر كلهم عشان الراجل بتاع المزلقان كان نايم أو مشغول أو حتى التليفون ماضربلوش من هناك.. ومات العيال ومات زيهم أكثر من 50 عيل ولسة أم محمد ومحمود مفكرة إن هما أملها يكبروا ويجيبوا بدل من الفول لحمة.. ويبنوا البيت اللى نفسهم فيه.. لأن محمود حيبقى دكتور قد الدنيا، أما أحمد فحيبقى ضابط كبير ولكن جاء القطار لينسف كل الأحلام ولينهى مبكراً.. ليعيش أبومحمود وأمه أسوأ أيامهم وتتحول أحلامهم إلى كوابيس وآمالهم إلى آلام وتتحول البلد كلها إلى جمرة من النار انتظاراً هذه المرة للقصاص العادل ممن خدعهم وضحك عليهم ووعدهم.. فحلموا ولكنهم أفاقوا على قتل أولادهم بأيدى من وعدوهم بالرخاء والنماء.. وهم الآن فى انتظار تنفيذ الوعود وإن كانوا على يقين أن الدرس انتهى وأن الواجب سيبدأ عمله فوراً.