كيلو الطماطم بقى ب 7 جنيه السيدة العجوز قالت الكلمة دى من هنا وأذا بالممرض الشاب فى عيادة دكتور العظام الشهير ينتفض و يقفز فوق المكتب بالرغم من أنه كان يمارس عمله و يتحدث مع أحد المرضى و لكنه انفجر كالبركان الفائر سبعة جنيه يا حضرات طيب عليا ب 42 خلاص انتو قاعدين ليه سيبوا البلد طيب قوموا خدوا حقكوا فى سرى قلت هو الراجل دا أكيد أهبل أو عنده مشكلة كبيرة فى حياته يمكن اكون فكرت اسأله هو ماله بس هو مادلناش فرصة 42 سنة يا حضرات و معاش مبكر ربنا بعت لى الدكتور زكريا انا اتعينت ممرض فى المستشفى الفرنساوى من 22 سنة بس جالى تعيين فى شركة الكتان الفاخر طبعا جريت ورا الميرى و اتمرمغت فى ترابه لحد ما اتعميت بس عارفين انا مبسوط انا كنت قاعد كده و الدكتور نظيف( اللى اسمه على مسمى فعلا لأنه نضفها )و الست عيشة و اسمه ايه ده بتاع كفر شكر قاعدين قدامى البيه نظيف قالنا اعمله اللى فى مزاجكم هتتفصلوا الراجل ده عصبنى يعنى باعوا الشركة 74 فدان ب 79 مليون جنيه يعنى مكن 8 مصانع و ارض و عمال و اسم برخص التراب دا حتى ترابها مش رخيص داحنا كنا عايشين على خير بيع التراب ده اللى بيتبقى من الكتان لبتوع الافران و الفلاحين و الكلب اللى اسمه شوبير انا مسكته و غسلته و قلت له انك قابض فابعد عنناو بلاش شغل الحوارى ده روح شوف مرتضى عمل فيك ايه كلهم سمسروا على قفانا قلنا لهم الكلام خلص احنا قتلا فى الشركة و هنولعها حرب هنطلع بالعربيات و لو حد وقفنا هننام فى مكاننا و يا روح ما بعدك روح قطعنا الطريق الزراعى تانى يوم اللواء الكبير كان على رأس الجيش اللى جاى يفرقنا انا عارفه من القناة السادسة احنا كنا فوق فى العنابر و الورش و هم كانوا تحت ال 1000 راجل كل واحد مسك ماسورة ووقف لهم لو حاولوا كنا هنغربلهم اللواء خايف على مكانه مش على اى حد تانى و لا عالشركة اللى خدها السعودى ببلاش بس السعودى ده بجح قوى قال لنا انا دافع 300 مليون هاتوهم و خدوا الشركة بالاسهم قلنا له مانت دافع 79 مليون بس قالولنا انتو كده مش بس هتروحوا فى داهية دانتو هاتتنفخوا الشيخ السعودى عدى من تحت الترابيزة 221 مليون اللواء ما يأسش فخدنا بالسياسة مش بالسياسة قوى بس لما قال لى انتو مش عارفين لعب العيال ده اخرته ايه حافظوا على نفسكوا ممكن واحد بلطجى يولع فى اوتوبيس بالليل و الاوتوبيس ده عهدة مين واحد زميلكم اكيد يعنى بالبلدى كده بيهددنا انه هيزق واحد يعمل كده و نلبسها احنا و ساعتها الجرايد و برامج بالليل مش هترحمنا فقلنا له طيب الفصل اللى اتعمل يتلغى قال لنا سيبونا للصبح رحنا تانى للبارتيتة ايها قالولنا هاننقل اللى عايز و اللى عايز يمشى بس ادونا تلات شهور قلنا لهم دلوقتى و عنها 35 واحد بعد ماتفصلوا طلعوا معاش مبكر و انا اكبر واحد فيهم واحدة ست اشتركت فى الحوار فقالت له بعت القضية دانا كنت فرحانة بيكوا لما كنتوا بتيجوا فى المحور و الحياة الحمرا تلاقيك هبرت هبرة كبيرة قالها و الله ابدا بس انا كنت خلاص اتفصلت اى نعم انا قلت لهم لو مارجعتونيش و دينى لأعلق الراجل السعودى ده على بوابة الشركة انا خدت 35 الف بس مايجيش ربع حقى الست قالت له طيب اعمل لك مشروع قال لها انا يادوب جوزت الواد الكبير و ربنا يستر بقى لما البت تتخطب انا تعبت و مش معقول بعد 20 سنة جواز اسرح عيالى و مراتى ينقوا دودة عشان ناكل و نشرب انا غلطان يا بيه؟؟ بص لى و استنى منى اجابة و لسه مستنى لحد دلوقتى
