وحدوووووووه...!

كان وضعا مثيرا للسخرية فالمعلم ابو النجف راقد في غرفة العمليات بين الحياة والموت، والاطباء يسابقون الزمن في محاولة لانقاذ حياته، ومراته وعياله مشغولين بتوزيع التركة وصوتهم جايب آخر المستشفى ....
-محدش ح ياخد سراية الساحل الشمالي غيري!!! انا اكتر واحد خدمت بابا وكنت بأشيل له القصرية اللي بيعمل فيها بي بي!!!
-ليه وانا رحت فين!!! ما انا كمان خدمت ابوكم وضيعت صحتي وشبابي عليه مع انه جربوع ولا يسوا !! وآخرتها عايزين تلهفوا كل حاجة وترموا لي عضماية !!
-يا تانت محدش طمعان في حاجة .. بس المرحوم قصدي بابا ماكتبلكيش غير فيللا المهندسين وشاليه الغردقة وقرشين كويسين في البنك!!!
-سلامتها ام حسن!!! ده ابوكم كتب لي اللي وراه واللي قدامه في الوصية الجديدة بتاعته!!! ولو عايزين تتأكدوا اسألوا جرجس المخاوي المحامي!!!
وقبل ان تتحول الخناقة إلى فضيحة بجلاجل خرج الدكتور من غرفة العمليات..
-الف مبروك يا جماعة !!! العملية نجحت والمعلم دلوقتي في العناية المركزة!!!
-معقولة يا دكتور.. بابا لسه عايش ؟؟؟؟ مع انك قلت لنا العملية دي فرصتها واحد في المليون ؟؟؟!!!
-فعلا المعلم ابو النجف راجل محظوظ عشان كده لسه عايش مع اننا شلنا له الطحال والكلية الشمال والكبد والمعدة والمصارين والبروستاتا!!
وهكذا اندفعت الاسرة الى غرفة العناية المركزة...
-سلامتك الف سلامة يا بابا....يا حبيب الكل ...يا كايدهم!!!!!!
-ألاَ حمد الله ع السلامة يا اخويا !! الهي يجعل يومي قبل يومك!!! يا اخواتي انا من كتر الفرحة مش عارفة أزغرد والا أنط من الشباك؟؟!!!!
وهنا فتح المعلم عينيه وقال....
-متشكر اوي يا حبايبي !! يارب انا مش عايز منك حاجة!!!! غير اني اعيش لغاية ما أجوز ولاد ولادهم!!!
-يطول لنا في عمرك يا سيد الناس ويقصف عمر اللي عايزينك تموت عشان يخلالهم الجو ويبرطعوا في خيرك!!!!
-ما تبكيش يا عطيات!!!! انا قاعد لك يا وش السعد عشان ادلعك كمان وكمان يا حتة من كبدي يا نور عينيا!!!!!
وفور خروجهم من المستشفى ....
-وبعدين يا ولاد ؟؟؟ بابا شكله كده مش عايز يتكل!!! ومكلبش في الدنيا بايديه ورجليه وسنانه!!!!
-واحنا بس ايه اللي في ايدينا نعمله!!! المصيبة في الولية الطماعة اللي عايزة تلهف كل حاجة وتدينا بومبة!!!
وفي صباح اليوم التالي بفيللا المهندسين ....
اصحي ياست هانم!! وبعدين في نومك التقيل ده؟!!! يا ستي اصحي عشان تروحي المستشفى تطمني ع المعلم ربنا يطول لنا في عمره!!!
ولكن الهانم لم تتحرك ....
-الحقوني يا عالم عطيات هانم مش عايزة تصحي!!! ولا ترد عليا!!! الظاهر انها ماتت وهيه نايمة من فرحتها بنجاح عملية المعلم!!!
وكانت جنازة مهيبة ....
-امال ابو النجف فين ياولاد ؟؟!! ازاي مايحضرش جنازة مراته!!؟؟ دا هوه والهانم كانوا اكتر من السمن ع العسل!!!
-أصل بابا لسه تعبان وراقد في المستشفى يا أونكل!!! ادعي له ربنا ينتعه بالسلامة!!!!
وبعد ثلاثة ايام كاد القلق يفرتك دماغ المعلم....
-هيه عطيات ما بتزورنيش ليه في المستشفى يا ولاد!! انا عمال اكلمها زي المجنون ع الموبايل وفي البيت وبرضه مش عايزة ترد عليا!!!
-معلهش يابابا تانت عطيات بعافية شوية ومش ح تقدر تزورك اليومين دول !!!
-طيب ليه ما بتردش على مكالماتي؟؟ هوه انا زعلتها في حاجة والا حد فيكم زعلها ؟؟؟ عليا الطلاق بالتلاتة لو حد فيكم زعلها لأطرده من البيت !!
-يا بابا ماحدش فينا يقدر يزعلها ولا يدوس لها على طرف!!! بس هيه تعبانة نفسية وواخدة على خاطرها إكمن جنابك يعني لسه عايش وما اتكلتش على الله!!!!
-كده طيب تلاتة بالله العظيم لأربيها وأحرمها من الميراث!!!!!
وبعد خروجه من المستشفى...
-انتو رايحين بيا على فين يا ولادي ياحبايبي ؟؟؟ الطريق ده ما بيوديش ع البيت !!
-احنا يا بابا واخدينك العزبة نفسحك!!!!!!!! واهي فرصة حضرتك تستريح وتروق دماغك !!
-يبقا أكيد عطيات مستنياني في العزبة وعاملاها لي مفاجأة!!!! الولية دي فعلا عاملة لي عمل عشان كده أنا بأحبها موت ومش قادر استغنى عنها!!!!
-للاسف يا بابا تانت عطيات مش ح تقدر تيجي العزبة عشان لسه زعلانة وواخدة على خاطرها!!!!
وبعد ساعتين.....
-معلهش يا بابا احنا مضطرين نسيبك هنا مع الخدامين ونرجع مصر عشان ناخد بالنا من عيالنا!!
-وماله يا حبايبي بس ياريت تبعتوا لي جرجس المخاوي المحامي!!! عشان انا قررت أغير الوصية واكتب نص ثروتي لعطيات وانتو النص التاني!!!!
وفي طريق عودتهم بالسيارة الى القاهرة .....
-يسيب لها نص ثروته ازاي اذا كانت ماتت وشبعت موت؟؟؟ الراجل المجنون نقوله زعلانة منك ومخاصماك يقول لنا ح يكتب لها نص ثروته!!!
-الحق يا حنفي يا اخويا فيه جاموسة بتعدي الطريق قدامك!!!
-هيه فين الجاموسة دي؟؟؟ انا مش شايف حاجة من الزعل والشبورة !!!
-يا حيوان الجاموسة قدامك اهي !!! بسرعة خد يمين والا اقولك خد شمال .....يا دي النصيبة السودة دا احنا طايرين ع الترعة!!!!
وكانت جنازة حزينة ...
-معقولة ياجماعة ابو النجف ما يمشيش برضه في جنازة عياله!!!! يعني الخمسة يموتوا فطيس كده وهوه قاعد مرحرح في العزبة!!!
-الظاهر ان الرجالة بتوعه ما بيقولولوش ع الاخبار الوحشة أحسن تجيله صدمة ويروح فيها!!!!
وفي العزبة ..
-هوه ايه الموضوع ؟؟؟؟؟ انا عمال اكلم العيال على الموبايلات ومحدش فيهم عايز يرد عليا!!!انا قلبي واكلني عليهم من ساعة ما سافروا في العربية النحس بتاعت المرحوم أخويا !!!!!
-طيب ما تجرب يا معلم تكلم الهانم!! اكيد هيه عارفه البهوات راحوا فين وليه ما بيردوش على مكالماتك!!!!
-ما انا باحاول اكلمها من الصبح بس هيه رخرا قافلة الموبايل بتاعها !!!!
واخيرا قرر المعلم الاتصال بجرجس المخاوي المحامي ....
-ارجوك يا متر تطمني!! الولاد وعطيات راحوا فين!!! انا قاعد في العزبة ح اتجنن ومش عارف غاروا في انهي نصيبة!!!
-يا معلم ماتقلقش!! الهانم والولاد بخير بس أنا مش عايزك تقلق ولا تزعل روحك!!! !
-ما اقلقش ازاي وانا مش عارف همه راحوا في انهى داهية !!! انت لازم تقول لي على كل حاجة والا وقعة اللي جابوك سودة!!!!!
وهكذا حكى المخاوي للمعلم ما جرى بالتفصيل الممل ......
-يا ساتر يارب عطيات والعيال راحوا في شربة مية!!! مراتي وعيالي ماتوا كده في غمضة عين؟؟؟انا عملت ايه في دنيتي ياربي عشان يحصل لي كده؟؟؟؟!!!
-شد حيلك يامعلم!!! والله العظيم اللي حصل ده قطم وسطنا كلنا !!! ربنا يصبرك ويجعل مستقرهم الجنة!!!
-خلاص يا جرجس انت تجيلي من النجمة بكرة عشان اغير الوصية!!! انا قررت أكتب ثروتي للكلاب اللي في العزبة!!!!!!!! عشان تبقا رحمة ونورعلى ارواحهم ....يا حبايبي يا ولادي يا نور عينيا يا عطيات!!!
وبعد اسبوع ....
-اصحا يا سيد الناس!! احنا خلاص جهزنالك الفطار وعملنالك الفطير المشلتت اللي بتحبه!! يا نهار اسود يا ولاد المعلم ما بيردش وما بيتحركش!!! يا سنة سوخة دا الراجل باينه مات من الزعل على مراته وعياله!!!!!