يوميات مواطن مخنوق.. حلقة رقم (10).. حظر التجوال ونكد المدام !

بعد مرور فترة على فرض حظر التجوال والجلوس في البيت وضياع الفلوس على مقلة اللب اللى جنب البيت وكل يوم بتلاتة أربعة جنيه لزوم التسلية والفرجة على القنوات الحلوة شوية والوحشة شوية.. كل ده كوم واستظراف الست حرمنا كوم تانى والواحد يلطم من حظر التجوال ونكد المدام.. تخليك تقول في سرك للحكومة ليه يا إخوانا الحظر.. هو انتم مش مصريين وعارفين الستات ونظام الرغى على الفاضى والمليان والفاضى طبعا أكتر؟
وفجأة تلاقى المدام جاية وبظرف يجيب الضغط والسكر وتسألك إيه رأيك في "الحظر" مش قربنا من بعض اكتر؟
تمسك أعصابك بالعافية وتقولها فعلا لدرجة إن الواحد اتخنق من كتر الحب.
تضحك ضحكة هبل على عبط وتقولك ربنا يخلى اسم الله عليه سى "الحظر" يارب والمدة تطول عشان الواحدة مننا تعرف اسم الله عليه الراجل بتاعها بيلعب بديله ولا لأ.
تبادلها الضحكه بضحكة غيظ وفرسة وخنقة وتقول في سرك يارب خلصنا من الإخوان ومن الحظر والمدام.
وتلاقيها تضحك تانى ضحكة بايخة وتسألك تصدق إن اللى عايزة تقفش جوزها تقفشه الأيام دى ربنا يخلى "الببلاوى" مش هو برضو بسلامته اللى عمل اسم النبى حارسه وصاينه "الحظر"؟
بدون وعى تبص حواليك زى اللى مضروب على دماغه بشومة تقولها ياستى الموضوع كله أمنى عشان نعرف مين معانا ومين إرهابى.
تلاقيها تضرب يدها الشمال باليمين طب ما "الحظر" يعتبر أمن من خراب البيوت وأنت اسم الله عليك قبل الحظر كنت بشوفك إلا قبل الفجر بنص ساعة ولما اسألك تقولى إنك رايح تصلى الفجر في الجامع.
تمسك أعصابك بالعافية وتفهمها إنك برضو حاليا بتصلى الفجر في الجامع.
تبص عليها تلاقيها بتضحك ضحكة كلها خبث وتقولك بس دلوقتى بتقوم من جنبى لكن الأول كنت تيجى من بره ياخويا وتقوم تهتف عاش "الحظر" عاش عاش.
تبص عليها وتستغفر ربنا من الغباء وتحاول تفهمها إن الموضوع مش كده خالص.
تلاقيها تصرخ وتحلف " إن شاء الله ربنا يا خدها إذا كانت بتكدب أحسن حاجة عملتها الحكومة هو موضوع "الحظر" ده وتحط إيدها في وسطها وتقول ربنا يخلى الحكومة خلت نسوان مصر كلها تنام مرتاحة ومفيش راجل يقدر يلعب بديله وتحدى، ومن غير ما تحس تلاقى دموع حمادة هلال كلها نازلة من عيونك وتقول لنفسك "الحظر" بين معادن الناس اللهم لا شماتة".
تلاقى المدام تقولك على فكرة لو"الحظر" ده اتلغى هنروح نعمل مظاهرة أنا اتفقت مع نسوان الحارة عشان يرجع تانى إحنا ما صدقنا يكون الراجل منكم جنب الست بتاعته ولا أنت إيه رأيك ؟
تلاقى نفسك تصرخ وتقول:
أنا مخنووووووووووووووووق