الشوارع

صبرى قنديل
(1)
الحلم شارع
واخدنا لشجر طارح
مفرع في المدي وسارح
والشوارع حلم
مش بس صورة
ودراما في المسارح
الشوارع روايح
وسيرة وفضايح
وكلمة راويها
الشوارع ملامح
شبه اللي فيها
راسمها وبانيها
منازل مطالع
واطيها ف عاليها
الشوارع خريطة
مولد وزيطة
خلايق عبيطة وخلايق حويطة
الشوارع...
سياسة وكياسة
نباهة وفراسة
نبالة وخساسة
طهارة ونجاسة
ناس عايشة ع البلادة
وناس خانقاها الحساسة
(2)
الشوارع يا خال..
سيجال
ناس مجدع وناس أندال
الشوارع خيال
أحوال في كل مجال
الجمعة لضم في السبت
والحد بقي اسمه أربع
اسمع...
ما هي الشوارع سوق
ما بين شاري وبين كيال
الجيزة متجمعة ف شارع نوال
والقاهرة ف رابعة
سامعة ولا مش سامعة
اسكندرية طالعة
م العطارين للنبي دانيال
الشوارع في قنا متقال
بينادي علي المهرة
قبل ما تبتدي السهرة
يا سمرة يا شقرة
يا حلويا قمحي
يا ساكنة ف ملامحي
»يا بت بيقولك ابوكي
متطلعيش في القيالة
كل العيون لما شافوكي
بعتم وراكي الخيالة«
ياعيني يامتقال
الشوارع طوالة
والربابة ميالة
وعنيك بتقولك قوالة
والقلل القناوي
بتنادي ع الشوق المحال
الشوارع جمال
الشوارع وصال
مدارس /كنايس
جوامع / صوامع
بوابير طحين
وطواجن عجين
الشوارع غيوم
الشوارع نجوم
الشوارع جنة المحروم
من السلوم لما للقنال
(3)
الشوارع يا ناس يا هووه
عبيد لله بيوحدوه
هووه.. هوهوووه
الشوارع..
شرايين مفتوحة
ع الاحمر والابيض
وكل لون ياخي
الشوارع فانوس
بينور نفوس الخلق
الشوارع..
ضميرنا الحي
م القاهرة اللي ما عدتش ساحرة
ولا بغداد اللي مش قادرة
لحد القدس..
وي وي وي
شحيح ياضي
طالت سنين النمارده
وفينك يا بكره الجي.
(4)
الشوارع..
أحلام بريئة
وساعات كوابيس
الشوارع تروس
بتعصر في عمر الناس
اقلام بتكتب ضلال
وكمان بتكتب حقيقة
علي ندهة الكراريس
الشوارع..
عمر البطولة في السويس
الشوارع يا بورسعيد
شطارة ونهار جديد
الشوارع ياسماعيلية
عناوين وايدين عفية
الشوارع مش تكية
وللاعيشة بلهنية
الشوارع..
شهامه وعنترية
ملاية وجلابية
الشوارع قضية
والجريمة مصراوية
مين معايا ومين عليه
جامعه ودمعة
ومظلمة محابيس
هوجة عيال خلابيص
بيحبوا البلد ديه
من غير مزايدة ولا تهييس
(5)
الشوارع ضجر
هبل وغجر
الشوارع امتداد للنظر
الشوارع...
عمر وشجررمان
انسان ونخل واهل
عيدان حنضل وتوت
ملكوت بيداري في دموعه
الشوارع هطل
الشوارع خبل
ولما النوري نشل
بينادوا برجوعه
الشوارع...
نشان بيدور علي صيده
الشوارع وطن بيجدد أناشيده
الشوارع عمل مادد لنا إيده
الشوارع...
أمل أخضر ضاحك علي عوده
الشوارع حصان جامح
من حيفا للقيروان
الشوارع لسان
كما السيف في ايد الديدبان
الشوارع صولجان
وسنين مكتوبة علي الجدران
الشوارع رهان
بيفوق النايم ويصحصح الغفلان
الشوارع..
بديع خيري والعقاد
الشوارع
الشرقاوي وتوفيق الحكيم ومراد
الشوارع
الشاذلي وعبد المنعم رياض
الشوارع
عبد العاطي وابراهيم الرفاعي
الشوارع أخضر ونعناعي
فردي وجماعي
الشوارع
بصمة الانسان
الشوارع
جنينة ولومان
الشوارع
ثومة وجمال وحمدان
رمسيس ورفعت والشيخ ريحان
الشوارع..
سنباطي وعبد الوهاب
والموصلي وزرياب
الشوارع دفا
عكاشة ومشرفة
حسونة وأبوحيان
(6)
الشوارع ضفيرة وشريط
دقة وسميط
بحر ومحيط
وجوه تايهة في الهم متشابهة
عاقل / عبيط
الشوارع..
طريقها بسيط
قرارها غويط
الشوارع لمين..؟
للحاج قطب الموفي بوعده
لسميروعبده
وسما وياسمين
الشوارع
شهقة وزقة
كلمة وورقة
همسة للحالمين
الشوارع
مواني وشطوط
وهوية بيوت
من كفرة المنشي للأرناؤط
الشوارع لمين؟
في السيدة والقلعة
والقباري وراس التين
ارفع ستارك ييجي نهارك
ياللي انت مش حويط
طير في الفضا
الشوارع
قضا وكمان رضا
ع اللي مضي
واللي في علم الغيب
الشوارع حنين
في الحلمية والمنيرة والزتون
الشوارع شفرة بين غزة وجنين
كلام ومتوزع جمر ع الساكتين
الشوارع نحيب
الشوارع غواية
ولوحكينا يا جبرتي نبتدي منين الحكاية
القصص كلها حرة
من غير وصاية
آه يا ليلي وآه يا عين
الشوارع
عباقرة ومبدعين
الشوارع بيت المخاوي
الشوارع دم ورغاوي
الشوارع خطاوي
مدد ونصيب
الشوارع غناوي
حداد وبيرم
وقاعود وحيرم
مكاوي وجاهين
الشوارع لمين؟
الشوارع مليانين
بالريحاني وشرفنطح واسماعيل ياسين
الشوارع فراق
وحكاوي بتونس العشاق
ندهة مش بتغيب
(7)
الشوارع سارحه
وشجره طارحة
ونظرة جارحة
وضحكة صابحة
بتودي ع الميادين
الشوارع لمين..؟
ملايين بتصحي تترش فيها
وناس في البيوت وجعها كاويها
الشوارع..
بهية وياسين
فاطمة ونيفين
الشوارع طنطنة وشعار
قسوة ولين
الشوارع نار وبتكوي في الضايعين
الشوارع لمين..؟
للحلوة والحلوين
الشوارع..
محبة وطهارة وصلاة
الشوارع
كرامة مرفوعة الجباه
الشوارع
هبة ومغبة وحياري ونجاه
(8)
الشوارع..
عربيات بطيئة وسريعة
ناس بيئة
وناس مدفوعة ووديعة
الشوارع..
طلمبات حنان
بتغسل فينا عرق الوجيعة
بتودي اللي غاوي
ع الدنيا الوسيعة
الشوارع وسيمة
وكلمة غشيمة
متكعبلة في هدومها القديمة
وسايبه هواها
لعند وخصومة
الشوارع حكيمة
ناس رحيمة ومش رحيمة
ناس لئيمة ومستقيمة
الشوارع..
ايدين كريمة
تتمد للمتاعيس
الشوارع هويس
مفتوح علي روحنا
لاجاب لنا المية
ولا طيب جروحنا
ومين م الظنون يريحنا؟
الشوارع..
حصانة ورصانة
ودوافع للجنون
(9)
الشوارع
ذمة صادقة
ورعاع وحمقي
جياع وبطون
وشوش بتكدب
وشوش مرايا
ووشوش مبتستحيش
الشوارع شاويش
وبكش تعيش
واياك من مفيش
يطلعلي ريش فاروح العريش
السكة عوجة
ومش ع الموجة
سيد وجيجا
وماركة أميجا
تلاعبني سيجة
الشوارع لمين..؟
للعاشقة والعاشقين
للبطاطا والدرة المشوي
للعنب يمني وبلح الشام
يا سيدي بكام
القوطة والمشمش الحموي
الشوارع أدان الفجر
جاي م المسجد الأموي
لحد السيد البدوي
الشوارع لمين..؟
لمصباح ورزق
وقومة العدوي
الشوارع طلوقة
خنقة وخنوقة
زعلة وروقة
وفرحة وعيد
الشوارع قضبان حديد
ماشية بقطر الحلم
من بحري لحد الصعيد
وجايبة الحزن..
من قبلي لما لنفق الشهيد
الشوارع شهود
وثيقة وعهود
ومواجد وجود
الشوارع لمين..؟
لسلوي وهيام
لزهرة وعصام
لعلي وتقي وعبدالسلام
لأدهم وأبوالعرب همام
لعبد الودود وابوالسعود
بلاليص عسل ومش ودود
الشوارع ورود
نعمات فؤاد وأمينة السعيد
بنت الشاطئ ولويس عوض
بدوي وزكي نجيب محمود
(10)
الشوارع
مجامع سلم
الشوارع..
مراجع علم
الشوارع..
لقمة مش بالسهل
الشوارع..
مراتع جهل
الشوارع..
كوفية وامتداد أنساب
الشوارع..
هويدا وعايدة
ومني ورباب
»هوه صحيح الهوي غلاب«
أعرف أنا
إن الحبيب متصاب
الشوارع..
مسطرة وكتاب
جملة بلا اعراب
الشوارع..
مكايدة ومعاندة
ومناشدة علي الاعتاب
الشوارع..
حضور وغياب
خضة وارتياب
»يامة القمر ع الباب«
ذكاوة وخيابة
اسئلة من غير اجابة
بلاوي متلتلة وعذاب
الشوارع..
قنطرة للإيمان والكفر
الشوارع..
هنكرة وحكم وأمر
الشوارع..
منظرة ونهر وزجر
الشوارع..
طبطبة وناس طيبين
بلطجية ومجرمين
الشوارع ضباب
الشوارع سراب
الشوارع كتاب الاحباب
(11)
الشوارع حارات وبارات
سكك مفتوحة علي كل الجهات
الشوارع فضفضة
ومضمضة مجاريح
الشوارع..
علالي وسفوح
ديك شركسي وفرخ فصيح
الشوارع..
صدق وتآمر
وطني ومغامر
وارادة معافر
وهوية مسافر للفضا العالي
»وانت يا غالي عليا
يا عم قول..
كله في حبك يهون«
الشوارع كون
وماشي علي كل لون
وانا ماشي علي الكورنيش
ناداني الشارع الفرعي
هنا شرعي
يا عمي مرعي
علي شط النيل
تحلا المواويل
والموج حيغني علي الأرغول
يا عم قول
»اواحشاني عنيك يا حبيب قلبي
شئ مش معقول«
الشوارع كارووخيول
الشوارع روشة وذهول
(12)
بنادي من شارع عبد العزيز
يا عزيز
سايق عليك الاوليا
فكلنا بقي التعاويذ
يا حبك يا سانت تريز
الشوارع ازيز
ابريا وتلاميذ
لواري بتدهس نبض الغلابة
ماركات..
بتعفر حلم الطيابة
وبتحقن قلبهم بالحزن
الشوارع..
دواير متفرعة ع الناس
جواها الطريق مزروع حكايا
تايه رجايا
والعرافين ع المفترق
بيقلبوا الفناجين
الشوارع تراس
قاعده وكاس
جماجم شايله تاريخ وناس
الشوارع ضيا وبراويز.
(13)
الشوارع..
صخب وسكات
عروسة حلاوة وجنيات
بتخطف قلوب البسطا بالميات
آه م اليوم اللي جي
ليكون زي اللي فات
التعلب بيلعب
ولسه مافات
وآه يا نيل من قهر الفرات
الشوارع لفايف
شايله الجرئ
ولفة اللي خايف
الشوارع شفايف
تتلا قي فتتشا قي
تقول وتحب
تشتم/ تغني
وساعة تهب
الشوارع قصايد
متوزعة ع الليل
الشوارع..
موائد ويل
الشوارع..
طاله ف كوبايات الشاي
الشوارع هالة في صوت الناي
»فين طريقك فين
بيروحولوا منين«
يااااي.
يا خوفي من اللي جاي.
(14)
الشوارع تابوت
للي بيجري ولي قاعد ع الرصيف
الشوارع نوم خفيف
للي بيحاول من خرم ابره يفوت
الشوارع لمين..؟
للي بيصلي ف جماعة
واللي في طاعة
واللي بيدعي ف ليل القنوت
الشوارع عنكبوت
متكعبلة في خيطانه رعشتنا البريئة
والأسئلة التايهة
ف أشجان البيوت
الشوارع مظاهرة
الشوارع مغامرة
الشوارع مسافرة في الكلام
وفي السكوت
الشوارع ريموت
من بناة المجد للراوي
لمحمد عبده والطهطاوي
وطه وسعد
خديوي وفاروق
لدولة حقوق
نجيب وجمال
الشوارع..
مظهر وأنور
وواحد غتيت
كان هنا مسيطر
في عصر أغبر
ضيعنا ومستكترعلينا
نقوم من النوم عشان نفطر
يييه..
» يا عطارين دلوني
الصبر فين ألاقيه«؟!
(15)
الشوارع غضنفر
يا ليل وفاض الكيل
في المحلة والاربعين
لما للقائد وسيدنا الحسين
الشوارع لمين..؟
لليلي ومحمدين
الشوارع عنين
ومفتحين علي غضب السنين
م الأزهر والخليفة
لعدلي وطولون
الشارع تكون أولا تكون
الشوارع نفير
الشوارع هدير
الشوارع..
أشعة شمسنا الجاية من التحرير
صهدانة وبتحرق
في الفساد والزور
الشوارع لبكره عبور
(16)
الشوارع..
زمزمية وبندقية
ودعوة مغربية ع الظالمين
الشوارع لمين..؟
للعطشانين مية زلال
للمستنيين طالعة هلال
لثورة الملايين
الشوارع صلاح الدين
الشوارع نيقولا وعمي فرج
الشوارع رهينة
لما الميزان اتعوج
الشوارع أصيل
الشوارع عويل
الشوارع خيل ومسرجه الفارس
الشوارع سبيل
الشوارع حكاية بثينة وجميل
الشوارع لمين..؟
للشرفا ولا للخاينين
الشوارع فلول
الشوارع مغول
عدووعزول
وفسيخ ومول
وأم حسن
وأم علي
وأم الخلول
الشوارع عزيمة
الشوارع وليمة
ونية سليمة
حر وسيول
الشوارع بريك
تدور عليه أدور عليك
الشوارع علي كترها زي الفريك
كارهه الشريك
الشوارع..
دي قلبي وقلبك
نظره عنيه ف نظرة عنيك
(17)
الشوارع بلية وسواد السواد
الشوارع عناد
بكا وحداد
الشوارع نظاره
وبحر وعكاره
جزاره وزرع وحصاد
الشوارع مسالك
الشوارع مهالك
ناس هفية وناس شداد
الشوارع لماضة
وفرقة رياضة
ومفيش غضاضة في الارتداد
الشوارع بتسمع
الشوارع تجذع
الشوارع مذادة لمون
الشوارع ياباشا مرمطون
قهاوي ومهاوي وبياعين
الشوارع فول مدمس
يلا نحبس
بالشيشة والينسون
الشوارع وحدة
والناس متفرقين
الشوارع لمين..؟
للمحسوبين علي صاد
وللا المحسوبين علي سين
(18)
الله
يا شوارع شرقنا
من خليجنا لما للمحيط
واحنا واقفين ع البيبان
بيقول اللسان عربي
عيونك في سينا
وسلامك ف ام درمان
عمان قلقانة علي صنعا
ودمشق غرقانة ومش سامعة
والسمعة مخفية في الجامعة
واقع عمود النور
والشوارع يتيمة وبور
ومع كل ده
لوانت عايز الحق
كل ما عد ف أسامي
بسمتك بتبرق برق
أه يا شوارع كاويانا بنار عشقها
بنام ونصحي وانت شرق في شرق