لما كنا ف مصر الجديدة

فلحظة صمت وسٌكات عدى قصادى شريط ذكريات
رَجعنى تانى للطفولة وافتكرت كل اللى فات
كُنا هِنا بنٌط أولى ويه شِلة مالبنات
شوية نلعب ماتش كورة شوية كومى. . سبع طوبات
شوية سباقات شوية خناقات كنا نقعد بالساعات والساعات
كان مكانا عالرصيف فمدخل عمارة والجيران شَيطين شياط
واحنا برده مش هَمِمنا بنجنن ابوهم ونعند ونزود فِالصواط
لمتِنا هيه عزوتنا هيه قوتنا ولا كان فنيتنا الفراق لحظات
لا كنا بنزهق ولا كنا بنسرق الضحكة بالعافية من قلب العياط
كانت ضحكتنا سهلة طلعة كدة صافية من قلبنا ملهاش حسابات
كانت شلتنا دنٌيا...نتجمع فثانية..ونتفرق بس عالبيات
دلوقتى دنيتنا عامية..تفرقنا فثانية. وتجمعنا بس. .فدار مناسبات
وفلحظة صمت وسٌكات عدى قصادى شريط ذكريات
لكل شبر فشارعنا ذكرى...وكل حتة وفيها صورة
لا كنا نعرف ايه فِ بٌكره ولا كانش فينا قلوب مكسورة
كنا ننزل من ستِة نجرى كنا نلعب من سِتة فورة
كنا نقعد مع بعض نحكى مرة نكتة ومرة فزورة
وإما فينا حد يبكى...تلقانا جنبه بنداوى الآهات
كنا نعشق حتتنا عشق كان كلامنا طالع بصدق
مكانش فينا قلوب مريضة...حتى إن كدبنا كدبتنا بيضة
كانت لمتنا هيا متعتنا الوحيدة.. تركيبة ملهاش مثيل توليفة فريدة
كان فينا البخيل وفينا الطويل وفينا اللى ماشى وهوه عالحديدة
كان فينا التخين وفينا الحزين وفينا اللى سارح فاحلامه البعيدة
وفينا اللى شايف صح من زمان..وفينا العاشق والدنجوان
وفينا اللى تايه وسط السنين. .وفينا اللى خايف وقايل آمين
وفينا الأمين..وفينا اللى خانه زمانه لكنه ما خان
وفينا الإنسان وفينا الفنان وفينا القديم وفينا الرزين
كنا صحيح متجمعين بس برده كنا متقسمين فرقتين
كان فينا سمك. .........وفينا صيادين
وكبرنا....وخدتنا الدنيا ف متاهة وكلنا كده مشينا وراها
اللى بايع نفسه ليها... واللى لسه بيطلب رضاها
اللى ماشى فنص الطريق.... واللى ناسى يعنى ايه كلمة صديق
اللى خدها خطوة خطوة......واللى بخطوة واحدة عدى
واللى لسه ما خطا خطوة.............. واللى شارخ واللى هدى
واللى سافر منذ فتره واللى عافر لجل نطة
واللى عايز بس زقة........ واللى لسه مستنى شَدة
واللى نايم عالمخدة....... واللى نايم بين الجراح
وفوسط زحمة الحياة.......اللى راح جوانا راح
قلوبنا البيضة ملاها سواد وشعرنا الأسود غطاه البياض
ورجعت تانى..لقيتها فاكرانى..الساعة ستة وفنفس المعاد
قلتلها فاكرانى قالتلى كبرت ى واد....وطال البعاد
تعالى واقعد فحجرى عالرصيف ونعيد من تانى كل اللى فات
بصت فوشى لقيتنى راجل بدقن وشعر فصدرى وطالعلى كمان شنبات
اتكسفت وهزت مالزعل راسها..ماشُفت أهلها ولا لقيت ناسها
كل الملامح اتغيرت فيها..ولا عادش حد بعدينا يواسيها
حتى الجنينة لقيتها حزينة كنا ب لعبنا وضحكنا بنرويها
ما عِرِفت شابت ولا احنا اللى من بعدها شيبنا
قلتلها سامحينا. .....حقك علينا. .......والله ده عيبنا
حتى الجيران لقيتهم حزانا برغم اللى كان ورغم اذانا
شفتها مهمومة.. سألتها مالك........تعبانة أظن؟
ردت بضحكة لأه حبيبى لكنى بحِن لصفارة ليلاتى فودنى ترن
والقاكوا نزلتوا من تانى يا ولاد..ساعتها سيبتها ومشيت من سكات
قولتلها نامى...أحلامك سعيدة..وعدى قصادى شريط ذكريات
لما كنا........ فمصر الجديدة