الحسينى بابا نويل أعياد الميلاد

الحسينى أبو ضيف سانتا كلوز أعياد الميلاد ورسالة سلام نختم بيها عام 2012.
عدى على بيتى وبيوت ناس كتير حواليا وهو شايل هدايا اشكال والوان وآدى ولادى الصغيرين هدايا وشال بنتى وحضنها وقابلنى بابتسامة صافية دافية من القلب وسلم عليا وشد على إيدى وقاللى كل سنة وأنت طيب عيد الميلاد على الأبواب ولقيته ادانى كارت رائع للسيد المسيح فى المزود ومكتوب عليه طوبى لصانعى السلام لأنهم أبناء الله يدعون.
وعلى ما بصيت على الكارد وجماله واللى مكتوب عليه كان اختفى من قدامى ودورت عليه فى كل حته زى ما يكون فص ملح وداب.
وفتحت علبه ابنى لقيت طيارة بلاستيك على شكل حمامة بيضاء رائعة متزينة بألوان علم مصر وعلى جناحها الشمال إيه من القرآن بتقول ما معناه ادخلوا مصر، آمنين بإذن الله وعلى الجنب اليمين إيه من الإنجيل بتقول مبارك شعب مصر.
وفتحت علبه بنتى لقيت تمثال رائع لناس إيديها فى إيدين بعض ومن كل فئات المجتمع شباب وبنات وستات ورجاله وشيوخ وقسس وعمال وفلاحين ونوبيين وسيناويين رافعين ايديهم لفوق وشايلين كلمة مصر.
طلعت فوق السطوح وطيرت الطيارة مع ابنى وبصيت لقيت الشمس صافيه وحسيت نفسى طاير معاها بحرية، ورافع إيدى لفوق وبأقول الله عليكى يا مصر.
وابنى طاير من الفرحة جنبى وبيقولى مصر جميلة أوى يا بابا ويا ريت سانت كلوز يجى يزورنا كل سنة ومينسناش.
وفكرت فى زيارة الحسينى أبو ضيف لينا قبل أعياد الميلاد وفى كل هدية ومعناها وايه اللى كان يقصده.
بصيت كويس فى طيارة ابنى بأعلام مصر وعلى جناحاتها آيات القرآن والإنجيل فهمت أن يقصد إن مات عشان الحرية لينا كلنا وإن مصر بمسلميها ومسيحيها هتطير لفوق وتوصل لعنان السماء.
وبصيت فى هدية بنتى وعرفت إن مصر مش ممكن حد يقدر يشيلها لوحدة، وأننا لازم نتحد ونرفع مصر لفوق لفوق وبأن اتحادنا قوة وبان مصر هتعيش لينا ولاولادنا وأحفادنا وهتفضل على مر السنين باتحادنا.
وبصيت على كارت المعايدة بتاعه ليا فى عيد الميلاد وعرفت ساعتها أد إيه روحه بتشاركنا أعيادنا واحتفالاتنا وأن ميلاد السيد المسيح كان رسالة سلام ومحبة للبشريه كلها مسلمين ومسيحيين.
وبصيت على إيه الإنجيل المكتوبة على الكارد وعرفت إن كان يقصد بأن لغة السلام والمحبة هى لغة الإنسانية اللى بتجمع البشر من كل شكل ولون.
وعرفت برضه إن الحسينى أبو ضيف كان بيدى رسالة لكل المسلمين المصريين أنهم يشاركون إخواتهم المسيحيين أعيادهم واحتفالاتهم ويزوروهم زى ما كان بيحصل زمان وإحنا صغيرين.
الحسينى أبو ضيف ممتش ده هيلف على بيت بيت وشارع شارع وهيدينا هدايا كتير ومش هيهداله بال ولا يرتحله قلب إلا لما كلنا نتصالح مع بعض ونحب بعض وننسى 2012 بأحزانها وآلامها وشجونها ونصلى لربنا إنه يعوضنا خير فى 2013 ونشوف مصرنا أحسن بلد فى الكون زى ما ربنا اختارها وكرمها فى القرآن والإنجيل.
استناه هو جايلك قريب وإن شا لله هيزورك وهيطمنك وهيقولك إن مصر لسه بخير.
آه نسيت الحسينى أبو ضيف بيقولك يالا قوم عيد على جار وصاحبك وابن بلدك ووطنك المسيحى وهو مستنيك هناك يالا متتاخرش.