جرى الصبا قصيدة جديدة للشاعر محمود رضوان

جرى الصبا مرسوم على الحيطة
عيل صغير .. بنت بضفاير
ونخل عالى وبلح ونيل بيجرى ع الخريطة
وقصة ناعمة صغيرة لبنت زى الملاك .. رغم العيون الحويطة
عيونها زى الليالى الطويلة سهتانة، غويطة
1
جرى الصبا بعد المدارس ماتخلص
نبت العرق فوق الجبين فى الحر
وشجرة التوت العجوزة اللى رامية طرحها فى الضل
تفوت الضل تتلسوع من القيالة
2
جرى الصبا وقت جنى القطن
وقت شوى الدرا على المنقد الوالع
سلاية تدخل فى رجلك
وامك تقولك ماشى حافى ليه؟
3
جرى الصبا هو العيال الغلابة
هو الطفولة البريئة
جرى الصبا هو الحقيقة
صورتك الحقيقية اللى من غير رتوش
وشك لوحده من غير ماتلبس وشوش
4
جرى الصبا فى عيون قريبتك اللى ساكنة فى مصر
وتحس نفسك " على "
وهى " انجى " بنت الأمير فى القصر
5
جرى الصبا
فى رحلة الوجع المبكر والألم
والبحث عن معنى لحياتك
وسط تخبيط الحياه
هو ادعاء الوعى والرؤية
والالتزام والبحث والمنظور
ونشوة الإلهام
ولذة البص لفوران الصدور
وكل يوم تفضل تدور على حاجة تايهة منك فيك
فى نفس المكان بالظبط لا انت عارف هيه ايه
ولا انت عارف .. بتدور عليها ليه
6
جرى الصبا فى لبس نضارتك ومنظرتك
بقميصك الجديد اللى ابن خالتك نزل مخصوص جابهولك من العتبة
هو البنات الجميلة فى القميص الازرق والجيبة الرصاصى
وتنسى تعمل الواجب وتنط من ع السور
ويملوا اسمك للمدرس
جرى الصبا هو امتحان الشهر
وانك بعيد ع القهر
وحلم متعلق ما بين الفكرة والتحقيق
جرى الصبا لما تبقى برئ
وضحكة م الودن دى للودن دى رايقة وصافية
ضحكة بحق وحقيق
7
جرى الصبا هو العيال الذكية اللى شايلة اللوح
رايحة تحفظ القرآن
وكل مايكبروا ينسوه
هو صلاة العصر فى الجامع
ولعب الكورة للمغرب
والرجوع وقت العشا للدار
و أبوك يزعق لك
و أمك تطبطب عليك
وهى بتدعى ع الكورة
تضحك فى سرك تقول
بكرة هاعوض الفورة
9
جرى الصبا هو حكايات الجن والعفاريت
والخوف وقطع الكهربا بالليل
ولما يكون فيه ماتش للاهلى ايام الخطيب
10
جرى الصبا هو الليالى الجميلة
اللى من غير عُقد
جرى الصبا هو الحاجات العبيطة
و انا رحت اشوف جرى الصبا
لقيتهم وقعوا الحيطة
مالقيتش حتى لا ولد و لا بنت
مالقيتش نيل بيجرى ع الخريطة.