* بالورقة والقلم خدت ميت ألم، وشفت فيكي مرمطة وعرفت مين اللي إتظلم. * القلب حزين.. والفكر شريد.. وكلامي كله أنين. * السما غريبة، لا قمر ولا حتي نجوم، وقلمي انكسر وقلبي انحسر والدموع.. الدموع أنهار من كل العيون. * شوارع ضلمة ورجلين تايهة وأجساد عاجزة وإيدين ممدودة.. وعيون مشدودة ومفيش لا ميه ولا حتي الزاد وبقت مصر قهوة وقاعدة وسيوف وحبال وجمال. * مدارس فاضية وعقول خاوية ومفيش أستاذ ولا رواد، فقدنا الأب فقدنا القدوة وخسرنا الصحبة وضاع الأمل وتاهت الأقدام بين حسرة وجوع وندم وهموم. الكل بيجري.. نفسي إنكرش.. خايف مرعوب.. بلطجية وسيوف ونبوت.. لا حد عارف رايح فين ولا جاي منين.. غموض وضلام مؤامرات وتخطيطات.. تربيطات وتخبيطات. * ناس قاعدة.. بدلة وكرافتة ومتنشية.. تفتي وتشرط وتطلب.. عايزة حتة من التورتة.. أصل حبيبتي بتتقطع بعدما خسرت واتعرت وخرج اللي في جوفها. * ناس قاعدة متنشية لا عارفة تروح ولا تيجي ولا حتي تقعد علي طبلية.. فاكرين الطبلية؟! ولمتنا حواليها وخير حبيبتي عليها وإيدينا مع بعضينا بلقمة عيش هنية. * الحب كان حارسنا وعمنا ومفطمنا علي عيشتنا والكل يقوم يغسل إيده ويحلي.. ويمدد ويمللي عينه وودانه من أمه وأبوه وخالته وجيرانه. * وتيجي السهرة.. برده حوالين الطبلية.. بس المرة دي عليها منقد وبراد شاي وفول ولب وعجمية مع عود قصب شق القمر.. فاكرينه؟! وصوت الست ملعلع ومصهلل وأبويا وأبوك قاعد مبسوط ويقول الله الله ع الست يا أم محمود. * اختفت الطبلية وراحت الست وتاهت البشر وما عاد فيه لا لمة ولا ضمة ولا حتي عود قصب ولا شفطة شاي.. الكل خايف وبيجري. * الأخ خايف من أبوه والأب خايف من بنته، وكل واحد قافل علي نفسه عشته والا بيته هربا من اللهو الخفي.. داحتي الهلث بقي مغشوش. * عساكر وبصاصين.. بلطجية وشحاتين.. رشوة وسرقة وفاسدين.. الكل بيلاقي أكله.. بس إزاي؟! بقولوا ربنا رزقنا.. طبعا هو الرازق. * أسكت وأتألم وأتأمل وأنا لا شايف شغل ولا شايف رزق ولكن شايف ضحك ع الدقون.. ناس غلابة بتجيب لقمتها بالعافية وتروح بيتها وتجيب عيال وخلاص.. هي دي عيشة؟! * إخوانا.. فهموا الفولة وهات توزيع قزايز زيت وأكياس لحمة ورز ومكرونة وطبعا الكل قال ربنا رزقنا.. طبعا ربنا رزقهم ليأكلوا، ولكن إخواننا دفعوا الرشوة وصدقوهم الغلابة.. وودونا في ستين داهية همه طول عمرهم كده حرامية مواقف.. ومالهومش كلمة. * فيه ناس تانية راكبة عربيات غالية وبتاكل أكل شهر زاد وقيصر روما وبتدفع في كوب الشاي 30 جنيه، وبرده منين؟!.. لغز؟.. لأ مش لغز ده إسمه سرقة وفساد.. ناس واصلة وعارفة طريقها وعمالة تنهب وتسرق خير حبيبتي. * يا حبيبتي.. والخير عندك كتير طول عمرك واسمك في القرآن كبلد الخير والسعد وتاريخك من عجايب الدنيا السبع ونيلك وقنالك وأرضك وبحورك وناسك الطيبين اللي تاهوا بفعل اللهو الخفي اللي لسه قاعد وبيلعب بيكي ياحبيبتي. * أنا حزين ومكتئب وزهقان وعمال أعتذر لك ليل نهار.. لأننا بنلعب بيكي.. لا تقولي نخبة والا قوي سياسية ولا دياولوا.. لا تقولي عسكر ولا دقون.. لا تقولي عجائز والا قضاء قولي فقط عسكر وحرامية.. * المحكمة قالت كلمتها وحلت مجلس الشعب ورحلوا بعدما سقطوا.. صحيح هوه شفيق بس اللي فلول عشان يطبقوا عليه قانون العزل؟ لازم يطلع براءة. * اعذريني كله تاه وكله ضاع ونحن نبحث من مجهول اسمه الحب والاستقرار.. طبعا ولادك خونة.. ولادك كل واحد فيهم بيحاول يسرق حتة تورتة.. ولادك بيدعوا الوطنية.. بيقولوا أنهم بيحبوكي.. لا وألف لا.. دول ناس كتير بيخونوكي. لو بيحبوكي وخايفين عليكي كانوا بنوا مصر صح بعد الثورة اللي كلوها وأجهضوها.. كانوا عملوا مجلس قيادة الثورة من ناس محترمين.. آه موجودين.. وقاعدين في بيوتهم بعيدا عن اللهو الخفي والقذارة والفساد.. بعد كده كنا وضعنا الدستور أولاً. * مفيش عمارة بتطلع من غير أساس والدستور هو أساس الديمقراطية والعدل ومن غيره تبقي مستمرة.. وطبعا ده واضح جدا. * يا حبيبتي.. يا حبيبتي اعذريني.. أنا متأكد أن الثورة حتقوم تاني بس المرة دي إتعلمنا خلاص ولن نثق في أحد.. * يا حبيبتي.. ياحبيبتي أعذريني.. لو دمي كان ينقذك أنا أفديكي بروحي.. ولكن أعذريني العيب فينا.. في رجالك واللهو الخفي.. أعذريني يا حبيبتي يا مصر.. مش بخاطري. --- المنسق العام لحزب الوفد