فى يوم ولا فى الأحلام طالت وقفتى فى الميدان من أجل ركوبة توصيلة تنقذنى من الزحام، نفسى اتخنقت وغرقت فى بركة من العرق والدخان الكل ماشى فاتح بقه ومنخاريه.. ومنخاريه متقولش شكمان وسحابة سودا تقولش ناقصين كمان، بدأت تغطى المكان بقى دخان سجاير كوكتيل مع حريقه قش أرز وسيطرة على المكان حتى السحابة النسمة استحت أن تزور الميدان..
والزحام وما أدراك ما الزحام حاجة ساقعة كاكولا بيبس وعرقسوس ومياه بتلج كمان والزحام زحام لا نفع عدويه ولا حتى حكماء الزمان ياما قال زحمة يادنيا زحمة ويابنت السلطان ولا حد سأل فى صحه سلامته، وبات فى خبر كان زهق من الفوضى وصار ماصار وفضلت الزحمة ولو هجروا السكان طالت وقفتى على الرصفان والكل فاتح سرعته ولا همه موقف ولا فرمان وشايف عمره مايكون ندمان والجدع الى يلحق سكته وراه ويجرى زى الرهوان طب والعضمة الكبيرة المحمولة على عكازين وعيونها مغشغشة لا تشفع كعب كوبايه ولا شايفة رصفان دية هتركب ياترى ولا جرى على الأمام أو السيدة نفيسة أو على مدافن الصدقة كمان مسكين ياغلبان كاتب وصيته فى جيبه زياده أمان أن حب تصلوا بيه متدوروش على مكان أوفر حظ لينا ولية أن غادر المكان والزحام .
أثناء وقفتى ورأسى زى بندول الساعة دوران فى دوران تقولش بوصله أهه علشان تسجل إحداثيات وكله فايدة أخذتنى سنة من النوم وأنا يقظان تمنيت ركوبة فى المنام من أجل أروح المشوار وابقى رجل همام ذهابا وإياباً إن قدر الله لى عودا محمودا للمكان قلت فى نفسى عربه بيد أو حتى يجرها بغلان أو حمارا ونقل للموتى إن كان ليا مكان بالنفر أو بالروف، أو حتى على الشكمان صحوت من غفلتى على دفع من زميل كان بجانبى حيران انطلق بساقيه وباع صحوبتى ولا تفوه بأى كلام وأخذ يجرى ورا شئ خير اللهم أجعله خير شبه عربة مكورة تقولش بطيخه لها عجل زى لعب اطفال زمان..
قلت فى بالى ميكونش استنساخ منى باص أو قول موتوسيكل قالوا ياجاهل دى أحدث التقنيات الموصلاتية وسموه اسم دلع توك توك وفيه حاجات كتير حزام أمان وشنطة فيها قطن وشاش ودوا ألوان ومضخة حريق بودرة زيادة حرص إن احتاجها السواق الهمام يادى الهنا والأمن والأمان سواقة محترم لا بياخد شمة ولا إبرة ولا برشام..
أوعوا تفتروا على الغلبان، وتقولوا فى حاجة أكيد تحت اللسان بلاش افترى على الخلق ياجدعان واتقوا الله ده العمر ثوان قلت أجرى الحق إن كان ليا نصيب مكان فى فلتة الزمان للفكرة الواردة من الهند زى الفيل الصغير توك توك.. توك توك.. زى بعضه هقول ليكم جرى إيه بعد الجرى إن كان ليا عمر وأعاود الاتصال ولعلمكم لن أعرض الموضوع على أى من اللجان الرئيسية أو الفرعية وإن كانت منبثقة كمان حتى لا أبوح وأفسد الأسرار وإلى اللقاء.