الوطاويط

صلطح وملطح وعُكشه نزلوا فى الميادين
معرفش مين وزهم واللى بعتهم مين ؟
خايف عليك يا الميدان بعد ما حررناك
تصبح مغاره وغرز للباعه الجائلين
......
خايف عليك يا الميدان تانى تضيع منى
من بعد ثلاثين سنه عشقك ومستنى
سهرنا فيك الليالى بطولها ولا نمناش
وصابنى فيك الرصاص فى القلب والننى
......
خايف عزيمة الولاد بعد الجهاد ترتاح
خايف اشوف الشيطان وسط الميدان سواح
خايف الاقى السهر والدم راحوا بلاش
وانا لسه دمى طرى وعنيّه فيها جراح
......
سهرت الف فى يناير اسحر الصائمين
ومشيت فى كل البلد انده على النايمين
ودعيت وربك قبل الدعوة من مظلوم
رافع ايديه للسما وصابر بقاله سنين
......
يا رب مش كل مرة أبات أنا المغلوب
وفى الفطار والغداء آكل انا المعطوب
وامشى عدل وانت شايف كنت ماشى ازاى
والدنيا يا رب ماشيه معايا بالمقلوب
......
يارب لاجل النبى وصاحبه متخزلنيش
و من نجاح ثورتى بفضلك متحرمنيش
وعشان شباب انظلم ومرمى فى الزنازين
زنبه فى رقاب الحكومه و الرئيس والجيش
......
يا رب واسخط كمان عكشه وزعيط ومعيط
و كل وطواط غبى لابد لنا فى الحيط
يا رب انصر بفضلك مصر والثوار
واكفينا شر النوّر والخوّنه والوطاويط
......