لن تنكسر ثورتنا

استأنف مجلس برلمان المصطبة جلساته الأسبوعية بعد عطلة الأسبوع اللى فات.
شيخ المجلس: حضرات الإخوة طبعا كلنا تابعنا اللى حصل اليومين اللى فاتوا فى ميدان العباسية ودى نقطة سودة فى تاريخ الثورة الشعبية.
العضو الفلفوس: أنا عاوز واحد يطلع ويقول لنا بصوت عالى ايه الحكمة العظيمة اللى حاتعود على البلد من التظاهر اللى مالوش صدف غير وقف حال البلد والاحتكاك بين الناس والجيش.
العضو النمرود: يا جماعة الحكاية باينة زى الشمس وهى فيه ناس عاوزة البلد تفضل تضرب فى بعضها ولا يستقر حالها ودول ناس لهم هدف عاوزين ينفذوه تبعا لمن يحرضونهم.
العضو زعيط: طيب ليه ما يطلعش ناس يهمهم مصلحة البلد ويقولوا لنا مين الناس دول ومين اللى وراهم ومين اللى بيحرضهم ومين اللى وإللا بلاش أحسن يتهمونى بالجهل.
العضو معيط: يا حضرات الفولة باينة زى الشمس وهى إن الثورة نجحت بفعل تماسكنا ومفيش حد له الفضل لواحده علشان يدعى إنه عمل الثورة برجالته وعلشان كده متغاظين وبيعملوا الشوشرة علشان يقولوا عليهم ثوار لكن الثوار بحق وحقيق همه اللى بيحافظوا على نجاح الثورة مش يعملوا على هدمها وده اللى بيحصل دلوقتى وأقول لهم حرام عليكم كفاية تخريب ودم.
العضو نطاط الحيط: يا جماعة خلاص انتهى الأمر وقامت ثورة ونجحت بإذن الله وكل اللى بيحصل ده فرقعات لا قيمة لها إلا لفت الأنظار والشعب ملك زمام الأمور وفاضل أيام على انتخاب الرئيس.
العضو بهلول: لازم الجماعة اللى بتعمل شوشرة علشان الناس تعرفهم يفهموا إن العجلة دارت لقدام ومفيش فايدة خلاص من رجوعها للخلف وإحنا شعب طيب وأصيل وبيكره العنف والقتل زى الشعوب اللى حوالينا لكن نرفض الظلم مهما طال الزمن وعلينا كلنا نتكاتف وإيدنا فى إيد بعض علشان نعوض سنين القهر والفقر اللى راحت.
شيخ المجلس: حضرات الإخوة قلنا كل اللى عندنا وموقفنا من اللى بيحصل فى بلدنا وإن شاء الله حا نفضل على طول مع الثوار.
الفلاح الفصيح
عثمان أبوزيد