دوخيني يا لمونة

عقد مجلس برلمان المصطبة جلسته العادية لمناقشة موضوع الساعة شيخ المجلس: حضرات الإخوة في كافة انحاء الجمهورية تعيش بلدنا اليومين دول في حالة غريبة خالص وهي عاملة زي الدوامة تنتقل من مكان لمكان وعاملة لخبطة خالص للعيشة في البلد.
العضو الفلفوس: والله يا جماعة أنا الفار بيلعب في عبي لأن كل شوية تطلع لنا حاجة ماشفنهاش قبل كده فمن أنابيب الغاز اللي قعدت شهور وراح فيها اللي راح والناس نست حاجة اسمها ثورة ولغاية دلوقتي مشاكلها ماشية وبعدها بشهور طلعت لنا حدوتة البنزين والسولار مع ان الاستهلاك مفيش فيه زيادة، تبقي الأزمة دي عملوها إزاي وليه وعاوزين واحد يشرح لنا الحدوتة.
العضو النمرود: والله زي ما قال أخويا الفلفوس ليه الحاجات دي ظهرت اليومين دول وفعلا الناس بدأت تشك إن وراء الحكاية دي اللي بيتقال عليه اللهو الخفي والحقيقة حاجة تبرجل الدماغ مين اللي ورا الحاجات دي.
العضو زعيط: أنا شخصيا شايف ان فيه حاجة مستخبية وكل شوية تطلع حاجة تشغل الناس عن الثورة وتطلع شوية مشاكل يقولوا شفتم الثورة عملت فينا إيه وادي اللي نابنا من الثورة والثوار لكن أقول برضه مش حانسلم وحانفضل ثوار علي طول وريحوا بالكم يا فلول النظام.
العضو معيط: أنا شخصياً شايف إن فيه هدف من ورا الحكايات اللي بتحصل دي، وأنا شخصيا أشك في حكاية البلطجية اللي سايبينهم يلعبوا في البلد مع انهم معروفون بالاسم والعنوان لكن برضه الشعب صاحي ومفتح.
العضو الغلبان: كفاية دوختم الناس من لقمة العيش والمواصلات وسيبتم الحرامية يلعبوا في البلد علشان يخربوها لكن برضه ربنا مع الشعب الطيب اللي صبر سنين طويلة وفي النهاية استجاب لنا ربنا وخلاص زي ما بيقولوا عجلة دارت لقدام ومش حاترجع للورا تاني أبداً.
شيخ المجلس: واضح من كلامكم ان فيه مؤامرات مش مؤامرة واحدة لكن ربنا معانا.