لاعب المقاصة يعلن اعتزاله الكرة في سن 23 عاما

أعلن محمد عادل امو، لاعب المقاصة، اعتزال الكرة؛ بسبب تعثر انتقاله للمصري والإسماعيلي في الموسم الجديد، رغم توقيعه على عقود الانتقال للناديين، ولكن لم تكتمل الصفقة حتى موعد غلق باب القيد.
يذكر أن امو من مواليد 1999 وتم تصعيده من قطاع الناشئين بنادي المقاصة الذي هبط إلى دوري الدرجة الثانية ويلعب في مركز الجناح، وظهر بشكل جيد في الموسم الماضي رفقة الفريق الفيومي.
محمد عادل امو

قال لاعب المقاصة عبر حسابه على فيسبوك: "فاضل ساعات علي القيد وانا مخلصتش في اي مكان بعد ما مضيت في فرقتين مصري واسماعيلي وكنت بتعامل مع كل الناس بثقه كبيره جداً مضيت للمصري وفضلت منتظرهم يدفعو شيكات النادي ويخلصوني أنا مضيت للمصري قبل كابتن ايهاب ما يمسك الفرقه اول حاجه قولتها لوكيلي بعد كابتن ايهاب ما بقي المدير الفني قولتلو انا مستعد اتنازل عن أي حاجة بس اروح مع كابتن ايهاب اي حد يعرفني يعرف اني بحب كابتن ايهاب جلال جدا جدا وان كابتن ايهاب اكتر واحد ساعدني في حياتي".
وأضاف: "قعدت اكتر من اسبوعين منتظر المصري يدفع الشيكات لما حسيت ان مبقاش في اهتمام من المسؤلين في المصري كلمت وكيلي قولتلو هروح اي مكان تاني قالي الاسماعيلي عايزك وانا بحب الاسماعيلي جدا جدا وافقت علي طول وقعدت مع البشمهندس يحيي الكومي ومضيت واتفقت علي فلوسي وكانت المشكله فلوس النادي بس عملت كل حاجه ممكن اعملها قالولي هتستني علي فلوسك عشرين يوم قولتلهم مافيش مشكله عادي ادفعو فلوس النادي وخلصوني وانا مش هنختلف علي اي حاجه اللي حضراتكم عايزينه انا هوافق عليه عشان احقق حلم من احلامي والعب في النادي الإسماعيلي".
وتابع: "كنت مستعد اعمل اي حاجه عشان الموضوع يتم خلينا النادي بتاعي يوافق علي انو ياخد الفلوس اقساط مع ان النادي في ظروف صعبه ومحتاج كل جنيه يدخل النادي يكون كاش عشان يقدر يحل ازمته ويفك القيد عملت كل حاجه عشان الاسماعيلي يطلعو شيكات النادي وكانت كل حاجه فعلا كويسه اخر يوم في القيد قالو لوكيلي مش هنقدر نخلص عشان مافيش في النادي فلوس ! ".
وأردف: "انا حالياً مروحتش نادي كلمت كل انديه الدوري كل الانديه قفلت القائمه بتاعتها ربنا يسامح كل الناس اللي كانت سبب في اللي انا وصلتلو ده انا قررت ملعبش كوره مره تانيه وبشكر كل الناس اللي حاولت تساعدني واتمني ميكونش في اي شخص زعلان مني وبشكر كابتن وليد هويدي والنادي بتاعي ربنا معاكو ويوفقكم وان شاء الله تصعدو مره تانيه ".
واختتم: "انا واثق جدا ان اللي حصلي ده خير وراضي جدا لكن لاسباب شخصيه انا مش هقدر العب كوره مره تانيه .. شكراً".