بعد توقيعه للمصري والإسماعيلي.. نجم المقاصة يُعلن اعتزاله كرة القدم

كشف محمد عادل «أمو» صانع ألعاب الفريق الأول لكرة القدم بنادي مصر المقاصة، اعتزاله لعب كرة القدم، بعد فشل انتقاله لأي من أندية الدوري الممتاز، خلال فترة الانتقالات الصيفية الجارية، رغك توقيعه على عقود انضمامه لنادي المصري البورسعيدي ووالإسماعيلي.
وكتب «أمو» عبر صفحته الشخصية على موقع التواصل الاجتماعي «فيس بوك»: «فاضل ساعات على القيد وأنا مخلصتش في أي مكان بعد ما مضيت في فرقتين مصري وإسماعيلي وكنت بتعامل مع كل الناس بثقه كبيره جدًا مضيت للمصري وفضلت منتظرهم يدفعوا شيكات النادي ويخلصوني.. أنا مضيت للمصري قبل كابتن إيهاب جلال، ما يمسك الفرقه، أول حاجه قولتها لوكيلي بعد كابتن ايهاب، ما بقى المدير الفني قولتلوا نا مستعد أتنازل عن أي حاجه بس أروح مع كابتن إيهاب».
وأضاف: «أي حد يعرفني يعرف إني بحب كابتن إيهاب جلال، جدًا جدًا وإن كابتن ايهاب، أكتر واحد ساعدني في حياتي.. قعدت أكتر من أسبوعين منتظر المصري يدفع الشيكات لما حسيت إن مبقاش في اهتمام من المسؤلين في المصري كلمت وكيلي قولتلوا هروح أي مكان تاني، قالي الاسماعيلي عايزك ونا بحب الإسماعيلي جدًا جدًا وافقت على طول وقعدت مع البشمهندس يحيي الكومي، ومضيت واتفقت على فلوسي وكانت المشكله فلوس النادي».
وتابع: «عملت كل حاجه ممكن أعملها قالولي هتستني على فلوسك عشرين يوم قولتلهم مافيش مشكله عادي ادفعوا فلوس النادي وخلصوني وأنا مش هختلف على أي حاجه اللي حضراتكم عايزينه أنا هوافق عليه عشان أحقق حلم من أحلامي وألعب في النادي الإسماعيلي، كنت مستعد أعمل أي حاجه عشان الموضوع يتم».
وواصل: «خلينا النادي بتاعي يوافق على إنه ياخد الفلوس أقساط مع إن النادي في ظروف صعبة ومحتاج كل جنيه يدخل النادي يكون كاش عشان يقدر يحل أزمته ويفك القيد، عملت كل حاجه عشان الاسماعيلي يطلعوا شيكات النادي وكانت كل حاجه فعلاً كويسه أخر يوم في القيد قالوا لوكيلي مش هنقدر نخلص عشان مافيش في النادي فلوس!».
وأردف: «أنا حالياً مروحتش نادي كلمت كل أنديه الدوري كل الأنديه قفلت القائمه بتاعتها.. ربنا يسامح كل الناس اللي كانت سبب في اللي أنا وصلتله ده.. أنا قررت ملعبش كورة مرة تانيه».
واختتم: «بشكر كل الناس اللي حاولت تساعدني وأتمني ميكونش في أي شخص زعلان مني وبشكر كابتن وليد هويدي والنادي بتاعي ربنا معاكو ويوفقكم وان شاء الله تصعدوا مرة تانية.. وانا واثق جدًا إن اللي حصلي ده خير وراضي جدًا لكن لأسباب شخصية أنا مش هقدر ألعب كورة مرة تانية».