رحاب الجمل ترد على باسم سمرة فى تليفزيون اليوم السابع: هددنى ببلطجية

فى أول ظهور بعد قرار الإيقاف عن التمثيل..

شهدت الساعات الماضية خلافًا وهجومًا حادًا على فنان دون ذكر اسمه في البداية، من خلال منشور نشرته على حسابها الشخصى بموقع التواصل الاجتماعي "فيس بوك"، بأنها هاجمت هذا الشخص بسبب تصرفاته الخارجة أثناء البروفة الخاصة بفيلمهما الجديد الذى يحمل اسم "ديك العياط".
تليفزيون اليوم السابع، استضاف الفنانة رحاب الجمل فى أول ظهور لها بعد قرار إيقافها عن التمثيل الصادر من نقابة الممثلين، والذى يقضى بإيقافها هى والفنان باسم سمرة لحين انتهاء التحقيق فى المشكلة بينهما.
وعن قرار إيقافها قالت رحاب الجمل: "لا تعليق.. أنا معرفش أنا عايزة أعرف حيثيات الوقف.. سمعت اللى بيتقال إن البوست بتاعى بيسيء لسمعة الفنانين.. طب إزاى أنا عاوزة أقول رأيي أنا هو اللى بأسيء لسمعة الفنانين الفنان اللى بيتصرف في مكان عام تصرفات غير لائقة وبيتعدى على زمايله بسب وقذف وألفاظ خارجة وإيماءات وحاجات غريبة والأمن ياخده يخرجوا بره الفندق.. هو ده اللى بيسيء ولا البوست اللى أنا استنجدت بيه.. اللى ليه ظروف أنا مقولتهاش لحد دلوقت لكن هتيجى لحظة وأقول أسباب البوست".
وأضافت رحاب الجمل في تصريحاتها لتليفزيون اليوم السابع: "مفيش فنان ولا مواطن بيستنجد ببوست إلا لما بيحس إنه الطرق كلها مسدودة.. أنا مكنتش عايز أحرج حد ولا أورط حد أو نوصل للى وصلناله.. أنا حاولت أحل المشكلة لكن مكانش في حل".
وتابعت: "لم أتسرع في كتابة البوست.. انتوا واقفين عند البوست.. وسايبين التصرفات الغريبة.. انتوا مصدومين من البوست ومش مصدومين من التصرفات.. يعنى أنا اللى مش طبيعية.. أنا اللى غلطانة في التعدى عليا أنا وزمايلى.. خلينى أتكلم عن نفسى لأن زمايلى كلهم خايفين من تهديدات باسم.. كبار وصغيرين.. أنا هموت وباسم يخلص عليا بالبلطجية اللى عندوا بيهدد بيهم.. والكلام اللى بيتبعت في التليفون.. هي موته واحدة مش أكثر وكرامة واحدة مش كرامتين".
وأضافت: "كل واحد عارف نفسه.. ولما يطلع على التليفزيون يقول باسم سمرة كان بيجيبنى من القسم الكلام ده هرد عليه قانونًا.. لكن برده عندى سؤال.. هو لما أي فنان يبقى عنده مشكلة وفى القسم وحبسجى زى ما قال عليا.. مفترض أن الفنان ده هيلجأ للدكتور أشرف زكى كنقيب ولا هيلجأ للفنان باسم سمرة.. وتساءلت: "أنت يا باسم تعرف تدخل قسم تجيب فنان.. زميل أو زميلة.. أنت أنكرت انك تعرفنى وقولت هي مين رحاب الجمل يمكن تقصد حد تانى.. وبعدين قولت أنك رحت جبتها من القسم.. وبعدين قولت أنك معندكش فيلم أساسا.. وبعدها تخرج وتقول مخرج الفيلم جمبى أهو، إزاى التناقض ده".
وعند تهديد الفنان باسم سمرة لها قالت: "هنعرف كل ده.. لأن في مفاجآت أكثر من كده بكتير.. هيعرفوها.. أنا من بداية الموضوع مش عاوزة أحرج ناس عزاز عليا ومحرجش النقيب وباسم عمال بيخلط في الأوراق وبيلوش لكل الناس ويكيل بأمور كتير أوى وحاطط أمور قصاد أمور.. فأنا وعد منى هحل لكل من تضرر من هذه المشكلة في القضاء .. في ناس كلمونى هددونى.. بيهددنى ببلطجية السمان.. السمان حتة من مكان عشت فيه 28 سنة وهو الهرم.. وأنا بقوله إن السمان مفيهاش بلطجية فيها رجالة وقفت مواقف كبيرة وإحنا بنصور أكثر من عمل.. مينفعش تقول إنهم بلطجية يا أستاذ باسم أتكلم عن نفسك".
وعن المعترضين على سردها التفاصيل في بوست على فيس بوك قالت ساخرة: "خلاص يا جماعة حقكوا عليا.. الناس لطيفة ومعندناش عيوب.. ومن حق أي حد يشتم إحنا جمال ومعندناش أي حاجة وحشة.. وخدوا الأمور ببساطة واتبسطوا.. والشتيمة مبتلزقش "
وأضافت: "أنا فخورة بالبوست.. ناس كتيرة اتاذت وبتسكت بتخاف تتكلم.. أنا اتكلمت وبتكلم.. أنا عمرى ما اشتكيت من حد من زمايلى ولا حد من زمايلى اشتكى منى".
وعن الحديث حول مواعيد سفر وأنها سبب الخلاف: "قالت الكلام ده خزعبلى.. أنا لو شغال مع ممثل أو ممثلة ومش هينزلوا التصوير أصلاً.. أنا مليش دعوة.. أنا باخد أوردر تصوير من مخرج منفذ ومنتج فنى.. الناس المسئولة عن الشغلانة هي اللى بتوزع أوردرات التصوير.. وخلينا نقول ان كلامك حقيقى أنت مالك.. ده لو أنتاجك الفيلم أنت ملكش دعوة.. أنت عارف كل فيلم بيبقى فيه كام ممثل.. لو كل ممثل قال ايه اللى هيحصل مفيش حاجه هتكمل".
وعن حديث باسم سمرة عن إخراجها من القسم قبل ذلك قالت: "سنرد بالقانون"، مشيرة إلى أنها سترد قانونيا على تشهيره بها هي وزوجها.
وأضافت: "هو ميعرفنيش ولا جابنى من القسم.. هو عنده فيلم ولا قاعد في البيت ومعندوش أفلام زى ما بيقول".
وعن إمكانية التصالح قالت الجمل: "مفيش تصالح في التشهير.. إحنا عدينا المرحلة دى.. قبل البرنامج اللى طلع أتكلم فيه.. الدكتور أشرف زكى كلمنى وحصل بينا اتفاق ودى وبشكل يليق بينا ودكتور أشرف كان منهار جدًا وفى حالة تخض من الصدمة وإن الحدث خد شكل.. وأنا قولتله اللى أنت شايفه يا دكتور أنا هعمله.. وهو كان مصدوم.. زى ما أنا اتصدمت بالكلام اللى اتقال في البرنامج كان في نفس الصدمة للدكتور أشرف زكى".
وعن الإجراءات القانونية التي ستتخذها رحاب الجمل قالت: "الموضوع خرج من النقابة لأن فيه تشهير.. وإحنا كده خرجنا من النقابة روحنا للقانون".
وعن اتهامها بمحاولة تصدر التريند على السوشيال ميديا قالت: "الموضوع أكبر بكتير من إن ده يبقى الهدف.. لو حضرتك مراتك أو اختك أو بنتك كانت موجوده في مكان عام وحد زميلها في الشغل تعدى عليها وجات تشتكى وحصل كواليس هي بس اللى تعرفها ومش هتقدر تبوح بأسرار الكواليس دلوقت علشان ميبقاش في ضحايا يعزو عليها.. هي مقررة أنها تقف في وش الطوفان لوحدها وتكمل ومش هتضحى بحبايبها حتى لو هم اتخلوا عنها.. أنا معايا ربنا".

رحاب الجمل
باسم سمرة
باسم سمرة ورحاب الجمل
رحاب الجمل وباسم سمرة
باسم سمره
الموضوعات المتعلقة
انتهاء صلاة الجنازة على هادى الجيار.. وأشرف زكى يرافق الجثمان لمثواه الأخير
الأحد، 10 يناير 2021 12:40 م
أبرز قضية.. أشرف زكى يصدر قرارا بمنع باسم سمرة و رحاب الجمل من مزاولة المهنة
الأحد، 10 يناير 2021 03:00 ص
أشرف زكى يصدر قرارا بمنع باسم سمرة ورحاب الجمل من مزاولة المهنة
الأحد، 10 يناير 2021 12:16 ص