مدى الخطاوى

خلى خيول الحلم تطير
تحكى جمالك فى الأساطير
لفى فى قلبى ودورى
شدى مجاديف كل طموحك
غنى لحنى تنبض روحك
عدى وغوصى جوا بحورى
هاتى كل حروف مواويلك
حطى شموعك على قناديلك
جوا كاسات دموعى ودمى
دويبى بشويش وسمى
ارسمى قصرالأمانى فوق سطورى
هاتى دفاتر كل آلامك
شيلى الخوف من طعم كلامك
لو هتشوفى خيوط لضلامك
اشحنى شمسك بنورى
ادبحى حزنك بفرحك
دراى آهك داوى جرحك
البسى توب الكرامة من جديد
حطمى قيد الحديد
مدى الخطاوى اتمخطرى
لسه الأمل قاعد طرى
افردى ألوان جناحك فوق جسورى
هاتى ضحكك فوق شفايفك
اغزلى المجد بقطايفك
افرحى برقصة حصانك
لونى بضحكك حيطانك
رشى حبى فوق غيطانك
تجنى إيدك خير زهورى
عبى كنوزك من فيروزك
حطى الؤلؤ مع مرجانك
خلى الشهد يبوس فنجانك
اطحنيهم اعجنيهم
يبقوا حنة وطوب قصورى
ياللى شكلى من ملامحك
عمرى ماراح أسامحك
لوتسيبى الغدارين
تيجى تانى فى يوم تخونك
ولا تحت رموش عيونك
ياخدوا عمرى
ويدفنونى فى العفن
ويسرقوا حتى الكفن
من قبورى
اوعى اتسبيهم
مدى الخطاوى