انتحار قلم

مالك يا قلم؟!
بتتكعبل فوق السطور
مش قادر تثور
تاه منك كلامك
ولا خايف يفلت زمامك
وأعصابك تفلت تثور
وتدوس وأنت ماشى ع الحروف
وتروح ضحية للظروف
بتبكى ما حد سامع شكوتك
ما حد قارى كلمتك
خايف تموت بحسرتك
بتهرب بعيد زى النسور
يا ما كنت شجاع جسور
جناحك بيحمى إللى انظلم
مالك يا قلم؟!
ماشى فوق السطور زى الكفيف
ولا َّ مربوط بحبال اليأس تكتيف
ولا َّ حروفك غرقت ف بحر الهم
مش لاقيه مجاديف
ولا َّ خايف النص يتقص
ويتمسح بفرشة التحريف
مالك يا قلم؟!
رد القلم :
قال بنكتب من سنين
بننزف الآه والأنين
بنعرض صراخ المجروحين
بس إللى شارى فينا مين؟
كله عطشان للحنين
وكله عن الصح افترق
والفكر جوانا احترق
وجف العرق
من فوق الجبين
ورحيق العطور
من كل الورود اتسرق
والفكر جوايا اتهشم زى القزاز
مبقاش ينعاز
بقى بارد
هامد
خامد
جامد
ناره مش قادرة تمور
وأنا والورق
جانا فتور
جانا نفور
ونويت أعيش فى صمت
أنا والحبر الحزين
نحكى لبعضينا الألم
عن ذكريات
الصوت إللى مات
من سكات أصبح رفات
بعد ما الحلم جواه اتخنق
زى صوت المحرومين
مش ممكن أعيش
والدافع مافيش
قلم من كتر حزنه
أصبح ضرير
مش سامع صرير
عاجز وراقد فوق السرير
أعلنها صريحة
لازم أموت
واكتب فوق التابوت
نعى الوداع
وارسم على قبرى
نعش القلم