"أحلى نهار" قصيدة لماهر مهران

(إهداء إلى ثوار مصر الأحرار فى كل مصر/ إلى الشهداء والجرحى/ إلى الذين لم يخييبوا ظنى وإيمانى بهم)
إطار
إطار
هوّ ف إطار
والشعب ف إطار
وما بين لاتنين سلوفان رقيق
لو قرّبت منه
هاتلاقيه اسوار
الشعب ف اطار
وهوّ ف اطار
اطار
اطار
شفتش حمار
حاطط فى الودان قطنة
ومغمّض عينيه عن شلة
بترش السرطان فى البلد
من اعلى حتة فى البرج
لاصغر نوارة خيار؟!
تطبطب على التعابين
وتحرّم علينا النفس
وتحلل ليهم الاحتكار؟!
تخوّفنا من بعضنا
وتصيبنا بسعار؟!
وتعلمنا ان الفجر هارب
وان اللى هايدفع المهر لبلاده
يبقا ضارب
وتصالحنا ع المذلة
والانكسار
وتحطنا فى قيود
وجوع
وخوف
تحطنا جوّه الاطار
ولو البق اتفتح
يرش بانجو
وحشيش
وافيون
عشان نتكيّف
ونهتف للفرعون
او نهتف للحمار
اطار
اطار
وصورة له
وهو مكلبش قوى فى الكرسى
وبيقوّى الدعايم
يقوّمنا من نومنا
مرعوبين من جو شتوى غايم
من فوضى
ومن مجاعة
يزوّد لنا فى الخلاعة
والمياعة
والنطاعة
والسحل
والاذية
يغمز لشوية طرشجية
عشان يغيّروا الدساتير
يسلم الجمهورية لسمو الامير
ولو حد من شعبه دمّه غلى
او فار
يحطه جوه الاطار
ويبدّل ريحة الجناين
بروايح عفن
وعكار
يملا الاطار
اطار
اطار
حدش شاف حرامية
بيسرقوا من الشلن
ولغاية المليار؟!
اطار
اطار
ووش حويط
يطنطن بالخداع
ويبنى مابينه وبين القلب
ألف حيط
يبقا مناخير خشب
وعيون قزاز
ويمكر
ويتظاهر بانه عبيط
حويط
حويط
يحبس الشكوى جوّانا
ويخيّط شفايفنا بألف خيط
يخلينا نحس بالبرد فى اغسطس
يخلينا نحس بالغربة فى حضن البيت
نكره الغنا
ودفا الحواديت
وريحة الطمى جوّه الغيط
يعلمنا ندمن اليأس
ونتعود على قولة طيط
وعلى طعم المرار
واحنا دايرين
جوّه الاطار
وكأن البلد مصيدة
وكأن الشعب فار
اطار
اطار
يدوخ الرعية
ويسمن العساكر
يمص دم البلد
ويعمل حبة مناظر
منظر وهو حكيم
وبرة الاطار خانع
منظر وهو عادل
وبرة الاطار ظالم
زى حرامية الشوارع
يقلّب فى اللى داخل
ويقلّب فى اللى طالع
ويستبلص
ويسمسر
وفى الاطار يظهر
نفسه شيخ خاشع
لا حبس نهار
ولا خلّى الصغار
يكرهوا حضن الام
ويختاروا الانتحار
اطار
اطار
حدش شاف بلد
مرهونة ف صالة قمار؟!
اطار
اطار
تختفى وتبان
ميلة الميزان
يعلا الصراخ فى العشش
وتحت الكبارى
وفى وسط الميدان
تتبخّر المحبة
ويتوه الامان
يشتكى المظلوم لضله
ويتمطّع المظلوم
من قصر عابدين
لاخر الرصيف
يبوخ شكل الرغيف
وينتشر الجفاف
تحاصرنا السنين العجاف
وننسى شكل الامطار
وهوّ يكدب ع العالم
ويقول شايفين شعبى
بيتنفّس استقرار
جوه
جوه
الاطار
يتولد ثوار
ضد اللى عاملى ابويا
وهو فى الحقيقة
وش الاستعمار
اطار
اطار
فيه فوضى
وفيه دمار
وفيه رعب وخوف
وكأننا ف يوم قيامة
او فى هجوم تتار
لا خايف ع البلد
ولا كفّاه اللى راح
سفاح
سفاح
حرمنى الرغيف
وخلّى عرضى مستباح
وحلف فى كل شبر
هايخلى فيه جراح
ودم
ومرار
ينتر من الاطار
ملعون ابوه الكرسى
اللى خلاّه زى التتار
والورد
والياسمين
والمجد للثوار
اللى زاحوا جبل الجليد
وجابولك يا صبية
احلى
واغلى نهار
نهار لا ليه حدود
ولا يحدّه اطار