التكشيرة تضرك

ادى الضحكة يا سيدى تأشيره
تدخل عشك
سيب الضحكه تبان على وشك
جرب تضحك لو تقليد
من غير ضحك الحزن يزيد
بنحاول نضحك
وندارى جروحنا
نرسم بسمة
علشان نخدع بيها روحنا
ونخلى حبيبنا يبقى سعيد
ادى الضحكة الفرصة تعيش
سيبها ترفرف
سيبها تطير
تفرد كل جناح وريش
سيب الضحكة تبان
سيبها تشيل كل الأحزان
سيبها تكركر سيبها ترن
أكيد الفرحة إليك هتحن
وتقول للدمع ابعد متجيش
اضحك
قبل الضحك ما يصبح نادر
والفرحه تغادر
الضحكه لمَّا تغيب
الوش بيصبح تكاعيب
لا بينفع فيه المكياج
ولا أى طبيب
الضحكة زى التاج فوق الوش
ليها سحر عجيب
اضحك
الضحك ياسيدى لسا بلاش
مش رايح تخسر أبداً قرشك
الضحكة بتلطف نار الهم
بتخلى عدوك ينزف دم
وبتربك جواه الألاعيب
اضحك
وادى الضحك يا سيدى تأشيره
سيبها تفوح
سيبها تداوى كل جروح
من غير ضحكة
هتدبل روح وتجف
الضحكه بتخلى الحزن يخف
ادى الضحك يا سيدى تأشيره
سيبها تشيل كل التكشيره
سيبها ترن
أكيد الفرحة هتدخل عشك