الجماهير تلقى الأمل على اللاعبين فى هاشتاج "أدعم لاعبى الزمالك"

بعد رحيل المدربين..

"مهما بكانى بيجيلى وقت معاه وبفرح من تانى، ويوميها الدنيا بتبقى من الفرحة مش سيعانى، ده كفاية عليا اللحظة دية أنا مش أنانى، بهتف كلمة بسبع حروف بيهزوا كيانى"، هذا هو لسان حال جماهير وعشاق القلعة البيضاء فى كل كبوة لفريق الكرة، إنهم مع الفريق قلبا وقالبا حتى فى أسوأ الظروف من أجل العودة لمنصة التتويج مرة أخرى.
هذا العشق الكبير للكيان، هو ما جعل عدد من الزملكاوية يطلقون هاشتاج "ادعم لاعبى الزمالك"، للشد من أزرهم ورفع معنوياتهم بعد الهزيمة من الأهلى فى القمة 111، والتى شهدت هجوما كبيرا على اللاعبين بمبرر ودون مبرر، مؤكدين أنهم سيظلوا أوفياء للكيان مهما حصل.
وقالت رغدة نديم: "الزمالك ده وطنا، مهما زعلنا أو خذلنا هو وطنا، جزء لا يتجزأ مننا، ومعاه على طول عشان هو وطنا وأرضنا"، أما عمرو محمد: "ثقتنا فيكم عالية أوى يا أحسن وأحرف لعيبة فى مصر، لسه بدرى يا أبطال الدورى والكأس"، وهو ما أكده حازم: "احنا فى مرحلة صعبة بس إحنا فى ظهركم ومعاكم لآخر المشوار".
ودون أحمد مجدى: "انتوا خسرتوا من النجم شوفتونا زعلنا؟ لأ.. لأنكم كنتوا رجالة، انتوا بس اعملوا اللى عليكوا ومهما كانت النتيجة هنفضل ندعمكم "، وقال محمد عنتر: "الهزيمة شىء طبيعى وبيحصل، المهم تفوقوا وتستفادوا منها وترجعوا زى الأول، والجمهور وراكم".
محمد ياسين: "باسم مرسى مش مهم تجيب اجوان احنا وراك الاجوان جايه جايه مهما اتاخرت انت احسن مهاجم ف مصر"، أما محمد الجوهرى فقال: "جبر ودويدار.. اوعى اللى حصل يهزكوا، اعملوا من المحنة منحة زى كوفى من سنة ضيع السوبر، بس كان من أكبر أسباب الفوز بالدورى والكاس".
وكان هناك آراء آخرى، حيث قال حازم: "هدعمهم لما يسترجلوا ويعرفوا قيمة التيشيرت اللى لابسينه، هدعمهم لما يحسوا ان فى جمهور بيدمر وبيموت مع كل هزيمة لفريقه"، وهو ما أيده ناصر: "العبوا برجولة وإحنا وراكم وهنساندكم حتى لو مجبتوش ولا بطولة، انتوا بتلعبوا باسم الزمالك"، بينما قالت أمانى: "لا.. أنا بدعم نادى الزمالك ككيان مش بدعم لعيبة إلا لما أحس إنهم يستحقوا، ولوحدك انت بس بخلصلك انت بس".
وشارك أيضا فى الهاشتاج عدد من جماهير القلعة الحمراء، دعما للزمالك، حيث عبروا عن سعادتهم للفوز على غريمهم التاريخى، لكنه فى الوقت ذاته يدعمون النادى لأنه كيان له تاريخ، وأن المنافسة الحقيقة عندما يكون هناك تساو وكفاءة بين الفريقين، وهو ما أكد عليه وليد الجزار، قائلا:"والله حرام اللى بيحصل فى لعيبة الزمالك ده، أنا أهلاوى وبموت فى الأهلى، ومع ذلك أدعم لاعبى الزمالك".