أيوه أنا زعلان منك ياريس ومتضايق وكُلى غضب برغم تأييدى وتقديرى لحضرتك كقائد ورئيس وبالرغم من حُبى الشديد لحضرتك على المستوى الشخصى والإنسانى. زعلان منك وواخد على خاطرى وقلبى موجوع ونار الغضب جوه صدرى.. وعندى سؤال ونفسى تجاوبنى عليه.. لحد إمتى هتفضل تتعامل مع الملف ده بالترفع عن ما تظنه حضرتك صغائر؟! أنا هدخل فى الموضوع على طول عشان وقتك ياريس.. لحد إمتى هنعامل قطر وتركيا بترفع وكبرياء وعدم مبالاة؟!!.. أنا عارف ومدرك كويس قوى ياريس قيمة مصر وإنها كبيرة على إنها تنزل للمستوى المُنحط اللى بتتعامل بيه الدول دى.. لكن خلينى أقول لحضرتك على حاجة.. لو فى راجل كبير وحكيم ووقور وليه هيبه.. وجه شوية عيال صغيرة ورموا عليه طوبة... هو بحكمته هيطنش.. مش هيعمل عقله بعقل عيال مش متربية.. لكن العيال دى تيجى تانى وترميه بطوبة واتنين وتلاتة وهو برده يطنش لأنه "كبير" ومش هينزل لمستوى "الصغيرين".. صدقنى ياريس العيال اللى مش متربية ولا عندها أخلاق عمرهم ما هيبطلوا رمى طوب وكمان هيتجرأ عيال غيرهم والراجل يفقد احترامه وتبقى هيصة وكل من هب ودب يغلط فيه.. لكن لو الراجل الكبير ده عداها مرة واتنين وتلاتة وبعدين راح قايم ساكع العيال دى جوز أقلام.. والله هيترعبوا حتى يمشوا فى شارع هو ماشى فيه.. وهيتعلمو الأدب.. آآه ياريس والله هو ده علاج اللى معندوش تربية أو أخلاق إنك تسكه على أفااه قلم مظبوط ساعتها بس بيعرف قيمتك كويس.. الراجل الكُبارة ده هو مصر ياريس.. مصر ياريس ساكته ليه على قطر وتركيا اللى فاتحين قنوات فضائية بتشتم فى مصر وبتحرض على التخريب وبتشوه كل إنجاز أو قرار أو عمل جميل وبتشكك فى كل نية وجهد مخلص للبناء.. كمان الدول دى بتدفع فلوس وبتمول عمليات إرهابية وبتقدملهم الدعم اللوجستى.. كمان بيشوهوا صورة مصر فى الإعلام الغربى عن طريق الجرايد العالمية اللى بيمتلكوا حصص فيها.. ده غير الموقف الرسمى المعادى لمصر مش لحضرتك أبداً كشخص.. ياريس أنت محترم وبتسامح فى حق نفسك وده حقك وحريتك.. لكن مش من حقك أبدًا تسامح أو تتهاون فى حق مصر.. دى كرامة بلد ياريس بتتمرمط كل يوم من أنصاف دول.. مش من حقك ياريس تشترى خاطر أى حد كائن من كان طالما الموضوع يتعلق بمصر.. وعشان صحيح نقدر نقول تحيا مصر وراك بكل قلب صادق.. يبقى لازم نحافظ على هيبة ومكانة وقدر مصر ومنسمحش لحد إنه يتطاول عليها أو يتجاوز معاها. طبعًا حضرتك ممكن تقول إنى أنا بقول كلام انفعالى من شاب غاضب ومحروق على كرامة بلده.. لكنى مش مقدر الأعراف الدبلوماسية بين الدول.. والمواضيع مش بتتاخد بالطريقة دى.. هقولك حاجة بسيطة جدًا ياريس وهى يعنى الدول دى كانت راعت دبلوماسية ولا سياسة ولا لياقة ولا شكل للعلاقات بين الدول.. ياريس لازم مصر تقف واقفة وتفنط الدول.. مين عدو ومين حبيب.. الدول دى أعداء لمصر ولازم كلنا نعلنها صريحة على المستوى الرسمى زى ما إحنا معلنينها على المستوى الشعبى. طبعًا حضرتك بتقولى عايز إيه يعنى وممكن نعمل إيه.. أنا بقولك وبمنتهى الغضب والصراحة والإصرار والرغبة والرجاء.. لازم ياريس نعلن عن قطع العلاقات الاقتصادية وإحنا خلاص حتى الوديعة القطرية أيام حكم الإخوان رجعناها وخلصنا منها.. ولابد من إيقاف أى تبادل تجارى أو ثقافى.. ولابد من قطع العلاقات الدبلوماسية وطرد السفراء وغلق السفارات.. ومش نقفلها وبس.. لا لا لا.. إحنا كمان نشوف أماكن السفارات دى ملك مصر ولا ملك أشخاص ولا ملك مين لأن أنا مش عارف.. ولو مش ملك الدولة نشترى المكان بتاع السفارات دى من غير ما نحمل ميزانية الدولة أى مليم.. بس هنفتح حساب ونقول للشعب اتبرع وشوف ياريس فى يوم أو اتنين هنجيب تمن السفارات دى.. مصر مش قليلة ياريس ولا إحنا صغيرين وصدقنى أول مرة أختلف معاك وأغضب منك بالطريقة دى وفى الموضوع ده تحديدًا.. وأتمنى ترد عليا وأشوف خطوات جادة فى الموضوع ده.. كرامة مصر ياريس.. كرامة مصر ياريس.. كرامة مصر ياريس.
