جودزيلا وشم الكُولة

العيال صمموا.. لازم نروح فيلم جودزيلا ثلاثى الأبعاد، وانتوا عارفين أن الآباء والأمهات فى مصر والحمد لله عيالهم هية اللى بتمشيهم على مزاجهم وبتقود الدفة فى الغالب تماماً.
دخلت الفيلم الإنتاج الأمريكانى المبهر والصرف الرهيب عشان تطلع قصة جودزيلا الوحش اللى البشرية بتحاول تقضى عليه من خمسينيات القرن بقال ايه القنابل النووية ومعرفوش يخلصوا عليه لحد ما توصلوا فى عصرنا الحالى إنه ليه لازمة لأن فى وحش تانى من نوع العن تم اكتشافه وبيهدد العالم بالفناء ودمر محطات نووية لإنتاج الكهربا فى اليابان محدش يقدر يقف قصاده إلا جودزيلا اللى تعاطف مع محنة الشعب الأمريكى بالتحديد وتقريبا خد الجنسية وحس بالانتماء لدرجة تخليه يدافع عن الإنسانية وكدهون.
كالعادة وزى افاتار وأكتر الأفلام الأمريكية رواجاً ونجاحاً البطل شغال ايه يا شعب ؟
ايووووون عليكم نور .. جندى فى الجيش الأمريكى اللى بيحاول دايما ينقذ العالم وعنده تضحية بحياته عشان القيم والأمة والشرف!!.
أتصور أنت يا مؤمن إن دى الصورة اللى بيبعوها لنا بفلوسنا عشان يغسلوا بيها وجه جيشهم ويصنعوا من جنوده أبطالا ونماذجا وقدوة؟
الجيش الأمريكانى اللى حدف اليابان فى نهاية الحرب العالمية التانية 1954 بقنبلة نووية فقتلت 140،000 شخص فى هيروشيما وواحدة تانية قتلت 80،000 فى ناغازاكى ده غير الإصابات.
الجيش الأمريكانى اللى تاريخه كله عار ودمار ودم وانهزامات ولولا السلاح النووى كان زمانه مسخرة العالم.
الجيش الأمركانى اللى اتبهدل فى فيتنام وفشل فى الصومال وانهار فى العراق واتمرمط فى أفغانستان.. بيتصدر لنا أنه نموذج الشرف العسكرى وحامى الجنس البشرى؟ بتوع تعذيب سجون أبو غريب وجوانتانامو.
والعالم كله بيدفع ويأخد البضاعة دى ويقول الله عايز كمان ومحدش بيقول عليهم عبيد البيادة الأمريكانى يعنى.. إذن كُوله دى ولا مش كُوله يا متعلمين يا بتوع المدارس؟
طب والله قلبى اتقهر على جيشنا اللى ربنا يصبره علينا .. بيعمل لنا كل اللى بيعمله ده وتلاقى شوية عيال تقولك يسقط يسقط حكم العسكر.. اشمعنى احنا عندنا الكلام ده؟
عمرك شوفت الامريكان طلعوا قالوا إن جيشهم مقصر ؟ رغم كل الخيبة اللى هوه فيها دى؟ عمرك شوفتهم طلعوا جنودهم إلا أبطال ومنتصرين وحتى لو طلعوهم فى نماذج قليلة جدا غير كده ؟ شوفت حد بيقول ايوه ده الواقع ؟
من فضلكم كفاية ودعونا نحمد ربنا على نعمة جيشنا المصرى العظيم خير أجناد الأرض.. ونحاول نوفيه ولو جزء من التقدير والاحترام اللى يستحقه.
ليه مش بنخصص جزءا من الدراما بتاعتنا لإلقاء الضوء على بطولات جيشنا العظيمة وشجاعته؟
ده الملاحم اللى قام بيها جنودنا قصاد إرهاب الإخوان وعمليات استشهادهم كل واحدة فيهم تنفع فيلم أو مسلسل؟
ليه مش بنتعلم من أعدائنا ونرجع تانى نستخدم سلاح القوى الناعمة لصالح جيشنا وبلدنا بدل الأفلام الهابطة والمسلسلات التى لا تنم للواقع بأى صلة؟
خلونا نرجع تانى نرفع شعار الجيش خط أحمر .. بكل حزم.